TE ORACIÓN jaʼ la yalulanbey skʼoplal te Jesús te kʼalal nojpteswane. Ta skʼajkʼalel-abi, te jwolwanejetik yuʼun te religionetik kʼayemik ta skʼoponel Dios «ta jujun xuhc calle». ¿Binwan yuʼun te jich ya spasike? «Scuenta yuʼun ya xʼilotic yuʼun ants-winiquetic». Yuʼun ya skʼan ya x-ichʼotik ta mukʼ yuʼun te schʼuunel yoʼtanik. Ay bayal te machʼatik te kʼax najt te bin ya yalik sok jaʼnax ya yalulanik te bin kʼayemik ta yalel, ya skuyik te jich ya x-aʼiybot skʼopik yuʼun te Diose (Mateo 6:5-8). Te Jesús la yal te ma xtuun te oración-abi, jich la snaʼik te ants winiketik te bin ma skʼan ya yalik te kʼalal ya skʼoponik Dios. Pero ma jaʼuknax la schol te bin ma skʼan ya spasik te kʼalal ya skʼoponik Dios.

Te Jesús la yakʼ ta nopel te kʼalal ya jkʼopontik Dios ya skʼan te ya kakʼtik te ya yichʼ chʼultesel te sbiil te Dios, te yakuk xtalix te Wentainel yuʼun sok te yakuk yichʼ pasel te skʼanojel yoʼtan. Jaʼnix jich la yal te ya xjuʼ te ya jkʼanbeytik koltayel te Dios (Mateo 6:9-13; Lucas 11:2-4). Jaʼnix jich la stuuntes lokʼombakʼopetik yuʼun la yalbotik te ya skʼan ya jkʼanulantik te ayuk schʼuunel koʼtantik sok spekʼelil koʼtantik teme ya jkʼantik ya yaʼiybotik jkʼoptik te Jehovae (Lucas 11:5-13; 18:1-14). Ta swenta ini, ma jaʼuknax jaʼuk la yakʼ ta nopel, jaʼnix jich la yakʼ ta ilel te bin-utʼil ta pasele (Mateo 14:23; Marcos 1:35).

Spisil te bin la yal te Jesús koltayot te jnopojeletik yuʼun ta slekubtesel te bin-utʼil ya skʼoponik te Diose. Te kʼalal junxan-nix ajkʼabal ma xlaj-a te Jesús, ay bin kʼax mukʼ skʼoplal la yal ta swenta te oración.

Te Jesús sjunal ajkʼabal la yakʼbey smukʼul yoʼtan te jnopojeletik yuʼune. Ay bin yachʼil la yakʼ ta nopel te kʼalal jich la yal: «Hoʼon te behon, hoʼon te smelelil-cʼopon, soc hoʼon te cuxlejalon; mayuc machʼa ya xtal ta stojol te Tatil teme ma haʼucon ta jcuenta». Jaʼnix jich la yaltiklanbey: «Spisil te bin yac acʼambeyic te Tatil ta scuenta jbihil, ya jpasbeyex, scuenta yuʼun hich ya xʼichʼot ta mucʼ a te Tatil ta scuenta te Nichʼanile. Teme ay bin yac acʼambeyic Dios ta scuenta jbihil, ya jpasbeyex», patil jich la yalxan: «Ma to ayuc bin acʼambeyejic ta scuenta te jbihile. Cʼanahic, ya me awichʼic, scuenta yuʼun tsʼacal ya xcʼoht a te stseʼelil awoʼtanique» (Juan 14:6, 13, 14; 16:24).

¡Kʼax lek te bin kʼot ta pasele! Jun diccionario la yal «te jkʼaxel jelon te bin la yichʼ alel ta swenta te oración». Jaʼukmeto te Jesús ma jaʼuk la skʼan la yal te jaʼ ya skʼan ya jkʼopontik ta oración. Te bin la spase, jaʼ te la yal te bin-utʼil ya xnoptsajotik ta stojol te Jehová Dios.

Te Dios spisil ora ya yaʼiybey skʼop te j-abatetik yuʼun te jun yoʼtanik ta stojol (1 Samuel 1:​9-19; Salmo 65:⁠2). Jaʼukmeto te kʼalal te Dios la schap skʼop sok te Israel, spisil te machʼatik ya skʼan ya x-aʼiybotik te s-oracionik ya skʼan ya xkʼot ta yoʼtanik te jaʼ stsaoj Jehová te lum yuʼun Israel. Ta patil ta skʼajkʼalel te Salomón, ya skʼan ya snaʼik te jaʼ stsaoj Dios te templo yuʼun ya yakʼik chikʼbil majtaniletik tey-a (Deuteronomio 9:29; 2 Crónicas 6:32, 33). Spisil ini maba jal la yichʼ pasel. Jich bitʼil la stsʼibay te jpuk kʼop Pablo, te Ley te la yichʼ akʼbeyel te israeletik sok te chikʼbil majtaniletik te ya yichʼ akʼel ta templo jaʼnax «yaxinal te bintic lec te talel yac, te ma haʼuc mero smelelil te bintic aye» (Hebreos 10:1, 2). Ya skʼan ya xkʼotix ta pasel te bin smelelile (Colosenses 2:17). Jaʼ yuʼun jaʼto tal ta jaʼbil 33 ta jkʼajkʼaleltik, ma jaʼuk ta swenta te Ley yuʼun Moisés te bitʼil lek ya kil jbatik sok te Jehová. Jaʼ nail ya skʼan ya yichʼ chʼuunbeyel skʼop te Jesucristo te machʼa albot skʼoplal ta Ley (Juan 15:14-16; Gálatas 3:24, 25).

