6. Scholel skʼop Dios ta swolol Balumilal
6. Scholel skʼop Dios ta swolol Balumilal
«Ya me xpuhc ta halel ta swohlol bahlumilal scʼoblal te lec yachʼil cʼop yuʼun te cuentahinel yuʼun Dios» (MATEO 24:14).
● Te Vaiatea kuxinem ta isla yuʼun Tuamotú te ay ta stsʼeel te Oceáno Pacífico. Ayniwan 80 islaetik te pujkem ta 803,000 kilómetro, te jaʼnax kuxinemik 16,000 ta tul ants winiketik tey-a. Manchukme jich-abi te testigoetik yuʼun Jehová yulaʼtayojik te Vaiatea sok te machʼatik nopol ayik tey-ae. ¿Bin yuʼun te teyto ya xkʼotik-ae? Melel jaʼ ya skʼanik te ya scholbey skʼop Dios spisil te ants winiketik chikan te bantito ayik.
TE BIN KʼOT TA PASEL. Te lek yachʼil kʼop yuʼun te Wentainel ya yichʼ pukel ta spamal Balumilal. Ta 2010 te testigoetik yuʼun Jehová te jayeb ora la scholik skʼop Dios jaʼ 1 millón 600 mil ta 236 nacionetik. Jich kʼoem te jtul testigo la schol skʼop Dios 30 minuto ta jun kʼajkʼal. Ta jaʼbil 2000 la yichʼ pasel sok la yichʼ pukel kʼaxem ta 20 millón ta chajp publicacionetik.
TE BIN YA YALIK YUʼUN. Ayix tal bayal jaʼbil te yak ta cholel te skʼop Dios.
¿YUʼUN-NIXBAL JICH-A TE BIN YA YICHʼ ALELE? Melelnix-a te ay ants winiketik spukojik ta alel te bin ya yal te Biblia. Jaʼukmeto ma xjalajik ta spasel sok maba spukojik ta spamal Balumilal. Yan stukel te testigoetik yuʼun Jehová ya scholik skʼop Dios ta swolol Balumilal. Manchukme ya yichʼik kontrainel yuʼun te organizacionetik te ay yuʼelik yilel sok te ma lek stalelik (Marcos 13:13). * Soknix te testigoetik ya yakʼ stiempoik ta scholel skʼop Dios sok ya sjapik publicacionetik te ma skʼanbeyik stojole. Yuʼun ya spasik-a te aʼtelil jaʼ ya stuuntesik te majtan takʼin ya yichʼ akʼele.
¿BIN YA AWAL TE JAʼATE? ¿Yakbal ta pukel ta alel te lek yachʼil kʼop ta swolol Balumilal? ¿Yabal skʼan ya yal-abi te ay bin lek ya jmaliytik ta pajel chaʼbej?
[Nota]
^ parr. 6 Teme ya akʼan ya anaʼbeyxan skʼoplale ilawil te videoetik «Fieles ante las pruebas», «Los triángulos púrpuras» sok te «Los testigos de Jehová se mantienen firmes ante el ataque nazi», te jaʼ spasojik te testigoetik yuʼun Jehová.
[Te bin ya yal]
«Ya jcholtik skʼop Dios sok stseʼelil koʼtantik, jaʼto te ban kʼalal ya skʼan te Jehová sok jaʼ chikan te bantito ay te ants winiketik» (ANUARIO DE LOS TESTIGOS DE JEHOVÁ 2010).