AY BAYAL millón ta tul jchʼuunjeletik te ma spasik te kʼin yuʼun Navidad. ¿Yabal smel yoʼtanik yuʼun te ma spasike? ¿Aytobal bin ya snaʼulanik? ¿Yabal skuyik te yal snichʼnabik te ay bin tʼujbil ma yakalik ta spasele? Kiltik bin ya yalik chaʼoxtul testigoetik yuʼun Jehová te yanyantik slumalik.

Snaʼulanel te Jesús. «Te kʼalal mato x-ochon ta testigo yuʼun Jehová, baeltikto ya xboon ta iglesia. Jaʼnax ya xboon ta kʼin yuʼun Navidad sok Pascua, pero ma spisiluk ora. Ta kʼinetik ini maba la yakʼ te ya jnaʼulan te Jesuse. Te bitʼil ma jpasix te Navidad, ya jtsob jba cheb buelta ta semana sok te jcongregacione sok ya jnojptes te ants winiketik te bin ya yal te Biblia ta swenta te Jesuse». (EVE, AUSTRALIA).

Yakʼel majtanil. «Ya yakʼbon sbujtsʼ koʼtan te kʼalal ya yakʼbonik jmajtan te maba jmaliyoje. Jaʼnix jich ya jmulan spasel tarjetaetik sok dibujo yuʼun ya jkʼebanbey te yantike. Jich tseʼel yoʼtanik sok tseʼel koʼtan-euk». (REUBEN, IRLANDA DEL NORTE).

Skoltayel te machʼatik ayik ta wokol. «Tseʼel koʼtantik yuʼun te ya jpasbeytik sweʼelik te machʼatik ayik ta chamel. Jaʼnix jich, ay ya kichʼbeytik bael nichim o yan majtanil te ya xjuʼ te lek ya yaʼiy sbaik yuʼune. Jaʼ ini ya xjuʼ jpastik biluk ora». (EMILY, AUSTRALIA).

Ya stsob sbaik sok te sfamiliaik. «Kʼalal maba tenbil ya yaʼiy sbaik te familia yuʼun ya stsob sbaik, te alaletike ya xjuʼ snaʼbeyikxan sba ta lek te stajunab, te sprimotak, te schuchuʼ sok te smamuch. Ta swenta te maba kʼayemotik ta spasel te kʼinetik ini, te jfamiliatik ya snaʼik te ya kulaʼtaytik ta swenta skʼuxul koʼtantik, maba yuʼun sujbilotik». (WENDY, ISLAS CAIMÁN).

Stael lamal kʼinal. «Ta jujun Navidad bayal bin ya jpas-a, te maʼyuk jtiempo yuʼun ya jnop ta swenta te lamal kʼinal. Pero te bitʼil la jnopix te bin jamal ya yal te Biblia ta stojol te ants winiketike, yakʼojbon bayal lamal kʼinal. Melel ya jnaʼ te kalatak ya xbajt xkuxinik ta jun lekil Balumilal ta pajel chaʼbej». (SANDRA, ESPAÑA).