Jelontesbot skuxlejalik yuʼun te Biblia

¿BIN ikʼbotxan yoʼtan jtul winik yuʼun Escocia te lokʼem scarrera? ¿Bin-utʼil la sjeltay skuxlejal jtul winik yuʼun Brasil te bayal machʼa ya xway sok-a sok te ya stuuntes cocaína-ae? ¿Bin-utʼil juʼ yijkitayel te uchʼ trago jtul jchʼiel kerem yuʼun Eslovenia? Kiltik te bin ya scholik kaʼiytik.

«Kʼax lek yilel-a te jkuxlejale» (JOHN RICKETTS)

AYIN TA: 1958

SLUMAL: ESCOCIA (REINO UNIDO)

STALEL TA NAIL TAL: AʼTEJ TA EMPRESA

TE BIN YILEL JKUXLEJAL-A: Chʼion ta jun familia te ay skʼulejalike. Te jpapa aʼtej ta soldado yuʼun Reino Unido, jich yuʼun bayuk banti bootik sok te jfamiliae. Nainotik ta Escocia, ta Inglaterra, ta Alemania, ta Kenia, ta Malasia, ta Irlanda sok ta Chipre. Te kʼalal waxakeb kaʼbilal-ae la yotsesonik ta escuela ta Escocia, sok la jnop jun ta Universidad de Cambridge.

Kʼalal ayix 20 kaʼbilal-ae, ochon ta aʼtel waxakeb jaʼbil ta jun empresa yuʼun petroleo. Nail aʼtejon ta América del Sur, ta África sok ta Australia Occidental, tey la jach jun empresa te patil la jchon.

Te bitʼil la jta bayal takʼin, maba aʼtejonix te kʼalal ayix 40 kaʼbilal-ae. ¿Bin la jpasix-a te bitʼil maʼyukix kaʼtel-ae? Paxiajon ta bayal lugaretik. Cheb buelta la jbeentay ta moto te Australia sok la jbeentay swolol te Balumilal. Kʼax lek yilel-a te jkuxlejale.

¿BIN-UTʼIL LA SJELBON JKUXLEJAL TE BIBLIAE? Te kʼalal ayonto ta aʼtel-ae, jich la kaʼiy te ya jkʼan ya kalbey wokol te Dios ta swenta te bin yilel te jkuxlejale. Jich yuʼun jajchon ta bael ta iglesia te banti ya xboon te kʼalal chʼinonto-ae, pero la kil te maʼyuk bayal ya yakʼik ta nopel te Bibliae. Tey-abi boon sok te mormonetik, pero ma lek la kil te maʼyuk skʼoplal ta yoʼtanik te Bibliae.

Ta jun buelta, kʼotik ta jna te testigoetik yuʼun Jehová. Oranax la jta ta ilel te lokʼem ta sKʼop Dios spisil te bin schʼuunejike. La skʼoponbonik jun texto te jaʼ te 1 Timoteo 2:3, 4, te banti ya yal te jaʼ skʼanojel yoʼtan Dios te yakuk «xcol spisil [te] ants-winiquetic soc te yacuc xcʼoht ta yoʼtanic te smelelil-cʼope». La jmulan te ya xkʼot ta yoʼtanik te smelelil kʼop te ay ta Bibliae.

Kʼalal jajch jnop te Biblia sok te Testigoetik, jaʼnix jich kʼot ta koʼtan te smelelil kʼope. La yakʼbon stseʼelil koʼtan snopel te ma jaʼuk Dios te Jesús jich bitʼil ya yalik ta swenta te trinidad (Juan 14:28; 1 Corintios 11:3). La jta ta ilel te la jchʼay jtiempo ta snopilanel te bitʼil-a te jun-nax ayike. ¡Ma wokoluk ya xkʼot ta koʼtantik stukel te bin smelelile!

Tey-abi jajchon ta bael ta tsoblejetik yuʼun te Testigoetike. Yan-nax la kil-a te slekil yoʼtanik sok te ya spasik te bin ya yal te Bibliae. Jich yilel te maʼyuk banti ya xchʼayik. Te kʼuxul oʼtanil ya yakʼik ta ilel la yakʼbon jnaʼ te jaʼik te smelelil religione (Juan 13:35).

