Jelontesbot skuxlejalik yuʼun te Biblia

¿BIN-UTʼIL la stabey swentail skuxlejal jtul achʼix te bayal kʼax swokol ta yalalilto? ¿Bin-utʼil jajch yichʼ ta mukʼ Dios jtul winik te kʼaxto ya xmajawan-a sok ya schʼik sba ta política-a? Kiltik te bin ya scholike.

«Koʼtanuk-a te kʼuxon ta yoʼtanike» (INNA LEZHNINA)

AYIN TA: 1981

SLUMAL: RUSIA

STALEL TA NAIL TAL: BAYAL KʼAX SWOKOL TA YALALILTO

TE BIN YILEL JKUXLEJAL-A: Te jmeʼ jtate kojkchikinetik-a, jich ayinon-euk te joʼone. Kʼax tseʼel koʼtan te wakeb jaʼbil kʼax tale, pero te jmeʼ jtat la yijkitay sbaik. Manchukme chʼinonto-a kʼot ta koʼtan te bin yak ta kʼoel ta pasele, bayal la jmel koʼtan yuʼun. Te kʼalal la yijkitay sbaik te jmeʼ jtate, te jpapa la yikʼ bael te jbankil sok jilik ta nainel ta Troick, te jmamae la yikʼon bael ta Cheliabinsk. Ta patil chaʼnujpun te jmamae. Te jchaʼtat bayal ya xyakub-a sok spisil-ora ya smajonkotik-a.

Ta 1993, te jbankile la sjikʼ jaʼ. Kʼax kʼux la kaʼiykotik. Te jmamae jaʼnix jich jajch ta yakubel sok jajch smajon. Ya jkʼan-a te yakuk xlekub te jkuxlejale. Koʼtanuk-a te kʼuxon ta yoʼtanike. La jle koltayel ta bayal iglesiaetik, pero maʼyuk la jta.

¿BIN-UTʼIL LA SJELBON JKUXLEJAL TE BIBLIAE? Kʼalal ayix 13 kaʼbilal-ae, te joy ta clase te jaʼ testigo yuʼun Jehová la scholbon kaʼiy bayal ejemploetik te lokʼem ta Biblia. La jmulan te ejemploetik yuʼun te Noé sok te Job te abatinik ta stojol te Dios manchukme ay swokolik-a. Maba bayal tiempo ta patil jajch jnop te Biblia sok te Testigoetik sok jajchon ta bael ta tsoblejetik.

Bayal bintik tʼujbil la jnop ta skʼop Dios. La yakʼbon stseʼelil koʼtan te la jnaʼbey sbiil te Diose (Salmo 83:18). Chajpnax la kaʼiy-a te jamal yalojix-a te Biblia te bin yilel ya xkʼot te jkuxlejaltik «ta slajibal cʼahcʼal» (2 Timoteo 3:​1-5). Bayal la jta smukʼul koʼtan te kʼalal la jnop ta swenta te chaʼkuxajel. Nopanax awaʼiy: ¡ya jchaʼkil te jbankile! (Juan 5:​28, 29.)

Pero ma spisilukik la smulanik te bin yakon ta snopele. Te jmama sok te jchaʼtat ma skʼan ya yilik-a te testigoetik yuʼun Jehová sok la stenonik yuʼun ya kijkitay snopel te Bibliae. Pero bayal la jmulan-a te bin yakon ta snopele sok ma jkʼan ya kijkitay-a.

Wokol la kaʼiy sitintayel te kontrainel yuʼun te jfamiliae. Tey-abi kʼax tulan wokol ta jtojoltik: te kijtsʼin kerem te ay sjokinejon ta tsoblejetik-ae, jaʼnix jich la sjikʼ jaʼ. Pero jaʼ la skoltayonik te Testigoetike. Tey la jta-a te kʼuxul oʼtanil te yakon ta sleel-ae. Mero la jchʼuun te jaʼik te smelelil religión, jaʼ yuʼun ta 1996 la kichʼ jaʼ bitʼil testigo yuʼun Jehová.

¿BINTIK LEKILAL JTAOJ YUʼUN? Ayix wakeb jaʼbil te nujpunemon sok jtul lekil winik te Dmitry sbiil. Yakotik ta abatinel ta sucursal yuʼun te testigoetik yuʼun Jehová te ay ta San Petersburgo. Ta patil bael, te jmeʼ jtat maʼyuk bin la yalbonikix ta swenta te bintik jchʼuuneje.

¡Ya kalbey bayal wokol te Jehová! Te abatinel ta stojole yakʼojbey swentail te jkuxlejale.

«Bayal jojkʼoyeletik kuʼun-a» (RAUDEL RODRÍGUEZ RODRÍGUEZ)

AYIN TA: 1959

SLUMAL: CUBA

STALEL TA NAIL TAL: BAYAL YA SCHʼIK SBA TA POLÍTICA-A

TE BIN YILEL JKUXLEJAL-A: Ayinon ta La Habana (Cuba) sok chʼion ta jun barrio te banti bayal majtamba-a. Te kʼalal keremonto-ae bayal la jmulan te yudo (majtamba) sok yantikxan tajimal te yichʼoj majtamba.