Te Jesús ay bin lekxan la spas yuʼun ya xnoptsajotik ta stojol te Jehová. La spajaltay sba jich bitʼil jtul amigo te ay yuʼel te ya sjam te be yuʼun ya yaʼiybotik sok ya sutbotik jkʼoptik te Jehová. ¿Bin yuʼun jich ya spas ta jtojoltik te Jesuse?

Te bitʼil jmulawilotik maʼyuk bin ya xjuʼ ya jpastik o ya kakʼtik majtanil yuʼun ya yichʼ tupʼel te mulil kichʼojtik sok te lek ya kil jbatik sok te Jehová te chʼul Dios stukele (Romanos 3:20, 24; Hebreos 1:3, 4). Jaʼukmeto te Jesús la stojbey smul spisil te ants winiketik kʼalal la yakʼ te stojil skuxlejal (Romanos 5:12, 18, 19). Ta swenta te bin la spas te Jesús, spisil te machʼa ya skʼan te lek ya x-ilot yuʼun te Jehová sok te ya xnoptsaj ta stojole, ya skʼan ya yakʼ schʼuunel yoʼtan ta swenta te bitʼil la yak sba ta lajel te Jesús sok te yakuk skʼoponik Dios ta swenta te sbiil (Efesios 3:11, 12).

Kʼalal ya jkʼopontik Dios ta sbiil te Jesús, ay oxchajp te bin-utʼil ya kakʼtik ta ilel schʼuunel koʼtantik: 1) Jaʼ «te Jcolel Tuminchij yuʼun Dios», te jaʼ ta swenta te ya jtatik perdón yuʼun te jmultike. 2) Te bitʼil chaʼkuxajtesot yuʼun te Jehová, ta ora ini jaʼix «mucʼul sacerdote» te ya yil te bin lekilal ya yichʼ tal te bitʼil la yak sba ta lajel. 3) Jaʼnax te be te ya yakʼ ya xnoptsajotik ta stojol te Jehová ta oración (Juan 1:29; 14:6; Hebreos 4:14, 15).

Ya kichʼtik ta mukʼ te Jesús kʼalal ya jkʼopontik Dios ta sbiil. Snujpʼ te jich ya jpastike, melel jaʼ skʼanojel yoʼtan te Jehová te «ta sbihil Jesús ya me squejan sbahic spisil machʼatic ayic ta chʼulchan, ta bahlumilal soc ta yeʼtal bahlumilal, soc spisilic ya me yalic ta jamal te ha Ajwalil te Jesucristo, scuenta yutsil scʼoblal ya xcʼoht te Jtatic Dios yuʼune» (Filipenses 2:10, 11). Te bin mukʼxan skʼoplal kʼalal ya jkʼopontik Dios ta sbiil te Jesús, jaʼ te jaʼ ya yichʼ albeyel yutsil skʼoplal te Jehová, te machʼa la yakʼ te sNichʼan ta jtojoltik (Juan 3:16).

Yuʼun ya jtatik ta ilel-a te mukʼ skʼoplal te yaʼtel yichʼoj te Jesús, te Biblia ya yal te bintik biililetik yichʼoj akʼbeyel. Spisil ini ya yakʼbotik kiltik te bendicionetik kichʼojtik ta swenta te bintik la spas ta jtojoltik te Jesús, bintik yak ta spasel sok bintik yato spas ta jtojoltik. (Ilawil te recuadro « Te yaʼtel yichʼoj te Jesús» .) Jaʼ yuʼun te Jesús yichʼoj jun biilil «te toyol ay yuʼun spisil bihililetic», ya skʼan ya yal-abi te yichʼoj yaʼtel ta chʼulchan sok ta Balumilal (Filipenses 2:9; Mateo 28:18). *

Jich bitʼil la kiltikix ya skʼan ya jpastik oración ta swenta te sbiil te Jesús yuʼun jich ya yaʼiybotik jkʼoptik-a te Jehová (Juan 14:13, 14). Pero ma jkʼantik te kʼalal ya kaltik «ta scuenta sbihil Jesús» te jaʼuk ya kalulantik o te maʼyuk skʼoplal ya kiltik. ¿Binwan yuʼun?

Te kʼalal jtul jchonbajel ya stsʼibaybat jun carta, ta slajibal yaniwan yal «ichʼa spatil awoʼtan». Pero ¿lokʼlajbal ta yoʼtan te bin la yal te jchonbajele o jaʼnax la spas yuʼun lek ya xjil-a te scartae? Te skʼoponel Dios ta sbiil te Jesuse kʼax mukʼ skʼoplal stukel ma spaj jich bitʼil jun carta. Manchukme ya skʼan ya jkʼopontik Dios ta spisil ora, ya skʼan ya jpastik sok spisil koʼtantik, ma jaʼuknax yuʼun te jich ya skʼan ya jpastike (1 Tesalonicenses 5:17; Salmo 119:145).

¿Bin yuʼun mukʼ skʼoplal ya skʼan ya kiltik te kʼopil «ta scuenta sbihil Jesús? ¿Bin yuʼun ma jnopilan ta koʼtantik te tʼujbil taleliletik yuʼun te Cristo? Jnoptik te bin spasoj ta jtojoltik te Jesús sok te bin yato spase. Te kʼalal ya jpastik oración, kalbeytik wokol sok yutsilal te Jehová ta swenta te bin-utʼil stuuntesoj te sNichʼan ta jtojoltik. Teme jich ya jpastike, ya xmukʼubxan te smukʼul koʼtantik ta swenta te bin la yal te Jesús: «Spisil te bin yac acʼambeyic te Jtat ta scuenta jbihil, ya me yaʼbeyex» (Juan 16:23).