Ya xjuʼ ya ata te Nichimal Kʼinal

TE BIN YAN ta aʼiyel-a, jaʼ te ay cheʼoxeb eruditoetik yuʼun Biblia ya yalik te bin cholbil skʼoplal ta swenta te tsʼunbil kʼinal Edén ta Génesis, maʼyuk yan parte yuʼun Biblia te ya yalbey skʼoplal. Jtul profesor yuʼun Estudios Religiosos te jaʼ sbiil Paul Morris jich la stsʼibay: «Maʼyuk banti ya yichʼxan alel skʼoplal ta Biblia te Edén». Jaʼnix jich bayal especialistaetik jich ya yalik-euk, pero te bin smelelile, jaʼ te yan stukel-a te bin ya yal te Biblia.

Ta melel te Biblia bayal buelta ya yalbey skʼoplal te Adán, Eva, te chan sok te tsʼunbil kʼinal Edén. * Pero te banti chʼayemik te pʼijil winiketik ini jtebnax teme ya jpajtik sok te bin ya yalik-euk te jwolwanejetik yuʼun te religíon sok eruditoetik jich bitʼil ya yalik te Nichimal Kʼinal te tojol aʼiyejnax. Te bin ya yalike jaʼ kʼax tulanxan ta aʼiyel. ¿Bin yuʼun te jich ya kaltike? Melel jaʼ yakik ta skontrainel-a te Bibliae.

Teme maba kʼoem lek ta koʼtantik te bin kʼot ta pasel ta tsʼunbil kʼinal Edén, ma xjuʼ te ya xkʼot ta koʼtantik te bin ya yalbey skʼoplal te sKʼop Diose. Jich bitʼil ya kiltik bael ta ora-ini, te Biblia ya yakʼbey sujtib cheʼoxeb te joJkʼoyeletik te mero mukʼik skʼoplal ta jkuxlejaltik sok te sujtibe stsakojbey sba skʼoplal sok te bin kʼot ta pasel ta Nichimal Kʼinal.

● ¿Bin yuʼun te ya xmeʼel mamalubotik sok te ya xlajotike? Te lajuk schʼuunbeyik smantal Jehová te Adán sok te Eva, kuxinik ta sbajtelkʼinal te jichuke. Pero te kʼalal la skʼaxuntaybeyik te skʼope, chʼay yuʼunik te tojil kuxlejalile sok lajik (Génesis 2:16, 17; 3:19). Jaʼ la skʼasesbotik jilel te mulil, jich maba tojotikix ta jpisiltik. Jaʼ swentail te kʼalal jich ya yal te Biblia: «Ha yuʼun hich te bin utʼil och mulil ta bahlumilal ta scuenta jtuhl winic soc te och lajel ta scuenta mulil, hich cʼoht lajel ta stojol spisil ants-winiquetic ta scaj te spisilic stahoj smulic» (Romanos 5:12).

● ¿Bin yuʼun ya yakʼ Dios te ya xkʼax te bin chopol? Tey ta tsʼunbil kʼinal Edén, te Satanás la skuy te jpas lot te Jehová sok la yal te ma la yakʼbey smulan te ants winiketik te bintik lekike (Génesis 3:3-5). Te bin la skʼan la yale, jaʼ te maba lekil ajwalil te Jehová. Te Adán sok te Eva jaʼ la schʼuunbeyik skʼop te pukuj sok la spʼajik jilel te bin-utʼil ya xwentainwan te Jehová, jich la yakʼik ta naʼel te ants winiketik te ya xjuʼ ya staik ta nopel ta stukelik te bin lek sok te bin ma lekuke. ¿Bin la spas te Jehová? Ta swenta te bayal spʼijil sok te lek ya schajpanwan la sta ta nopel te ya yakʼbey permiso te ants winiketik yuʼun ya swentain sba ta stukelik te jayebix tiempo kʼaxem tale. Jaʼ yuʼun te bin chopol ay ta balumilal ta ora ini, jaʼ ta swenta te liʼi ay te pukuje, jaʼnix jich yakʼoj ta ilel te ants winik te ma xjuʼ ya swentain sba ta stukel teme ma xkoltayot yuʼun te Dios (Jeremías 10:23).

● ¿Bin swentail te la spas Dios te Balumilale? Te tsʼunbil kʼinal Edén ya yakʼ ta ilel te Dios ya skʼan te swolol te Balumilale kʼax tʼujbiluk ya xkʼot. La yalbey te Adán sok Eva te yakuk snojesik swolol te Balumilal sok te yakuk skʼatpʼunik ta tʼujbil nichimal kʼinal (Génesis 1:28). Jich yuʼun te skʼanojel yoʼtan te Dios ta swenta te Balumilale, jaʼ te yakuk skʼatpʼun ta nichimal kʼinal sok te stsʼumbal te Adán sok Eva tojil ants winiketikuk ya xkʼotik, te tseʼeluknax yoʼtan ya xkuxinik sok te jun-nax ayike. Jteb ma spisiluk te bin ya yalbey skʼoplal ta Biblia jaʼ ta swenta te bin-utʼil ya xbajt skʼotes ta pasel Dios te skʼanojel yoʼtane.

