Jojkʼoyeletik ta swenta te Biblia
¿Yabal xjuʼ ya jtatik perdón yuʼun te jmultike?
Ya xjuʼ ya jpastik te bin ya skʼanbotik te Diose
Te Biblia ya yal te jpisiltik jmulawilotik. Jaʼ la skʼasesbotik te mulil te Adán, jaʼ yuʼun ay ya jpastik te bin ma lek sok patil ma lek ya kaʼiy jbatik yuʼun. Te sNichʼan te Dios, te Jesucristo, laj yuʼun ya stoj te jmultike. Jich ya xjuʼ ya jtatik perdón. Te bitʼil la yakʼ skuxlejal te Jesús jaʼ jun majtanil te talem ta stojol Dios (kʼopona Romanos 3:23, 24).
Ay machʼatik te spasojik tulan mulil yaniwan sjojkʼoybey sbaik teme ya xpasbotik perdón yuʼun te Diose. Pero te Biblia ya yal te «ya spocbotic loqʼuel spisil jmultic te schʼichʼel Jesús» (1 Juan 1:7). Te Jehová ya spas perdón te tulan muliletik teme smelelil ya jsujtes koʼtantik (kʼopona Isaías 1:18).
¿Bin ya skʼan ya jpastik yuʼun ya spasbotik perdón te Diose?
Teme ya jkʼantik te ya spasbotik perdón te Jehovae, ya skʼan ya jnaʼbeytik sba: te ya xkʼot ta koʼtantik te bin yilel stalel, te tojobtesel ya yakʼ sok te mantaliletik yuʼune (Juan 17:3). Te Jehová ya spasbey perdón sok slekil yoʼtan te machʼatik ya sujtes yoʼtan yuʼun te smulik sok te ya spasik tulan yuʼun maba ya spasikix (kʼopona Hechos 3:19).
Ya xjuʼ ya jpastik te bin ya skʼanbotik te Diose. Ya xkʼot ta yoʼtan te chʼichʼbakʼetotike, lek yoʼtan sok ya snaʼ yoʼbolil jbatik. ¿Mabal yakuk stijbat awoʼtan yuʼun ya anaʼbeyxan skʼoplal bin-utʼil ya awakʼbey tseʼelil yoʼtan? (Kʼopona Salmo 103:13, 14).