¿BINTIK LEKILAL JTAOJ YUʼUN? Kʼalal kichʼojix jaʼ-ae, la jnaʼbey sba te Diane, jaʼ jtul hermana te lek stalel te chʼi ta jun familia yuʼun testigoetik yuʼun Jehová. Jaʼ la jmulan te tʼujbil taleliletik yuʼun, jich yuʼun nujpunotik. Jaʼ jun bendición yuʼun Jehová te koltayel ya yakʼbon te kinam sok te bitʼil jun-nax ayotike.

Ya jkʼan ya xbootik ta jun lugar te banti ya skʼanikxan jcholkʼopetike, jich yuʼun ta 2010 bootik ta Belice, te ay ta Centroamérica. Liʼ ini ya jcholbeytik skʼop Dios te ants winiketik te kʼux ta yoʼtanik te Jehová sok te ya skʼan ya snaʼbeyikxan sbae.

Ay slamalil kʼinal ya kaʼiy te bitʼil la jnaʼbey sba te Dios sok te la jnop te smelelil kʼop te ay ta Biblia. Te bitʼil bayal tiempo ya jchol skʼop Dios, jkoltayoj bayal ants winiketik ta snopel te Biblia. Maʼyuk bin ya yakʼbonxan stseʼelil koʼtan kʼalal ya kil bitʼil te Biblia ya sjelontesbey skuxlejal te ants winiketik jich te bitʼil la sjeltaybon jkuxlejal te joʼone. Jich ya jkʼan ya kalbey wokol te Jehová yuʼun te jkuxlejale.

«La yakʼbonik kil slekil yoʼtanik» (MAURÍCIO ARAÚJO)

AYIN TA: 1967

SLUMAL: BRASIL

STALEL TA NAIL TAL: BAYAL MACHʼA YA XWAY SOK-A

TE BIN YILEL JKUXLEJAL-A: Chʼion ta Avaré, jaʼ chʼin lum te ay ta estado yuʼun São Paulo, te machʼatik kuxinemik tey-a pobreik.

Laj te jpapa te kʼalal mato ayinemon-ae. Te kʼalal chʼinonto-a ya jlapbey skʼuʼ te jmama te kʼalal ya xlokʼ bael ta jnae. Jich jajch jtij jba bitʼil ya spas te antsetik, sok te ants winiketik jajch yilik te ya jmulan te winiketik. Ta patil jajch jpas mulil sok yantik keremetik soknix te winiketik te mukʼikixe.

Te kʼalal mukʼubonxane bayal boon ta club, ta bar soknix ta iglesiaetik ta sleel winiketik sok antsetik yuʼun ya xwayon sok. Te kʼalal ya spasik te carnaval, ya jchajpan jba jich bitʼil ants sok ya x-ajkʼotajon ta desfileetik te ya spasik te escuela yuʼun samba. Mukʼ jkʼoplal kʼoon.

Te kamigotak jaʼik te winiketik te ya xwayik sok winiketik, j-antsinel antsetik sok te machʼatik ya stuuntesik droga. Ay chaʼoxtul te la sjukonik ta snukʼel te crack (cocaína en piedra), sok ora kʼayon ta snukʼel. Ay baeltik te sjunal ajkʼabal ya jnukʼotik; o ay jtukel ya jnukʼ sjunal kʼajkʼal. Ta skaj te bin yilel te jsit kelaw jajch yalik te kichʼojlaj sida.

¿BIN-UTʼIL LA SJELBON JKUXLEJAL TE BIBLIAE? Jaʼ te kʼalal la jnaʼbey sba te testigoetik yuʼun Jehová. La yakʼbonik kil slekil yoʼtanik. La skʼoponbonik te Romanos 10:13, te banti ya yal te «spisil te machʼatic ya yalbeyic wocol ta scuenta sbihil te Cajwaltic, ya me xcolic». Jich kʼot ta koʼtan te mukʼ skʼoplal te ya jtuuntesbeytik te sbiil te Diose. Jteb ma spisil-ora te kʼalal jnukʼojix crack ta sjunal ajkʼabal-ae, ya jam te jventana sok ya kil moel te chʼulchan, sok yaʼlel jsit ya jkʼanbey te Jehová te yakuk skoltayone.

