Te foto ya xchiknaj ta jwaʼel jkʼabtike ya yakʼ ta ilel te bin schʼuunej te ants winiketik te bitʼil ya xkʼot ta pasel te Skʼajkʼalel ichʼel ta kʼop te ya yalbey skʼoplal te Bibliae. Ya snopik te bayal chʼulelaletik ya stsob sbaik ta stojol te mukʼul juktajibal yuʼun te Dios swenta ya yichʼik ichʼel ta kʼop yuʼun: aylaj te machʼatik ya xbajtik ta chʼulchan, sok te yantike yalaj yichʼik castigo ta infierno. Pero te Biblia, ya yakʼ ta nopel te bin swentail te Skʼajkʼalel ichʼel ta kʼop, jaʼ te ya slajin te bin ma stojiluk ya yichʼ pasel liʼ ta Balumilale (Salmo 96:13). Te Jesús jaʼ te Juez tsabil yuʼun Dios yuʼun ya yichʼ talel te bin stojil ta pasel liʼ ta Balumilal (Kʼopona Isaías 11:1-5 sok Hechos 17:31).

Te sbabial winik, te Adán sbiile, la skʼaxuntaybey smantal te Diose. Jaʼ yuʼun, jpisiltik ya jta jmultik, ya xkʼax jwokoltik sok ya xlajotik (Romanos 5:12). Swenta ya schajpan te bin ma stojiluk la yichʼ pasele, te Jesús ya schaʼkuxajtes te bayal ta millón ta tul ants winiketik te lajemike. Te libro yuʼun Apocalipsis, ya yakʼ ta naʼel te spisil ini ya xkʼot ta pasel te kʼalal ya xwentainwan ta jmil jaʼbil te Jesucristo (Kʼopona Apocalipsis 20:4, 11, 12).

Te machʼatik ya xchaʼkuxajik tale ya yichʼik ichʼel ta kʼop, pero ma jaʼuk yuʼun te bin la spasik te kʼalal mato lajemik-ae, jaʼ ya yichʼik ichʼel ta kʼop yuʼun te bin ya spasik kʼalal ya yichʼ jamel te libroetik o te rolloetik te ya yalbey skʼoplal te Apocalipsis capítulo 20 (Romanos 6:7). Te jpuk-kʼop Pablo la yal ta swenta «te machʼatic toj yoʼtanic soc te machʼatic ma ba toj yoʼtanic» te jaʼ te machʼatik ya xchaʼkuxajik tal sok te ya xjuʼ ya snopik ta swenta te Diose (Kʼopona Hechos 24:15).

Te ants winiketik te lajik te maba la snaʼbeyik sba te Jehová sok te maba abatinik ta stojol ya xchaʼkuxajik tal yuʼun ya spasbeyik te skʼanojel yoʼtan te Diose. Teme jich la spasike, ya yakʼik ta ilel te ya «xchaʼcuxajic yuʼun ya yichʼ scuxlejalic». Pero, te machʼatik ya xchaʼkuxajik tal te ma skʼan ya schʼuunbeyik te smantal te Diose ya xchaʼkuxajik yuʼun «ya stoj smulic». (Kʼopona Juan 5:28, 29 sok Isaías 26:10; 65:20).

Te kʼalal tsʼakajemix-a te jmil jaʼbil te ya xjalaj te Skʼajkʼalel ichʼel ta kʼop, te Jehová skʼatpʼunejix ta tojil ants winiketik spisil te machʼatik ayik ta Balumilale (1 Corintios 15:24-28). ¡Kʼax tʼujbil te majtanil ya yichʼik yuʼun te la schʼuunik mantale! Te Satanás, te yichʼoj makel jmil jaʼbil-ae, yame yichʼ koltayel lokʼel yuʼun te Dios yuʼun ya x-utsʼinwan junxan buelta. Te Satanás yame spas tulan yuʼun ya snamajtes te ants winiketik ta stojol te Jehová, pero te machʼatik ya xkujch yuʼunik te prueba-abi yame xkuxinik ta sbajtelkʼinal liʼ ta Balumilal (Kʼopona Isaías 25:8 sok Apocalipsis 20:1, 7-9).

Te Biblia ya yalbey skʼoplal yan skʼajkʼalel ichʼel ta kʼop. Jaʼ te bin-ora ya yichʼ lajinel spisil te bintik ay ta balumilal. Oranaxme ya xtal, jich bin-utʼil te Pulemal kʼax ta skʼajkʼalel te Noé, te la slajin spisil te ants winiketik te ma lek stalelike. Nopol, ya yichʼ lajinel te «chopol ants-winiquetique», o te machʼatik kʼax ma lek stalelike, jichme jun yoʼtan ya xkuxin te lekil ants winiketik ta jun balumilal «banti ya xnahin te bin toj ta pasele» (Kʼopona 2 Pedro 3:6, 7, 13).