Te Catecismo de la iglesia católica, jich ya yal: «Te schʼulel te ants winiketik te ay smul ya xlajike oranax ya xbajtik ta infierno, tey ya xbajt kʼaxuk swokolik-a te ta pamal kʼajkʼ te ma xtʼupe». Jaʼnix jich ay chaʼoxtul jwolwanejetik yuʼun te religión ya yalik te infierno, jaʼ te banti namal yiloj sba sok Dios te jtul ants winike.

«Te machʼa ya sta smul, ha me ya xlaj» (Ezequiel 18:⁠4). Te machʼatik lajemik «mayuc bin ya snaʼic» (Eclesiastés 9:⁠5). Jich yuʼun teme kʼalal ya xlaj te ants winik jkʼaxel maʼyuk bin ya snaʼix-a, ¿bitʼil ay-a te ya xbajt kʼaxuk swokolik ta sbajtelkʼinal ta infierno?

Ta Biblia te kʼopil hebreo sok griego te ya yichʼ kʼasesel jich bitʼil «infierno» jaʼ ya yalbey skʼoplal te smukenal spisil te ants winiketik. Jich bitʼil kʼalal te Job la sta jun tulan chamele, jich la skʼopon te Diose: «Ayuk bin utʼil yac anacʼon ta stsobojibal te machʼatic chamenic» (Job 14:13). O jich bitʼil te ya skʼases te La Sagrada Biblia, de Guillermo Jünemann «Ta infierno». Te Job maba yuʼun ya skʼan ya bajt kʼaxuk swokol ta sbajtelkʼinal te ban namal ya yil sba sok te Diose, jaʼnax ya skʼan ya xkux yoʼtan ta mukenal.

Kʼalal ya kiltik te Dios jich bitʼil jun Dios te kʼax chopol yoʼtan ya xnamajotik bael ta stojol. Te Rocío te kuxinem ta México, jich ya yal: «Ta kalalilto la snojptesonik te ay infierno. Ma schʼuun koʼtan-a te ay lekil taleliletik yuʼun te Dios sok jxiʼoj-a. Jnopoj-a te spisil-ora ilinem sok te kʼax tulan yoʼtane».

Te bin ya yal te Biblia ta swenta te Dios sok te bin utʼil ayik te machʼa lajemike jelontesbot te bin snopoj-a te Rocío, jich ya schol: «Libre la kaʼiy jba, jich yaʼiyel te la kichʼ lokʼesbeyel jun mukʼul ijkatsil, melel la jnaʼ te kʼuxotik ta yoʼtan te Diose sok te ya skʼan te lek ya xkʼootik ta lokʼele sok la skoltayon yuʼun kʼux ya kaʼiy ta koʼtan-euk. Ta ora ini jich ya kil bitʼil jun tatil te ya skanantay sok skʼuxul yoʼtan te yal snichʼnab sok te jaʼ ya skʼan te ya jta jlekilaltike» (Isaías 41:13).

Bayal ants winiketik ay sreligionik ta skaj te ya xiik te ay infiernoe, pero te Dios ma skʼan te ya kichʼtik ta mukʼ ta skajnax xiwel. Jaʼnix te Jesús jich la yal: «Kʼux me xa awaʼiy ta awoʼtan te Jehová te Dios awuʼun» (Marcos 12:29, 30, TNM). Jaʼnix jich kʼalal ya xkʼot ta koʼtantik te Diose maba ya spas te bin ma stojiluke, ya xjuʼ ya smukʼulin koʼtantik te stojil te bin-utʼil ya xchajpanwan ta pajel chaʼbej. Jichnix te bitʼil Eliú te yamigo te Job, ya xjuʼ jich ya kaltik sok smukʼul koʼtantik: «¡Te Diose, jcʼaxel mayuc mulil ta scuenta, te Machʼa spisil ya xhuʼ yuʼun ma ba ya spas te bin ma stojiluc!» (Job 34:10).