Te bitʼil la kakʼbey yipal te nop jun ta escuela, te jmeʼ jtat la skʼanik te yakuk xboon ta universidad. Tey kʼunkʼun och ta koʼtan te ya skʼan jeltayel te leyetik ta jlumale sok jajch jkontrain te j-aʼtel patanetik. Ta jun buelta sok te joy ta clase la jmajtik jtul policía swenta ya jpojbeytik te spistola, bayal la kejchentesbeytik sjol. Ta skaj-abi, la kichʼkotik otsesel ta cárcel sok la yalbonkotik te ya kichʼkotik milel. ¡Aytonax 20 kaʼbilal-a, sok nopol ya xlajonix-a!

Te banti makalone jtukel ayon-a sok jajch jnopilan ta koʼtan bin-utʼil ya jsitintay te soldadoetik te ya smilonike, melel ma jkʼan ya kakʼ ta ilel te ya xiwone. Pero bayal bintik jajch jojkʼoybey jba, jich bitʼil te bin yuʼun te bayal bintik ma stojiluk ya yichʼ pasel o teme jaʼnax jkuxlejaltik-a ini.

¿BIN-UTʼIL LA SJELBON JKUXLEJAL TE BIBLIAE? Ta patilxan maba la kichʼkotik milel, pero la kichʼkotik albeyel te ya xjilotik treinta jaʼbil ta cárcel. Tey la jnaʼbey sba-a te testigoetik yuʼun Jehová te chukulik ta skaj te schʼuunel yoʼtanik. Xchamnax koʼtan yuʼun te bayal yip yoʼtanik sok te lamal yoʼtanike. Manchukme ma stojiluk te la yichʼik otsesel ta cárcel, maba ilinemik.

Te Testigoetik la scholbonik te ay bin ya skʼan ya spas ta stojol te ants winiketik te Diose. Sok te ya skʼatpʼun ta nichimal kʼinal te Balumilale te banti maʼyukix utsʼinwanej sok te bin ma stojiluk ta pasel, te ya xnoj ta lekil ants winiketik te ya xjuʼ ya xkuxinik ta sbajtelkʼinal ta jun lekil kuxlejalil (Salmo 37:29).

Ya jmulan-a te bin ya snojptesonike, pero te jtalele ma pajaluk sok te bin yilel stalelike. Ya jkuy-a te maʼyuk bin-ora ya xjuʼ te ma jchʼik jba ta política o te maba ya jsutbey spakol te bin ya kichʼ pasbeyele, jaʼ yuʼun jajch jkʼopon ta jtukel te Bibliae. Kʼalal laj kuʼune, kʼot ta koʼtan te jaʼnax te testigoetik yuʼun Jehová jich stalelik te bitʼil te jchʼuunjeletik yuʼun Cristo ta nameye.

Te bin la jnop ta Biblia la yakʼbon kil te bayal bintik ya skʼan ya jeltay ta jkuxlejal. Ya skʼan ya jeltay te bitʼil ya xkʼopojon, melel bayal ya kal bolkʼop. Jaʼnix jich ya skʼan ya kijkitay-a te tabaco sok te maba ya jchʼikix jba ta política. Maba kʼun la kaʼiy spasel, pero sok te koltayel yuʼun te Jehová kʼunkʼun la kijkitay.

Te bin wokol kaʼiyoj sjeltayele jaʼ te bayal ya x-ilinone. Ta ora ini yato jkʼanbey te Dios te yakuk skoltayon ta sjeltayel te jtalele. Skoltayejon bayal textoetik yuʼun Biblia jich bitʼil te Proverbios 16:​32 te ya yal: «Ha lec xan te machʼa ma xʼilin ta ora te bin utʼil machʼa ay yip, lec xan te machʼa ya xhuʼ yuʼun scomel sba te bin utʼil te machʼa ya stsal jun pueblo».

Ta 1991 la kichʼ jaʼ bitʼil testigo yuʼun Jehová ta jun tambo ta cárcel. Jun jaʼbil ta patil, te joʼon sok cheʼoxebxan jchukeletik lokʼonkotik ta cárcel sok la kichʼtik tikunel bael ta España ta swenta te ay jfamiliatik tey-ae. Te kʼalal kʼoone, jajchon ta bael ta tsoblejetik yuʼun te testigoetik yuʼun Jehová te leknax la yilonik, jich la kaʼiy te bayalix jaʼbil ya snaʼbonik jba sok la skoltayonik ta sjeltayel te jkuxlejale.

¿BINTIK LEKILAL JTAOJ YUʼUN? Ta ora ini tseʼelix koʼtan sok yakotik ta abatinel ta stojol Dios sok te kinam sok te jnichʼnab. Bayal ya jmulan te ya jkʼases tiempo ta yakʼel ta nopel te smelelil ta stojol te ants winiketik. Kʼalal ya xjul ta koʼtan te kʼalal jchʼielonto-a sok te kʼan kichʼ milele, ya kal bayal wokol yuʼun te bayal bintik jtaoj ta ora ini. Ma jaʼuknax kuxulon, jaʼnix jich ay bin yakon ta smaliyel ta pajel chaʼbej. Koʼtanukix te ya kil te nichimal kʼinal, te banti maʼyukix te bin ma stojiluk ta pasel sok «mayuquix lajel» (Apocalipsis 21:​3, 4).

[Te bin ya yal]

«La yakʼbon stseʼelil koʼtan te la jnaʼbey sbiil te Diose»

[Foto]

Te joʼon sok te jmamalal ya jmulantik snojptesel te kojkchikinetik ta swenta te Biblia