Yak, ay bayal millón ta tul ta swolol Balumilal. Jaʼ skʼoplalik te machʼatik ya yalik te lek yachʼil kʼop yuʼun te Wentainel yuʼun Dios. Ta Biblia Xchʼul Cʼop Dios ta Tzeltal yuʼun Oxchuc soc Tenejapa, jich ya yal ta Salmo 68:11: «Tsobol antsetic la spucbeyic ta alel te scʼope».

Te bin ya spasik te antsetik te jaʼik testigoetik yuʼun Jehová, ma pajaluk sok te yantik religionetik. ¿Bin yuʼun te ma pajaluke?

Melel, ta jujun religión yanyantik te bin ya spasik. Te antsetik te ay yaʼtelik ta sacerdote, jaʼ ya xwolwanik ta sreligionik. Jaʼ yuʼun te machʼatik ya swentainik, jaʼnax te machʼatik ayik ta s-iglesia. Yan stukel te antsetik te jaʼik testigoetik yuʼun Jehová, maba ya scholik skʼop Dios ta yutil congregación, ya spasik ta nanatik o ta bayuk lugar.

Yanxan te bin ma pajale, jaʼ te bitʼil te yantik religionetik te antsetik, jaʼ ya swolik te iglesia yuʼunik sok ya yakʼik ta nopel te bintik schʼuunejik. Te antsetik te jaʼik testigoetik yuʼun Jehová, maba ya xnojpteswanik ta congregación te kʼalal ay winiketik te yichʼojikix jaʼ. Jaʼnax ya spasik te winiketik te tsabilik yuʼun ya xnojpteswanik (1 Timoteo 3:2; Santiago 3:1).

Ta Biblia, jaʼnax ya yalbey skʼoplal te winiketik te jaʼ ya swolik te congregación. Te bin la yal te jpuk-kʼop Pablo ta stojol te Tito, la yakʼ ta ilel te yuʼun-nix ya skoltaybey skʼoplal-ae, melel jich la yal: «La jquihquitayat hilel ta Creta scuenta [...] yac awacʼticlambe yichʼ yaʼtelic ancianohetic ta jujun pueblo» (Tito 1:5). Jaʼnix jich la yalxan: «Te anciano ya scʼan te mayuc bin ya sutot ta cʼop yuʼun, te jtuhluc nax yihnam» (Tito 1:6). Te Pablo jaʼnix la stikun bael carta ta stojol te Timoteo, jich la yal: «Teme ay machʼa yoʼtanuc ya yichʼ yaʼtel ta anciano, buen lec aʼtel te ya scʼane. Te anciano ya scʼan te mayuc bin ya sutot ta cʼop yuʼun, te jtuhl nax yihnam, ya xhuʼ yuʼun pʼijubteswanej» (1 Timoteo 3:1, 2).

Pero, ¿bin yuʼun jaʼnax te winiketik ya xjuʼ x-ochik ta anciano ta congregación? Te Pablo jich la yal: «Ma ba ya cacʼ te ya xpʼijubteswan te ants ta stojol winic o te ya scuentahin; yame slahman sba. Como ha nahil la yichʼ pasel te Adán, patil te Eva» (1 Timoteo 2:12, 13). Te bitʼil jaʼ nail la yichʼ pasel yuʼun Dios te winik, jich la yakʼ ta ilel te jaʼ ay ta swenta te ya xpʼijubteswan sok te ya xwolwan.

Te Jesucristo, jaʼ te Jolal yuʼun spisil te j-abatetik yuʼun Jehová sok jaʼ ya stʼunik te ejemplo yuʼun. Te jnopojel Lucas, jich la yal: «Te Jesús hahch yocliylan bahel te pueblohetic soc te tut pueblohetic, yac ta yalel te lec yachʼil cʼop scuenta te cuentahinel yuʼun Dios». ¿Bin la spasik te jnopojeletik kʼalal tikunotik bael ta scholel skʼop Dios? «La yocliyic spisil te tut pueblohetic ta spuquel te lec yachʼil cʼop» (Lucas 8:1; 9:2-6).

Jaʼnix jich te j-abatetik yuʼun Jehová ta kʼajkʼal ini, te winiketik sok antsetik, ya scholik skʼop Dios sok ya skʼotesik ta pasel te bin la yal te Jesús ta Mateo 24:14: «Ya me xpuhc ta halel ta swohlol bahlumilal scʼoblal te lec yachʼil cʼop yuʼun te cuentahinel yuʼun Dios, scuenta testigo-cʼop ta stojol spisil nacionetic, ha to me ya xtal a te slajibal cʼahcʼale».