Te maestro David Cunningham ta slibro Theological Studies, jich la yal: «Maʼyuk kʼoemotik ta jun acuerdo ta swenta teme yuʼun-nix ay sbiil-a te Diose sok teme aye, ma jnaʼtik bintik-a te sbiile».

Jaʼnix stukel te Dios jich la yal: «¡Hoʼon Jehovahon, ha me te jbihile!» (Isaías 42:8). Te Jehová jaʼ jun biilil hebreo te ya skʼan ya yal: «Jaʼ te Machʼa ya spas te bin ya skʼan yoʼtane» (Génesis 2:4).

Te Jehová ya skʼan te ya jtuuntesbeytik te sbiile. Te Biblia jich ya yal: «Cʼoponahic te sbihile; halbeya yaʼiyic te nacionetic bintic spasoj, pucahic bahel te mucʼ scʼoblal te sbihile» (Isaías 12:4).

Te Jesús la stuuntesbey te sbiil te Dios sok la snojptes-a te jnopojeletik yuʼune. Ta jun buelta jich la skʼopon te sTate: «La jcaʼbeyix snaʼic te abihile». ¿Bin yuʼun te jich la spase? Jich la yalxan: «Scuenta yuʼun te scʼuxul awoʼtan te ay ta jtojol ha nix hich ay ta stojolic, soc te junuc ayon soque» (Juan 17:26).

Te teólogo Walter Lowrie, jich la stsʼibay: «Te winik te ma snaʼ bin sbiil te Diose ma snaʼbey sba ta lek sok ma xjuʼ kʼux ta yoʼtan teme ma snaʼ bin yilel ta Diosil».

Jtul winik te Victor sbiil te ya xbajt ta jujun semana ta iglesia, pero te maʼyuk bin snaʼoj-a ta swenta te Diose, jich ya yal: «Kʼalal la jnop te sbiil te Dios te jaʼ Jehová, jich la kaʼiy te jaʼtonax sbabial buelta la jnaʼbey sba-a. Jich la jnaʼbeyix sba-a te Dios te kaʼiyojbey skʼoplale sok mero kuxul la kilix-a, teyto-abi la kamigoin».

Jaʼnix jich te Jehová ya xnoptsaj ta stojol te machʼatik ya yichʼik ta mukʼ o ya snopik te sbiile sok jich ya yal: «Hich ya jcʼuxultay te bin utʼil te tatil ya scʼuxultay te snichʼan te ya yacʼ sba ta aʼbatinel yuʼune» (Malaquías 3:16, 17). Jaʼnix jich te Dios ya yakʼbey bendición te machʼatik ya skʼoponik ta sbiile. Te Biblia jich ya yal: «Como spisil te machʼatic ya yalbeyic wocol ta scuenta sbihil te Cajwaltic [o te Jehová], ya me xcolic» (Romanos 10:13).