Te Abrahán: Jtul winik te maba xiw

Te Abrahán yak ta yilel bitʼil ya schajpan sba te sfamilia sok te j-abatetik yuʼun te ya xbajtik ta Canaán (Génesis 12:1-5). Bayal te machʼa ya swentain te Abrahán jaʼ yuʼun tulan ya yaʼiy. ¿Bin-utʼil ya sle te bin ya xtuun yuʼun ta jpam lum te ma snaʼbey sbae? ¿Mabal jaʼuk lek te ya xjil ta Ur te jaʼ lekil kʼinal te banti ay bayal jaʼ sok akiltik? ¿Bin ya xkʼot ta pasel teme tsakot ta chamel o laj ta lum te banti ya xbajtike? ¿Machʼa ya swentain te sfamilia? Ayniwan jich la snop te Abrahán te la smel yoʼtan yuʼun. Manchukme jich la yaʼiy sba, maba komot yuʼun te xiwel. La snop ta yoʼtan te ya schʼuunbey te smantal te Dios chikan bin ya xkʼot ta pasel. Te Abrahán maba xiw.

¿BIN YILEL STALEL TE MACHʼA MA XIW? Jaʼ jtul ants winik te ay yip yoʼtan sok te ya spas te bin ya sta ta nopel kʼalal ya sitintay jun wokolil. Maba ya xiw sok maba ya xkʼexaw. Ta melel maba yuʼun kʼaxel ma xiw pero te bin ya xkʼot ta pasele jaʼ te bitʼil jaʼ te Dios te ya x-akʼbot yip yuʼun maba ya xiw.

¿BIN-UTʼIL LA YAKʼ TA ILEL TE ABRAHÁN TE TALELIL-ABI? Ma la spas te bin la spas te yantik ants winiketik . Te banti chʼi te ants winiketik ya yichʼik ta mukʼ bayal diosetik sok lokʼombaetik. Maba la xiʼ te bin ya snop te ants winiketik ta stojol, jaʼ yuʼun maba la skom sba ta spasel te bin lek sok yip yoʼtan la yakʼ ta ilel te jaʼnax ya yichʼ ta mukʼ te Jehová te Dios, «te Machʼa toyol ay» (Génesis 14:21, 22).

Jaʼ nail la yakʼ te yichʼel ta mukʼ te smelelil Dios ma jaʼuk te sleel sbiluk. La yijkitay jilel te bintik ay yuʼun ta Ur bajt ta jochol takin kʼinal, melel snaʼoj te ma x-ijkitayot yuʼun te Diose. Te kʼalal kʼax bael te kʼajkʼale ayniwan jul ta yoʼtan te lekil kuxinel ta Ur. Manchukme jich-abi maʼyuk bin-ora chʼay ta yoʼtan te bitʼil te Jehová ya x-akʼbot te bin ya xtuun yuʼun sok te bin ya xtuun yuʼun te sfamilia. Te bin kʼax mukʼ skʼoplal la yil ta skuxlejal jaʼ te Jehová, te kʼalal jich la snop-abi jaʼ akʼbot yip yoʼtan yuʼun ya schʼuunbey spisil te mantaliletik yuʼune.

¿BIN YA YAKʼ JNOPTIK TE BIN LA SPASE? Jaʼ te manchuk ya xiwotik ta schʼuunel te mantaliletik yuʼun te Diose manchukme ma jichuk ya spasik te yantike. Te Biblia ya yakʼ ta naʼel te machʼatik ya yakʼ sbaik ta stojol te Jehová ya staik kontrainel yuʼun te yamigotakik o te sfamiliaik (Juan 15:20). Te bin jnopojtik ta stojol te Dios jaʼ smelelil jaʼ yuʼun ma xiwotik ta skoltaybeyel skʼoplal te bin jnopojtike (1 Pedro 3:15).

Jaʼnix jich te Dios jamal yaloj te ya yakʼbey te bin ya xtuun yuʼun te machʼatik ya yakʼik ta ilel schʼuunel yoʼtan ta stojol. Teme ya smukʼulin koʼtantik te bin jamal yaloj jaʼme ya xbajt ta koʼtantik spasbeyel te yaʼtel te Jehová, ma jaʼuk ta sleel bayal jbiluktik (Mateo 6:33). Kiltik bin-utʼil spasoj jun familia ta jkʼajkʼaleltik.

Manchukme te , Doug sok Becky ay chaʼtul yal snichʼnabik te chʼinikto la skʼan bajtik ta pam lum te banti maʼyuk bayal jcholkʼopetik yuʼun te lek yachʼil kʼope. Kʼalal la snopik ta lek sok la skʼoponik Dios la spasik te bin snopojike. Te Doug jich la yal: «Ya skʼan te ma xiwotik melel kʼejel ya xbootik sok te kal jnichʼnabtik sok ma jnaʼtik te bin yilel ya xkʼootik, jich yuʼun te kʼalal jajch jchaptik te bin jnopojtik spasel jaʼ la jnopbeytik skʼoplal te Abrahán sok te Sara. Jaʼ la skoltayotik te la jnopilan ta koʼtantik te jaʼ la yakʼ smukʼul yoʼtanik ta stojol te Jehová sok te maʼyuk bin-ora ijkitayotik».

