BAYAL ants winiketik ma schʼuunik te ya xkoltaywan te oracione, pero te Biblia ya yal te ya skoltayotike (Lucas 22:40; Santiago 5:13). Te oración ma jaʼuknax ya skoltayotik yuʼun ya xnoptsajotik ta stojol te Diose, jaʼnix jich ya yakʼ te lek ya kaʼiy jbatike. ¿Bin-utʼil ya skoltayotik?

Kaltik jun ejemplo: kʼalal ya x-akʼbot smajtanik te alaletike, ¿bin ya x-albotik yuʼun te smeʼ statike? Ya xnojptesotik te ya skʼan ya yalik wokol yuʼun te smajtanike. Te kʼalal jich ya jpastik-euke, mukʼxan skʼoplal ya xkʼot ta koʼtantik te yalel wokole. Jaʼ pajal sok te kʼalal ya jkʼopontik te Diose. Kiltik bin-utʼil ya skoltayotik te bintik ya kaltik ta oracione.

Oración yuʼun yalel wokol. Kʼalal ya kalbeytik wokol te Dios yuʼun te bin lek ya xkʼot ta jtojoltike, jaʼ ya skoltayotik yuʼun ya xbajt ta koʼtantik te bendicionetik yakʼojbotike. Jaʼ yuʼun ya jnaʼtikxan yalel wokol, tseʼelxan koʼtantik sok ma bayal ya jmel koʼtantik (Filipenses 4:6).

Ejemplo: Te oración la spas te Jesús ta yalbey wokol te sTat yuʼun te ya x-aʼiybot skʼope (Juan 11:41).

Oración yuʼun skʼanel perdón. Kʼalal ya jkʼanbeytik perdón te Diose, ya xlamaj kʼinal kaʼiytik yuʼun. Jaʼnix jich, ya spʼijubtes te snopojibal kuʼuntik, melel ya yakʼ jnaʼtik te tulan te mulil la jpastike sok te mukʼ skʼoplal te ya sujtes koʼtantik.

Ejemplo: Te oración la spas te David ta skʼanel perdón (Salmo 51).

Oración yuʼun skʼanel jpʼijiltik. Ya skoltayotik yuʼun pekʼelxan koʼtantik, melel ya sjultes ta koʼtantik te ma xjuʼ kuʼuntik spasel spisil sok ya skoltayotik yuʼun jaʼ ya smukʼulin koʼtantik te jTatik te ay ta chʼulchan, ma jaʼuk te ya smukʼulin jba koʼtantike (Proverbios 3:5, 6).

Ejemplo: Te oración la spas te Salomón kʼalal la skʼanbey spʼijil te Jehová yuʼun ya swentain te lum Israel (1 Reyes 3:5-12).

Oración ta yorail wokol. Kʼalal ay bin bayal ya yakʼ jmel koʼtantik, jaʼto ya xlamaj kʼinal ya kaʼiytik-a te kʼalal ya jambeytik koʼtantik te Diose. Jaʼnix jich, ya skoltayotik ta smukʼulinel koʼtantik te Jehová (Salmo 62:8).

Ejemplo: Te oración la spas te ajwalil Asá kʼalal tal ta akʼbeyel guerra yuʼun te skontratak (2 Crónicas 14:11).

Oración ta stojol yantik. Jichme ya jtsaltik te bikʼtal oʼtanil sok ya skoltayotik yuʼun ya xkʼot ta koʼtantik te swokol te yantike.

Ejemplo: Te oración la spas te Jesús ta stojol te jnopojeletik yuʼune (Juan 17:9-17).

Oración yuʼun yalbeyel yutsil skʼoplal te Jehová. Kʼalal ya kalbeytik yutsil skʼoplal te Jehová ta swenta te tʼujbil taleliletik yuʼun sok te yaʼtel skʼabe, jich ya kichʼtik ta mukʼ sok ya xchʼi skʼuxul ta koʼtantik ta stojol. Jaʼnix jich ya skoltayotik yuʼun nopol ya kaʼiy jbatik ta stojol.

Ejemplo: Te oración la spas te David ta yalbeyel yutsil skʼoplal te Jehová yuʼun te bintik spastiklanoje (Salmo 8).

Pero ay bayalxan bin-utʼil ya skoltayotik te oración, jich bitʼil te ya skoltayotik ta stael «te lamal qʼuinal te ya yacʼ te Diose, te cʼax mucʼ te ma xhuʼ cuʼuntic snaʼel» (Filipenses 4:7). Te bitʼil wokol ta tael te lamalkʼinal ta ora ini, kʼax mukʼ skʼoplal ta koʼtantik te slamalil koʼtantik ya yakʼbotik te Diose. ¡Jaʼnix jich ya skoltayotik yuʼun ma stsakotik chamel! (Proverbios 14:30). Pero, ¿bin-utʼil ya jtatik te lamalkʼinal-abi? ¿Jaʼbal te kʼalal ya jpastik tulane, o ay bin mukʼ skʼoplal ya skʼan pasel?