La jta ta ilel te kʼax bayal ya smel yoʼtan te jmama ta skaj te bitʼil yakon ta sjinel te jkuxlejal, jaʼ yuʼun jajch kijkitay te drogae. Cheʼoxeb kʼajkʼal ta patil jajch jnop te Biblia sok te Testigoetike. La yalbonik te jaʼ ya skoltayon ta yijkitayel te droga, jichnix kʼot ta pasel-a.

Te kʼalal la jnopxan te Bibliae, kʼot ta koʼtan te bayal bin ya skʼan ya jeltay ta jkuxlejal. Jaʼ wokolxan la kaʼiy yijkitayel te bin kʼayemon ta spasel te kʼalal chʼinonto-a, jaʼ te bitʼil ya jmulan te joy ta winikil. Ya skʼan ya kijkitay-a te kamigotake, sok ma boonix ta baretik sok ta club.

Manchukme ma kʼunuk la kaʼiy spasel, la yakʼbon smukʼul koʼtan te ay jkʼoplal ta yoʼtan te Jehová sok te ya yichʼ ta wenta te bitʼil ya jpas tulane (1 Juan 3:19, 20). Ta jaʼbil 2002 kijkitayojix ta jkʼaxel-a te bitʼil ya xwayon sok te joy ta winikil, jich yuʼun la kichʼ jaʼ bitʼil testigo yuʼun Jehová.

¿BINTIK LEKILAL JTAOJ YUʼUN? Te jmama xchamnax yoʼtan yuʼun te la jeltay te jkuxlejale, jaʼ yuʼun jajch snop-euk te Bibliae. Mel-oʼtantik sba te akʼbot infarto cerebral. Manchukme jich-abi, yato spas tulan ta schʼiteselxan te skʼuxul yoʼtan ta stojol te Jehová sok te Biblia.

Ayix waxakeb jaʼbil te bayal ya kakʼ jtiempo ta snojptesel ta Biblia te ants winiketik. Ta melel ayto ya smulan koʼtan te bin la jpas ta nameye, pero ya yakʼbon smukʼul koʼtan snaʼel te tseʼel yoʼtan te Jehová teme maba ya jpas te bin chopole.

Te bitʼil nopol ayon ta stojol te Dios sok te jich ya xkuxinon te bitʼil ya smulane, lek ya kaʼiy jba yuʼun. Ta ora ini ya xjuʼ ya kalix te tseʼel koʼtane.

«Mero jyakubelon-a» (LUKA ŠUC)

AYIN TA: 1975

SLUMAL: ESLOVENIA

STALEL TA NAIL TAL: BAYAL YA XYAKUB-A

TE BIN YILEL JKUXLEJAL-A: Ayinon ta Liubliana, te capital yuʼun Eslovenia. Lek chʼion tal, pero te kʼalal chaneb kaʼbilal-ae, la smil sba te jpapae. Ta skaj-abi jajch ta aʼtel te jmamae yuʼun ya smakʼlinotik te joʼon sok te jbankile.

Te kʼalal ayix 15 kaʼbilal-ae boon ta nainel sok te jchuchuʼ meʼel. Ya jmulan nainel tey-a, melel ma bayal ya skomon jich bitʼil te jmamae, sok tey nopol nainemik-euk-a te kamigotake. Te kʼalal ayix 16 kaʼbilal-ae jajch kamigoin ants winiketik te jujun semana ya xlokʼik ta uchʼ trago. La kakʼ chʼiuk te jole sok chajpnax ta ilel-a te bitʼil jajch jlap te jkʼuʼ jpakʼe, ta patil, jajch jnukʼ cigarro.

