Jelontesbot skuxlejalik yuʼun te Biblia

¿BIN tijbot yoʼtan yuʼun jtul winik yuʼun ya yijkitay te tajimal ta swenta takʼin sok te ya yijkitay te elekʼ ta naetike? Akʼa schol kaʼiytik.

«Ya jmulan-a te tsaltamba animal ta caballo» (RICHARD STEWART)

AYIN TA: 1965

SLUMAL: JAMAICA

STALEL TA NAIL TAL: YA XTAJIN TA SWENTA TAKʼIN SOK YA X-ELKʼAJ-A

TE BIN YILEL JKUXLEJAL-A: Chʼion ta jun lum te naʼbil sba ta lek, te Kingston sbiile, te jaʼ capital yuʼun te Jamaica, tey-a kʼax pobre te ants winiketik, maʼyuk aʼtelil sok bayal j-elekʼetik. Te ants winiketik kʼax xiwenik ta skaj te bayal machʼatik ya stsob sbaik ta elekʼ sok ta milaw. Ta jujun kʼajkʼal ya kaʼiytik stojol te ay machʼa ya xtujkʼaywanik.

Te jmama kʼax tulan aʼtej yuʼun ya swentainon sok te chaʼtul kijtsʼinab —jtul achʼix sok jtul kerem—, sok la spas tulan yuʼun ya jnoptik jun. Pero te joʼone jaʼ ya jmulan yilel-a te tsaltamba animal ta caballo, ma jaʼuk te escuelae. Bayal buelta maba ochon ta jclase yuʼun ya xboon ta yilel te bitʼil ya x-animaj te caballoetik. Sok aynix la jkajtibin.

Ma kʼax bayal tiempo ta patil jajch jmulan te tajimal ta swenta takʼin sok smulanel bayal antsetik. Jaʼnix jich ya jnukʼ marihuana-a. Ta swenta-abi, jajchon ta elekʼ, jich jajch jtsob bayal jtujkʼ. ¡Lek te maʼyuk machʼa la jmil te kʼalal la kaʼiy elekʼ-ae!

La kichʼ tsakel sok la kichʼ otsesel ta cárcel. Pero te kʼalal lokʼone, jajchon ta spasel yan buelta te bin kʼayemon ta spasel-ae. Sok toyxan te schopolil koʼtane. Jich yilel te maʼyuk bin ya jpas-ae, pero ta melel ma jkʼan komel, ora ya x-ilinon sok kʼax ma lek koʼtan-a. Maʼyuk skʼoplal ta koʼtan-a te yantike.

¿BIN-UTIL LA SJELBON JKUXLEJAL TE BIBLIAE? Jaʼ ta tiempo-abi te kʼax ma lek-a te jkuxlejal kʼalal te jmama jajch snop te skʼop Dios sok och ta testigo yuʼun Jehová. La jkʼan jnaʼ bin yuʼun jajch sjeltay stalel te jmamae. Jaʼ yuʼun, jajch jnop te Biblia sok te Testigoetik.

Ta oranax la jta ta ilel te spisil te bin ya yakʼik ta nopel maba pajal sok te bin ya xnojpteswanik te yantik religionetik sok la kil te spisil te bin ya yakʼik ta nopel lokʼem ta Biblia. Jaʼiknax stukelik-a te ya xbajtik ta nanatik ta scholel te skʼop Diose, jich te bin-utʼil ya spasik-a te sbabial jchʼuunjeletike (Mateo 28:19; Hechos 20:20). Te bin la skoltayon ta snaʼel te jaʼiknix-a te smelelil religión jaʼ te talel kʼaxel kʼux ya yaʼiy sbaike (Juan 13:35).

Te kʼalal la jnop te Biblia, kʼot ta koʼtan te ya skʼan ya jeltay te jkuxlejal, melel te Jehová ya yilay te antsiwej. Ya skʼan ya kijkitay-euk spisil te bin ya sbolobtes te bakʼet, yuʼun jich lek ya yilon-a (2 Corintios 7:1; Hebreos 13:4). La stijbon koʼtan kʼalal la jnaʼ te ya xjuʼ ya kakʼbey stseʼelil yoʼtan te Jehová o ya xjuʼ ya kakʼbey smel yoʼtan ta swenta te bintik ya jpase (Proverbios 27:11). Jaʼ yuʼun la kijkitay snukʼel te marihuana soknix stuuntesel te tujkʼetik, sok la jpas tulan yuʼun ya jeltay te jtalele. Pero, te bin wokol la kaʼiy yijkitayele jaʼ te antsetik sok te tajimal ta swenta takʼin.

Ta sjajchibal ma jkʼan te ya snaʼik-a te kamigotak te yakon ta snopel te Biblia sok te testigoetik yuʼun Jehová. Pero, jelon te snopojibal kuʼun te kʼalal la jkʼopon te bin la yal te Jesús ta Mateo 10:33: «Te machʼa ya smucon ta yoʼtan ta stojol ants-winiquetic; ha nix hichon ya jmuc ta coʼtan ta stojol te Jtat ay ta chʼulchane». Jich yuʼun la kalbey ta ora te joʼtak te yakon ta snopel te Bibliae. Ma la snaʼ bin la yalik: ma schʼuun yoʼtanik-a te ya jkʼan ya x-ochon ta Testigo. Manchukme jich-abi, lananix jcholbey yaʼiyik-a te la jtaix ta nopel te ya jeltay te jkuxlejale.

¿BINTIK LEKILAL JTAOJ YUʼUN? Te jmama kʼax akʼbot stseʼelil yoʼtan yuʼun kʼalal la yil te yakon ta spasel ta jkuxlejal te bin ya yal te Bibliae. Ta ora ini ma smelix yoʼtan yuʼun te binwan yakon ta spasele. Ya jmulantik yalbeyel skʼoplal: te bitʼil kʼux ta koʼtantik te Jehovae. Kʼalal ya xjul ta koʼtan te bintik la jpas ta nameye, ma schʼuun koʼtan te bitʼil juʼ kuʼun sjeltayel te jkuxlejal ta swenta te la skoltayon te Jehovae. Ma xyikʼbonix koʼtan te spasel mulil sok te sleel jkʼulejal.

Te manchuk la jnop te Biblia ayon-niwan ta cárcel o lajemonixniwan te jichuke. Pero, ta swenta te la jnop te skʼop Diose, tseʼel koʼtan sok te jfamilia. Te kiname ya skoltayon sok te kantsil nichʼan ya yichʼon ta mukʼ, ta jpisiltik ya kichʼtik ta mukʼ te Jehová sok stseʼelil koʼtantik. Ma jnaʼ bin-utʼil ya kal wokol te bitʼil ay machʼa la snojpteson ta swenta te skʼop Diose. Jaʼ yuʼun, ta ora ini ya jpas tulan te ya kakʼ ta nopel te bin ya yal te Bibliae. Ya kalbey wokol te Jehová yuʼun te la yakʼ ochukon ta lum yuʼun, pero jaʼ ya kalbeyxan wokol yuʼun te la yakʼ ta ilel yutsil yoʼtan kʼalal la yikʼon tal ta stojol.

[Te bin ya yal]

«La stijbon koʼtan kʼalal la jnaʼ te ya xjuʼ ya kakʼbey stseʼelil yoʼtan te Jehová o ya xjuʼ ya kakʼbey smel yoʼtan ta swenta te bintik ya jpase»

[Foto]

La jkʼan jnaʼ bin yuʼun jajch sjeltay stalel te jmamae

[Foto]

Jokinej te kinam sok te kantsil nichʼane