Chʼion ta Warialda (Nueva Gales del Sur). Ta chʼin lum ini, te ants winiketik ya stsʼunbajik, ya schʼitesik tuminchijetik sok wakaxetik. Maʼyuk bayal contaminación sok maʼyuk bayal utsʼinwanej.

Lajuntul alnichʼanotik, joʼon te bankilalon. Te kʼalal 13 kaʼbilal-a jajchon ta aʼtel swenta ya jkoltay te jfamiliae. Ochon ta aʼtel ta ranchoetik, melel maba laj kuʼun te escuela. Te kʼalal 15 kaʼbilal-a ya jpasix tulan aʼtelil-a sok ya jmansoubtes kʼajkʼal caballoetik.

Ya jmulan-a te banti ya x-aʼtejon sok te kaʼtele, ta ajkʼabaltik ya jujkan jba ta stsʼeel kʼajkʼ, ya kil moel te U, te ekʼetik sok ya kaʼiybey yikʼ te jaʼmaletik. Ya jnop ta koʼtan-a te ayniwan machʼa la spas spisil-abi. Pero, teynix ta kaʼtel bayal machʼatik ma lek stalelik. Te yantik j-aʼteletik ya yalik chopolkʼop sok ya snukʼik cigarro, jich jajch jnopbey te stalelike.

Te kʼalal ay 18 kaʼbilal-a boon ta nainel ta Sydney. Kʼan ochukon ta soldadoil, pero maba la yotsesonik ta skaj te maba jnopoj june. La jta kaʼtel tey-a sok jilon jun jaʼbil. Tey la jnaʼbeyik sba-a te testigoetik yuʼun Jehová. Te kʼalal la spasonik invitar ta tsoblejetik, boon sok ora la jnaʼ te jaʼik te smelelil religión.

Pero chaʼsujton ta rancho te banti ayon-ae. Kʼoon ta Goondiwindi (Queensland). La jta kaʼtel sok nujpunon, pero te bin ma lek la jpase jaʼ te jajchon ta yakubele.

La jtatik chaʼtul kal jnichʼnabtik. Te kʼalal ayinelikto-ae jajch jnop te bin-utʼil ya jelontes te jkuxlejale. Tey-abi, jul ta koʼtan te bin la kaʼiy ta tsoblej te kʼalal ayon ta Sydney-ae sok ay bin la jnop te ya skʼan ya jpase.

La jta te revista Te J-ilkʼinal ta toyol te banti tsʼibaybil tal te dirección yuʼun te sucursal yuʼun te testigoetik yuʼun Jehová ta Australia, jich yuʼun la jtsʼibay bael jun carta te banti la jkʼan te yakuk snojptesonike. Tey-abi, tal yulaʼtayon jtul Testigo te leknax yoʼtan sok ay yutsil yoʼtan jaʼ jajch snojpteson ta Biblia.

Te kʼalal la jnopxan te Biblia kʼot ta koʼtan te ya skʼan ya jelontes te jkuxlejal. Ay jun versículo te mero kʼot ta koʼtan jaʼ te 2 Corintios 7:1 te ya yalbotik te «acʼa jpoc jbahtic yuʼun spisil bintic bohloben ta jbaqʼuetaltic».

La jta ta nopel te ya kijkitay te yuchʼel trago sok te snukʼel cigarro. Maba kʼun la kaʼiy spasel, melel kʼax kʼayemonix-a. Pero jtaojix ta nopel-a te lek ya jtuuntes te jkuxlejal yuʼun lek ya yilon-a te Diose. Te bin bayal la skoltayon jaʼ te bin ya yal te Romanos 12:2, te jich ya yal: «Ma me xapajbeyic stalel te bahlumilal, yanuc awilelic ta scuenta yachʼubtesel te snopojibal awuʼunic». Kʼot ta koʼtan te ya skʼan ya jeltay te snopojibal kuʼun swenta ya xjuʼ ya kijkitay-a te trago sok te cigarro, sok te jichuk ya kil te bitʼil ya yil te Diose: te ya yutsʼin te jbakʼetaltike. Ta swenta te koltayel la yakʼbon te Dios juʼ kuʼun yijkitayel spisil-abi.

Te bin wokolxan la kaʼiy yijkitayel jaʼ te yalel bolkʼop. Jnaʼojix-a te bin ya yal te Biblia ta Efesios 4:29 te jich ya yal: «Ma me xlocʼ bohlcʼop ta awehic», manchukme jich-abi, wokol la kaʼiy yijkitayel. Te bin la skoltayon jaʼ te la jnopilan ta koʼtan te Isaías 40:26 te ya yalbey skʼoplal te ekʼetike, jich ya yal tey–a: «Toyahic mohel asitic, ilawilic: ¿machʼa la schicnajteslan spisil ini? ha te machʼa scholet ya sloqʼues te eqʼuetic yuʼun, ya yicʼticlan tal ta sbihil te jujune. Te bin utʼil cʼax mucʼ te yuʼel soc te cʼax bayel yip, hich mayuc junuc ya xchʼay». Jich yuʼun, teme bayal yuʼel te Dios ta spasel spisil te bintik ay ta chʼulchan —te ya jmulan yilel—, jaʼnix jich ya xjuʼ ya yakʼbon kip ta sjeltayel te jtalel yuʼun lek ya yilon-a. Te bitʼil bayal la jkʼanbey koltayel ta oración sok la jpas tulan, juʼ kuʼun yijkitayel te bolkʼope.

Te kʼalal aʼtejon ta rancho, maʼyuk bayal machʼatik ya jkʼopon-a, melel maʼyuk bayal ants winiketik tey-a. Pero, ta swenta te pʼijubtesel la kichʼ ta tsoblejetik yuʼun te testigoetik yuʼun Jehová, la jnop ta lek kʼop. Jaʼnix jich la jnop bin-utʼil ya jcholbey skʼoplal te lek yachʼil kʼop yuʼun te Wentainel yuʼun Dios (Mateo 6:9, 10; 24:14).

Mato ayuk bayal jaʼbil te la kichʼ kaʼtel bitʼil anciano ta congregación. Jaʼ mukʼul majtanil ya kil te ya xjuʼ ya jkoltay te kermanotake. Pero te mukʼulxan bendición jaʼ te ya xjuʼ ya x-abatinon ta stojol te Jehová sok te kinam sok te jnichʼnabe.

Ya kalbey bayal wokol te Jehová yuʼun te la yakʼ jnaʼbey sba manchukme maba jnopoj lek jun (Isaías 54:13). Mero melel te bin ya yal te Proverbios 10:22 te jich ya yal: «Te bendición yuʼun Jehová ya yacʼ cʼulejalil». Te joʼon sok te jfamilia ya jkʼan ya jnaʼbeytikxan sba ta lek te Jehová sok te ya x-abatinotik ta stojol ta sbajtelkʼinal.