La jpas prueba bayal drogaetik, pero jaʼ la jmulanxan te uchʼ trago. Ta patil ma jtebukxanix ya kuchʼ, ay ya kuchʼ kʼaxem ta jun botella. Ma xchiknaj ta ilel teme mero yakubenonix-ae. Ay baeltik te jaʼnax ya xchiknaj yuʼun te yikʼ trago ta ke, pero ma snaʼik te jayeb litro vino o cerveza la kuchʼ te kapbil sok vodka.

Bayal buelta joʼon la jkoltaylan te kamigotak yuʼun ma xyalik te kʼalal kʼax yuchʼojikix-ae, manchukme joʼon bayalxan la kuchʼ. Ta jun buelta la kaʼiy te jtul kamigo la yal ta jtojol te mero jyakubelon. Kʼax kʼux la kaʼiy te jich la yale.

Ta swenta-abi jajch jnop te bin yakon ta spasel sok te jkuxlejale. Ma xtuunon la kaʼiy. Sok maʼyuk swentail la kil te bin ya jpase.

¿BIN-UTʼIL LA SJELBON JKUXLEJAL TE BIBLIAE? Ta fechaetik-abi la jta ta ilel te ay jtul joy ta clase te jelonemix-a te stalele, melel jajch yakʼ ta ilel te lamal yoʼtane. La jkʼan la jnaʼ bin yuʼun, jaʼ yuʼun la kikʼ ta uchʼ kapel yuʼun jich ya xkʼopojotik. La scholbon kaʼiy te yak ta snopel te Biblia sok te testigoetik yuʼun Jehová. Jaʼnix jich la scholbon cheʼoxeb te bin yak ta snopele. Te bitʼil maʼyuk bin-ora ochon ta jun religione, maʼyuk bin-ora kaʼiyoj stojol-a te bintik la scholtiklanbone. Jajchon ta bael ta tsoblejetik sok te Testigoetik sok jajch kichʼ nojptesel yuʼun Biblia.

Jich la jnop te smelelil kʼop te la yakʼbon smukʼul koʼtane. La jnop te ayotikix ta kuxinel ta «slajibal cʼahcʼal» te ya yalbey skʼoplal te Biblia sok te nopol ya xbajt slajin Dios spisil te chopol ants winiketik ta Balumilal, pero te ya yakʼ xkuxinuk ta nichimal kʼinal ta sbajtelkʼinal te machʼatik lek yoʼtanike (2 Timoteo 3:1-5; Salmo 37:29). Jich yuʼun la jkʼan jelontes te jkuxlejal yuʼun jich ya jta-euk te kuxlejal ta sbajtelkʼinal.

Te kʼalal la kalbey te kamigotak te bintik yakon ta snopele, jaʼnax jajch slabanonik. Pero jaʼ la skoltayon-abi, melel jich la jta ta ilel te ma jaʼuk lekil amigoetike. Jaʼnix jich kʼot ta koʼtan te jajch kuchʼ trago ta skaj te ya jokinlan te ants winiketik te ma lek stalelike. Melel jaʼnax ya smaliyik te ya xlaj te semana yuʼun ya xbajtik ta yakubel.

La kijkitay te kamigotak-abi sok jajch kamigoin te testigoetik yuʼun Jehová. Te yachʼil kamigotak ma jaʼuknax ya yakʼbonik smukʼul koʼtan, te bitʼil kʼux ta yoʼtanik te Jehová ya spasik tulan te lekuk te skuxlejalike. Te bitʼil jaʼ la jokinlan, jaʼ la skoltayonik sok jich juʼ kuʼun yijkitayel te uchʼ trago.

¿BINTIK LEKILAL JTAOJ YUʼUN? Ya kalbey wokol te Jehová yuʼun te ma puersa ya kuchʼix trago yuʼun tseʼel koʼtan-a. Ma jnaʼ binwan yilel te jkuxlejal te manchuk la kijkitay te yakubele. Ta ora ini kʼax lek ya kaʼiyix jba.

Ayix jukeb jaʼbil te yakon ta aʼtel ta Betel yuʼun te testigoetik yuʼun Jehová ta Eslovenia. Te bitʼil ya jnaʼbey sba sok ya x-abatinon ta stojol te Jehová ayix swentail ya kaʼiy te jkuxlejale.