4. Maʼyukix kʼuxul oʼtanil ta familia

«Ay machʼatic te ha nix cʼux ya yaʼiy sbahic» (2 TIMOTEO 3:​1-3).

● Ta Norte yuʼun Gales te Chris ya x-aʼtej ta skoltayel te machʼatik ya yichʼik utsʼinel o majel ta yutil snaik. Jich ya yal: «Ta jun buelta taluk tul ants te ma la jnaʼbey sba ta skaj te yichʼoj majel. Ay yantik antsetik te ya xtalik ta jtojoltik te kʼaxel ma stoyix sitik ta skaj te yichʼojik majel».

TE BIN KʼOT TA PASEL. Ta jun nación yuʼun África, ay tsobol antsetik te yichʼojik tsakel ta utsʼinel te kʼalal chʼinikto-ae. Ta jun encuesta te la yichʼ pasel ta nación-abi la yakʼ ta ilel te ay winiketik te ya skuyik te ma chopoluk te ya smaj te yinamik. Manaxme jaʼuk ya yichʼik utsʼinel te antsetik, ta Canadá ay chaʼoxtul winiketik te ya yichʼik majel o utsʼinel yuʼun te yinamik.

TE BIN YA YALIK YUʼUN. Aynanix-a te utsʼinel ta yutil na. Jaʼnax yuʼun ta ora ini ya yichʼix ilbeyel skʼoplal.

¿YUʼUN-NIXBAL JICH-A TE BIN YA YICHʼ ALELE? Ya yichʼikix koltayel te machʼatik ya yichʼik utsʼinel. Pero ¿lajembal skʼoplal te utsʼinele? Maʼuk, melel yak ta lajel bael te kʼuxul oʼtanil ta familia.

¿BIN YA AWAL TE JAʼATE? ¿Yakbal ta kʼoel ta pasel te bin ya yal te 2 Timoteo 3:​1-3? ¿Yuʼun-nixbal maʼyuk skʼuxul yoʼtanik-a te ants winiketik ta stojol te sfamiliaike?

Te yoʼebal albilkʼop te yak ta kʼoel ta pasel jaʼ skʼoplal te Balumilal. Kiltik te bin ya yal te Biblia.

[Te bin ya yal]

«Te utsʼinel ta yutil na ay ma xyichʼ alel ta stojol te aʼtel patanetik. Ay antsetik te ya xkujch yuʼunik sok maʼyuk bin ya yalik yuʼun te ya yichʼik majel» (KOLTAYWANEJETIK YUʼUN TE MACHʼATIK YA YICHʼIK UTSʼINEL O MAJEL TA YUTIL SNAIK YUʼUN GALES).