Ayinon ta Santo Domingo, te capital yuʼun te República Dominicana; chantul alnichʼanotik joʼon te xutilone. Te jmeʼ jtat ya snaʼik ta lek jun sok la skʼanik te leknax stalelik te machʼatik ya jokin jbatik soke. Chaneb jaʼbil te kʼalal mato x-ayinon-ae, te jmeʼ jtat la snaʼbeyik sba chaʼoxtul mormonetik te ayik ta misioneroil, leknax la yilik te bitʼil lek ya xkʼopojike sok leknax chapalik sok maʼyuk yabakulik. Maba kʼax bayal tiempo, te jfamilia och ta religión yuʼun te Iglesia de Jesucristo de los Santos de los Últimos Días, te jaʼnix jich naʼbil sba Iglesia yuʼun Mormón, jaʼik te machʼatik sbabial ochik ta religión-abi ta República Dominicana.

Spisil-ora koltaywanon ta swenta te bintik ya spas te Iglesiae, pero te binxan la jmulane jaʼ te ay skʼoplal ta yoʼtanik te lekuk ayik te familiaetike sok te lekub te jtaleltike. Mero jmulanoj-a te jreligion mormón sok la kakʼ ta koʼtan te ya jkʼan ya x-ochon ta misionero.

Te kʼalal tsʼakajix 18 jaʼbil kuʼun-ae, te joʼon sok te jfamilia bootik ta nainel ta Estados Unidos yuʼun ya skʼanik te ya x-ochon ta lekil universidad. Jun jaʼbil ta patil, te jtiotak te jaʼik testigoetik yuʼun Jehová tal yulaʼtayotik ta Florida la spasotik invitar ta jun mukʼul tsoblej te banti ya yalbeyik skʼoplal te Bibliae. Chajpnax la kil te spisil yakik ta sleel te versiculoetik ta sBibliaik sok te yakik ta stsʼibayel te bin yak ta albeyel skʼoplale, la jkʼayin-euk, jich yuʼun la jkʼan jwel jun sok jchʼix lapicero.

Te kʼalal laj te mukʼul tsobleje, te jtiotak la yalbonik te ya skʼan ya skoltayonik ta snopelxan ta lek te Biblia, melel snaʼojik te ya jkʼan ya x-ochon ta misionero. Lek la kaʼiy, melel jaʼ jnaʼojbeyxan skʼoplal te Libro yuʼun Mormón, ma jaʼuk te Bibliae.

Te kʼalal sujtik bael te jtiotake, la kalbeytikxan skʼoplal te Biblia pero ta teléfono. Spisil-ora la stijbonik koʼtan te yakuk jpaj sok te Biblia te bintik jchʼuuneje. Jaʼ la skʼanik te jtukelnix ya xkʼot ta koʼtan te smelelil kʼope.

Ay bayal te bintik jchʼuunej ta jreligion te jkuyoj te smelelil-ae, pero ma jnaʼoj teme yuʼun-nix jich ya yakʼ ta nopel-a te Bibliae. Te jtia la stikunbon tal te revista ¡Despertad! yuʼun 8 yuʼun noviembre yuʼun 1995, te jaʼ spasojik te testigoetik yuʼun Jehová, te yichʼoj cheb articuloetik te ya yalbey skʼoplal ta swenta te religión mormón. Chamnax koʼtan yuʼun te kʼalal la kil te ay bayal bintik ma jnaʼoj ta swenta te bin ya yakʼ ta nopel te jreligione, jich yuʼun ochon ta página ta Internet kuʼunkotik yuʼun la jkʼan kil teme smelelil te bin ya yal te revistae; yuʼun-nix smelelil-a te bin ya yal te revistae. La jtaxan pruebaetik te kʼalal bajt kil bayal museoetik ta swenta te mormonetik te ayik ta estado yuʼun Utah.

Spisil-ora jkuyoj te maba skontrainej sbaik te Biblia sok te bin ya yal te Libro yuʼun Mormón. Te kʼalal jajch jkʼoponxan ta lek te Bibliae, tey la kil-a te ma pajaluk te bin ya yalike. Jun ejemplo, jaʼ te bin ya yal te Biblia ta Ezequiel 18:4 ya yal te machʼa ya sle smul ya xlaj. Yan stukel te Libro yuʼun Mormón jich ya yal ta Alma 42:9 te ay la schʼulel te ants winiketik te maʼyuk bin-ora ya xlaje.

