Jaʼ te bin la yalik jtsob investigadoretik kʼalal la yalbeyik skʼoplal te bitʼil yak ta jelonel te balumilal. Teme ya achʼuun te ay Jpaswanej sok te ya smel yoʼtan ta jtojoltik, te bin la yal te cientificoetik yaniwan yakʼbat anop te kʼax leknax la schajpan Dios spisil te bintik ay ta Balumilale sok te stukelnix ya slekubtes sbae.

Pero te ants winiketik sjinojix ta jkʼaxel te balumilal te ma tikʼuknax-a te stukel ya slekubtes sbae. ¿Yabal xjuʼ ya schʼuun koʼtantik te ya xbajt slekubtes Dios te Balumilal sok te bintik kuxajtik tey-a?

Te textoetik yuʼun Biblia te ya xchiknaj ta jun recuadro ya kiltik te ma ya xlaj skʼoplal te Balumilal sok te bintik kuxajtik tey-ae.

• Te Dios jaʼ la spas te balumilal. «Ta shahchibal Dios la spas te chʼulchan soc bahlumilal» (Génesis 1:1).

• Te Dios jaʼ yajwal te balumilale.«Ha yuʼun Jehová a te qʼuinal soc spisil bintic ay tey a» (Salmo 24:1).

• Te Dios la spas te balumilal yuʼun maʼyuk bin-ora ya xlaj skʼoplal. «Ha la yaʼbe yichʼo-ip te bahlumilal, mayuc bin ora ya stij sba ta yawil» (Salmo 104:5).

• Te Dios ya yal ta jamal te spisil-ora ay kuxlejal ta balumilal.«Te ha Dios stuquel, te la spas te lumqʼuinal […]. Ma tojoluc la spas, ha la spas scuenta yuʼun ay machʼatic ya xnahinic tey a» (Isaías 45:18).

• Te Dios ya yal te balumilal jaʼ sna ya xkʼot te ants winiketik. «Te machʼatic toj yoʼtanic ya me yichʼic hilel te qʼuinale, sbahtel qʼuinal ya xnahinic tey a» (Salmo 37:29).

Ta swenta te bitʼil lek schajpanoj te Balumilal te Dios, lek ya xjuʼ ya x-aʼtej jaʼnax teme lek ya yichʼ tuuntesel te bintik ay tey-a. Te albilkʼopetik ta Biblia, ya yal te Jehová yakʼbeyojix skʼajkʼalel yuʼun ya slajinbey skʼoplal te machʼatik ya sjinik te balumilale (Apocalipsis 11:18).

Te Biblia ya yal te kʼalal kʼaxix spisil-a ini, te Dios ya xbajt slekubtes te balumilal, ya xbajt skʼatpʼun ta jun nichimal kʼinal sok ya xbajt yakʼbey te bin ya xtuun yuʼun te bintik kuxajtik (Salmo 145:16).