¿Bin lokʼ yuʼunik-a te bitʼil bajtik ta yan nación? Te Doug jich ya yal: «Ma xjuʼ ta ajtayel te bendicionetik kichʼojtike» jich ya yalxan: «Te bitʼil maba ya jletik bayal jbiluktik ya jtuuntestik ta lek te jtiempotik, ya jcholtik skʼop Dios, ya xkʼopojotik sok ya xtajinotik sok te kal jnichʼnabtik jich ya kaʼiytik te libre ayotik».

Ya jnaʼtik te ma jpisiltikuk ya xjuʼ kuʼuntik te jich ya jpas ta jkuxlejaltike. Te bin ya xjuʼ kuʼuntik spasel ta jpisiltike jaʼ te ya jkʼayinbeytik stalel te Abrahán, te jaʼ nail la yakʼ ta skuxlejal te abatinel ta stojol te Dios sok te la smukʼulin yoʼtan te ya x-akʼbot te bin ya xtuun yuʼune. Teme jich ya jpastike jaʼ yakotik ta schʼuunel te bin ya yal te Biblia te ayuk smukʼul koʼtantik sok te jichuk ya kaltik «Jaʼ jkoltaywanej kuʼun te Jehová. Maba ya xiwon» (Hebreos 13:5, 6).

[Te bin ya yichʼ alel]

Jtul ants winik te te akʼbil yip yoʼtan yuʼun te Dios ya stsal te xiwel

[Recuadro]

Lekil j-abat yuʼun Dios sok lekil inamil

Te Sara nujpunem sok jtul winik te tulan schʼuunel yoʼtan, pero jaʼnix jich-euk ay schʼuunel yoʼtan. Te Biblia oxeb buelta ya yalbey skʼoplal bitʼil lekil ejemplo yuʼun yantik antsetik (Isaías 51:1, 2; Hebreos 11:11; 1 Pedro 3:3-6). Manchukme te Biblia ma xyalbey bayal skʼoplal, pero ya xjuʼ te ya xtal ta koʼtantik te bin yilel stalel te ants ini.

Jnop kaʼiytik te bin yaʼiyel la yaʼiy sba te Sara kʼalal te Abrahán la yalbey te albot yuʼun te Dios te ya yijkitayik te Ur. ¿Labal skʼan snaʼ te banti ya xbajtik sok bin yuʼun? ¿Labal smel yoʼtan yuʼun te bin-utʼil ya xkuxinik? ¿Labal smel yoʼtan yuʼun te maʼyuk bin-ora ya yilix te yamigotak sok te sfamilia? Ayniwan la smel yoʼtan yuʼun. Manchukme jich-abi jun yoʼtan bajt, melel smukʼulinoj yoʼtan te ya x-akʼbot bayal bendición yuʼun te Jehová teme ya schʼuunbey te smantal (Hechos 7:2, 3).

Pero te Sara ma jaʼuknax la schʼuunbey skʼop te Dios, jaʼnix jich lekil inamil kʼot. Maʼyuk bin-ora la stsal sba ta kʼop sok te Abrahán ta swenta te machʼa ya swentain te sfamilia. Spisil-ora la yichʼ ta mukʼ sok la skoltay sok kʼuxul yoʼtan ta swenta te bin ya sta ta nopel spasel te Abrahán. Pero te bin yuʼun tʼujbilxan ta ilele jaʼ ta swenta te lekil taleliletik yuʼune (1 Pedro 3:1-6).

¿Yabal xtuun yuʼunik te talelil-abi te antsetik te nujpunemik ta kʼajkʼal ini? Te Jill jaʼ jtul ants te kʼaxem ta 30 jaʼbil snujpunel jich ya yal: «Te ejemplo yuʼun te Sara yakʼojbon jnop te ma chopoluk te ya xkʼopojon sok te ya kalbey te jmamalal te bin ya jnop ta koʼtane, pero maʼyuk bin-ora ya xchʼay ta koʼtan te jaʼ jolal ta na sok te jaʼ ya yal te bin ya yichʼ pasel. Te kʼalal ya sta ta nopel te bin ya yichʼ pasel te joʼone ya jpas tulan ta skoltayel».

Te binxan ya yakʼ jnoptik te Sara jaʼ te maʼyuk bin-ora la stoy sba yuʼun te stʼujbilal (Génesis 12:10-13). Spisil-ora sok spekʼelil yoʼtan la skoltay te Abrahán manchukme lek o chopol te bin ya xkʼax ta stojolik. Te Abrahán sok te Sara jun yoʼtan la yakʼ sbaik, pekʼel yoʼtanik sok kʼux la yaʼiy sbaik, jaʼ yuʼun te snujpunelik jaʼ jun bendición kʼot ta stojolik.