Ma jaʼuknax te bin ya yakʼik ta nopele, chajp la kaʼiy-a te bin-utʼil jaʼ baem ta yoʼtanik skoltaybeyel skʼoplal te snacionik te mormonetike. Jich bitʼil te ya skuyik te nichimal kʼinal Edén aylaj ta kʼinal te Jackson sbiil te ay ta Misuri, Estados Unidos. Yanxan, jaʼ te bin ya yalik te j-alwanejetik yuʼun te religión mormón, te kʼalal ya xmantalaj te Wentainel yuʼun te Diose, jaʼ ya xtuun te bin-utʼil ya xmantalaj te Estados Unidos, te bitʼil libre ya yakʼ te ants winiketik sok te pajaluk te derecho yuʼunike.

La jnop ta koʼtan te binwan ya xkʼot ta stojol te nación kuʼun —soknix te yantik nacionetik— te kʼalal jich ya xkʼot ta pasel-abi. Ta jun mal kʼajkʼal ay machʼa la skʼoponon tal ta teléfono te ya jnaʼbey sba te yak ta yichʼel nojptesel yuʼun ya x-och ta misionero, och jojkʼoybey te bin ya snop ta swenta te skoltaybeyel skʼoplal te nacionetike, jich la jojkʼoybey: «Te ayuk ta guerra te nación awuʼun sok yan nación, ¿yabal awakʼbey guerra te mormonetik te ayik ta nación abi?». Chamnax koʼtan yuʼun te kʼalal la yal te yake. La kilbeyxan skʼoplal te bintik ya yakʼ ta nopel te jreligione, jich yuʼun ay bintik la jojkʼoylanbey te jwolwanejetik yuʼun te religión te ichʼbilik ta mukʼe, la yalbonik te ma xjuʼ ta naʼbeyel sujtib te jojkʼoyeletik kuʼune sok te yatolaj sta yorail te ya jnaʼbey te sujtibe.

Chebaj koʼtan yuʼun te bin la yalbonik kaʼiye. Jajch jojkʼoybey jba bin yuʼun te ya jmulan te ya x-ochon ta misioneroe, jich la kil te jaʼnax ya jkʼan ya jkoltay te ants winiketik te ya xkʼax swokolike; jaʼnix jich la jmulan te jich ya kichʼ ichʼel ta mukʼ-euk te bin-utʼil ya yichʼik ichʼel ta mukʼ te misioneroetike. Sok la kil te maʼyuk bin bayal jnaʼoj ta swenta te Diose. Manchukme ay bayal buelta jkʼoponoj te textoetik yuʼun te Bibliae, maʼyuk bin-ora mukʼ skʼoplal la kil te bin ya yal te Bibliae. Jaʼnix jich ma jnaʼojuk-a bin-a te skʼanojel yoʼtan Dios ta stojol te Balumilal sok te ants winiketike.

Bayal bintik la jnop te kʼalal la jnop te Biblia sok te testigoetik yuʼun Jehová jich bitʼil ini: te bin sbiil te Diose, aybal banti xbootik te kʼalal ya xlajotike, te bin yaʼtel yichʼoj te Jesús ta skʼotesel ta spasel te skʼanojel yoʼtan te Diose... Teyto la jmulan–a te bin ya yal te tʼujbil libro ini sok ¡kʼaxto la jmulan yalbeyel te yantik te bintik smelelil yakon ta snopele! Schʼuunejnanix koʼtan-a te ay te Diose, pero ta ora ini jich ya kaʼiy te yakon ta kʼop sok te machʼa mero kamigoe. Ochon ta testigo yuʼun Jehová te kʼalal la kichʼ jaʼ ta 12 yuʼun julio yuʼun 2004, wakeb u ta patil och jchol te skʼop Dios ta tiempo completo.

Joʼeb jaʼbil aʼtejon te banti ya yichʼ ilel te aʼtelil yuʼun te stestigotak Jehová te ay ta Brooklyn, Nueva York. Jich la kil bitʼil mukʼul majtanil te koltaywanon ta spasel imprimir Bibliaetik sok yantikxan junetik te lokʼem skʼoplal ta Biblia yuʼun jich ya xkʼot ta stojol bayal millón ta tul ants winiketik te ayik ta swolol Balumilal. ¡Jtaoj bayal tseʼelil koʼtan te jayeb jaʼbil jkoltayej te ants winiketik ta snaʼbeyel sba te Diose!