● ¿Bin yuʼun xtaluk ta Balumilal te Jesucristoe? Te kʼalal la skʼaxuntayik mantal te Adán sok te Eva, spisil te stsʼumbalike ya xlajik-euk. Pero ta swenta te bayal skʼuxul yoʼtan te Dios la stikun tal koel te snichʼan liʼi ta Balumilal, tal skoltayotik lokʼel jich ay bin ya jmaliytik yuʼun-a (Mateo 20:28). ¿Bin smakojbey skʼoplal te koltayele? Juluk ta koʼtantik te Jesús te ya yichʼ alel sbiil ta Biblia «Te slajibal Adán» spisil-ora la schʼuunbey skʼop te Jehová, ma pajaluk sok te sbabial winike. Jaʼ yuʼun toj ta winikil kʼax stukel. La yakʼ te skuxlejal yuʼun la skoltay lokʼel te ants winiketik ta mulil. Jich ya xjuʼ ya staik perdón yuʼun Dios spisil te ants winiketik te jun yoʼtanike sok ya staik te kuxlejal te ay yuʼunik-a te Adán sok te Eva te kʼalal mato staoj smulik-ae (1 Corintios 15:22, 45; Juan 3:16). Jaʼ yuʼun te Jesús xtaluk ta Balumilal swenta yuʼun ya yakʼ kʼotuk ta pasel te skʼanojel yoʼtan te Diose. *

Jich bitʼil la kiltikix tal, te skʼanojel yoʼtan te Dios maba chujkul sok wokol ta naʼbeyel swentail. Smelelil sok oranax ya xkʼot ta koʼtantik. Jich bitʼil te spisil te bin ayin ta Edén, te nichimal kʼinal, te ants winik sok te chambalametik smelelil ayinik, te bin yaloj Dios te ya spas ta pajel chaʼbej smelelil sok nopol ya xkʼotix ta pasel. ¿Bin ya skʼan ya jpastik swenta ya kiltik te ya xkʼot ta pasele? Ay bin ya skʼan ya jpastik ta jujuntul. Te Dios ya skʼan ya yakʼbotik te bin yaloj ya spase, jaʼnix jich ya skʼan-euk te yakuk staik te ants winiketik te ay spasojik te bin chopole (1 Timoteo 2:3, 4). ¿Bin utʼil ya jnaʼtik stojol?

Te kʼalal nopol ya xlajix-a te Jesuse, kʼopoj sok jtul j-elekʼ te ay ta xujke. Te winik ini snaʼoj te snujpʼ te ya yichʼ milele, pero bajt ta stojol te Jesús ta sleel smukʼul yoʼtan. Jich albot yuʼun te Jesuse: «Yame ajokinon ta Nichimal Kʼinal» (Lucas 23:43 La Biblia. Traducción del Nuevo Mundo edición 2019 ta español). Teme ya skʼan te Jesús te jtul j-elekʼ ya sta skuxlejal ta sbajtel kʼinal liʼi ta Nichimal Kʼinal, ¿mabal jichuk ya skʼan ta atojol-euk? Jich, jaʼnix jich ya skʼan-euk te sTate. Teme jaʼat ya amulan ya ata te majtanil yalojbey skʼoplal te Diose, mame xa akom aba ta snopel spisil te bin ya xjuʼ awuʼun ta stojol te Jehovae, te Jpaswanej yuʼun te tsʼunbil kʼinal Edén.

[Notaetik]

[Recuadro sok fotoetik]

TE SBABIAL ALBILKʼOP TE YA SCHOLBEY SKʼOPLAL TE BIBLIA

«Soc ya cacʼ te contra yac awil aba soc te antse, soc te atsʼumbal contra ya yil sba soc te stsʼumbale; ha ya yehchentesbat ajol, yan te haʼate yit nax yoc yac awehchentesbe stuquel» (Génesis 3:15).

Jaʼ te sbabial albilkʼop te ya yal te Biblia te la yalbey skʼoplal te Dios ta Edén. Pero ¿machʼa-a te ants, te chan sok te stsʼumbalike? ¿Bin yuʼun te skontra sbaike?

TE CHAN

Satanás (Apocalipsis 12:9).

TE ANTSE

Jaʼ te organización yuʼun te Jehová te ay ta chʼulchan, te tey ochem skʼoplalik-a te chʼul-abatetike (Gálatas 4:26, 27). Te Isaías la yalbey skʼoplal te ants ini, ya yayintes jun nación te schʼuunoj Dios (Isaías 54:1; 66:8).

TE STSʼUMBAL TE CHANE

Jaʼ te machʼatik ya spasbeyik te skʼanojel yoʼtan te Pukuje (Juan 8:44).

TE STSʼUMBAL TE ANTS

Te sbabial jaʼ te Jesucristo te ay ta organización yuʼun te Jehová ta chʼulchan. Jaʼnix jich tey ochem skʼoplalik-euk-a te yermanotak te Cristo, te la yichʼik tsael yuʼun ya sjokinik ta ajwalil te Jesús ta chʼulchan sok yuʼun ya xkʼotik ta jun nación te jaʼ te «Israel yuʼun Dios» (Gálatas 3:16, 29; 6:16; Génesis 22:18).

TE EJCHEN TA YOK

Te kʼalal liʼi ay ta Balumilal-a te Jesús, pero te Satanás la yakʼ ta milel. Tulan te bin kʼot ta pasele, pero maba jalaj, melel la yichʼ chaʼkuxajtesel te Jesuse.

TE EJCHEN TA SJOL

Te Jesús yame yejchʼentesbey te sjol te Satanás kʼalal ya slajin ta jkʼaxel. Pero kʼalal mato xkʼot ta pasel-abi, yame schajpan spisil te bin la sjin te Pukuj ta swenta te skʼaxuntayel mantal ta Edén (1 Juan 3:8; Apocalipsis 20:10).

Te folleto Te Biblia sok te bin ya xchole, te jaʼ spasojik te testigoetik yuʼun Jehová teyme ya atabeyxan skʼoplal-a te bin ya yal te Biblia.

[Foto]

Te Adán sok te Eva la sta swokolik yuʼun te yalik ta mulile