Te kʼalal chʼinonto-ae ya jmulan spisil te bin ay ta lum kʼinal. Jteb ma spisil-ora ya xbootik ta paxial sok te jfamilia ta ban ay teʼtikil sok jaʼetik ta nopol jlumal te jaʼ Jyväskylä, te ay ta Finlandia. Jaʼnix jich ya jmulan ta bayal te chambalametike. ¡Kʼalal ya kil te tsʼiʼe te gatoe ya jkʼan jpet! Te kʼalal la jtaxan kaʼbilal, kaj mel koʼtan ta swenta te ya yichʼ utsʼinel te chambalametike, jaʼ yuʼun ochon ta jun organización te banti mukʼ skʼoplal ya yilik te chambalametike. Tey la jnaʼbey sba bayal ants winiketik te pajalnax snojpil yuʼunik te jich bitʼil te joʼone.

Ya jpastik campañaetik swenta skoltayel te chambalametike. Jaʼnix jich ya jpastik marchaetik sok ya kalbeytik skʼoplal-euk te tiendaetik te ya schonik te snujkʼulel chambalametike sok ya jpukbeytik skʼoplal bin yuʼun te maba lek te jich ya spasike. Ta patil la jpastik jun organización swenta ya skoltaybey skʼoplal te chambalametike. Ta swenta te bintik la jpastike bayal buelta la jtatik problema sok te j-aʼteletike. Jaʼ yuʼun bayal buelta la kichʼ otsesel ta cárcel sok la kichʼ ichʼel ta kʼop ta stojol juez.

Jaʼ yuʼun, ochon ta organizacionetik jich bitʼil te Amnistía Internacional sok Greenpeace sok jaʼ bajt koʼtan ta skoltayel. Jaʼnix jich la jkoltaylan te pobreetik sok te machʼatik maʼyuk sweʼelike.

Pero, kʼunkʼun la kil te ma xjuʼ kuʼun xchajpanel te problemaetike. Manchukme ya xchajpaj te chʼinike te mukʼul problemae ya xmukʼubxan bael. Jich yilel te bin chopol la yuʼuntay te balumilale sok te ants winiketike maʼyuk bin ya yichʼik ta wenta. Maʼyuk bin ya xjuʼ kuʼun spasel ya kaʼiy.

Jkʼaxel ya jmel koʼtan ta swenta te maʼyuk bin ya xjuʼ kuʼun spasele, jaʼ yuʼun kaj nopel ta swenta te Dios sok te Biblia. Manchukme ay jnopojix te Biblia sok te testigoetik yuʼun Jehová sok ya kalbey wokol yuʼun te slekil yoʼtanike, pero ta yorail-abi maba chapalon yuʼun ya jeltay te jkuxlejale. Pero ma jichuk la jpasix-a.

La jle te jBiblia sok jajch jkʼopon. Jich la kaʼiy te la spoxtaybon te ejchene. La jkʼopon bayal textoetik te banti ya yalbey skʼoplal te ya skʼan jkanantaytik te chambalametike. Jich bitʼil Proverbios 12:10 tey ya yal-a: «Te machʼa toj yoʼtan ya scanantay te schansbahlam». Kʼot ta koʼtan te ma jaʼuk smul Dios te problemaetik yuʼun te balumilale. Te problemaetike jaʼ ta swenta te ma schʼuunik te tojobtesel yuʼun te Jehová. Jaʼ la stijbon koʼtan te bayal kʼuxotik ta yoʼtan te Jehová sok ma x-ilin ta ora (Salmo 103:8-14).

La jtsʼibay te spat te libro ¿Bin ya yakʼ ta nopel ta smelelil te Biblia? te banti ya xjuʼ ta nojesel yuʼun ya kichʼtik nojptesel sok la kakʼ bael ta correo. Ta patil tal te Testigoetik yuʼun Jehová sok la yalbonik te ya xjuʼ snojptesonik ta swenta te Biblia. Oranax la jchʼuun. Jaʼnix jich jajchon ta bael ta tsoblej. Kʼunkʼun jajch ta chʼiel ta koʼtan te smelelil kʼope.

Wokolayal te Biblia, bayal bintik la jeltiklan ta jkuxlejal. La kijkitay ta snukʼel cigarro, te yakubel, la jel te bitʼil ya jlap te jkʼuʼ jpakʼe, te bitʼil ya xkʼopojon, jaʼnix jich te bitʼil ya kil te j-aʼteletike (Romanos 13:1). Jaʼnix jich la jeltay te bitʼil ya kil te spasel mulile, melel ta sjajchibal lek ya kil-a.

Te bin wokol la kaʼiy ta sjajchibale, jaʼ te ya kil te maba lek te bin ya spas te organizacionetike. Ma orauknax la jeltay te jtalele. Ta sjajchibale jich ya kaʼiy te maba lek te ya kijkitay te organizacione. Pero, kʼot ta koʼtan te bin-nax ya xjuʼ ya skoltay te ants winiketike jaʼ te Wentainel yuʼun te Diose, jaʼ yuʼun bajt ta koʼtan skoltayel te Wentainel yuʼun te Diose sok la kakʼ ta naʼel ta stojol te ants winiketike (Mateo 6:33).

Te kʼalal baem koʼtan ta xchajpanel-a te problemaetike cheb grupo ya kil-a te ants winiketike: te machʼatik lekike sok te machʼatik chopolike sok jkʼaxel ma lek ya kil te machʼatik chopol yoʼtanike. Ta ora ini, wokolayal te Biblia, ma jichukix ya jpas te ya xpʼajawanone ya jpas tulan yuʼun kʼux ta koʼtan spisil te ants winiketike (Mateo 5:44). Ya kakʼ ta ilel te skʼuxul koʼtan kʼalal ya jchol te Wentainel yuʼun te Diose. Ya yakʼbon stseʼelil koʼtan te kʼalal jich ya yichʼ pasel melel ya yakʼ lamal kʼinal sok stseʼelil oʼtanil, sok ya x-akʼbot smukʼul yoʼtan te ants winiketike.

Te bitʼil jaʼ smukʼulinej koʼtan te Jehová, jaʼ ya yakʼbon slamalil koʼtan-abi. Melel schʼuunej koʼtan te Jehová, maba ya yakʼ te yakuk yichʼ utsʼinel xan te ants winiketik sok te chambalametike sok ma xyakʼ jinuk ta jkʼaxel te balumilale. Ta swenta te Wentainel yuʼun te Diose, ya xbajt schajpan spisil te bin sjinoj te ants winiketike (Isaías 11:1-9). Tseʼel koʼtan, melel kʼoem ta koʼtan te smelelil kʼop te ay ta Bibliae, jaʼnix jich tseʼel koʼtan yuʼun te ya xjuʼ jkoltay te ants winiketik yuʼun ya yakʼ schʼuunel yoʼtanik ta stojol te Jehová. Maba ya jnopix te ya jkʼan jeltay te balumilale.