Ay bayal ants winiketik wokol ya yaʼiyik te kʼux ta yoʼtanik te Dios, melel ya snopik te ma snaʼik bin yilele, te namal aye sok te ya x-utsʼinwane. Kiltik te bin ya yalik:

• «Manchukme ya jkʼanbey koltayel-a te Diose, jich ya kaʼiy te namal ay ta jtojole. Maba ya jnaʼbey sba ya kaʼiy sok jich ya kil te maʼyuk skʼuxul yoʼtane» (Marco, ta Italia).

• «Ya jkʼan ya x-abatinon ta stojol-a te Diose, pero jich ya kaʼiy te kʼax toyol aye. Jich jkuyoj-a te jaʼ jun Dios te kʼax chopol yoʼtan te jaʼnax ya sle bin-utʼil ya yakʼbotik castigo sok jnopoj-a te maʼyuk skʼuxul yoʼtane» (Rosa, ta Guatemala).

• «Te kʼalal chʼin achʼixonto-ae jnopoj-a te Dios jaʼnax ya yil te banti ya xchʼayotik yuʼun ya yakʼbotik castigo. Ta patil jajch jnop te jaʼ jun Dios te kʼax namal aye. Jaʼ pajal sok yaʼiyel te jun ajwalil te jaʼnax ya swentain te ants winiketik pero te maʼyuk skʼuxul yoʼtane» (Raimunda, ta Canadá).

¿Bin ya anop yuʼun-euk te jaʼate? ¿Yabal xjuʼ te kʼux ta koʼtantik te Diose? Ay bayalix tal jaʼbil te machʼatik schʼuunejik te Diose, spasojbey sbaik-euk te jojkʼoyeletik ini. Jich bitʼil ta namey jteb ma spisiluk te ants winiketik maba ya skʼoponik-a te Diose. ¿Bin yuʼun? Melel ya xiʼik. Te historiador Will Durant, jich la yal: «¿Bin-utʼil ya xjuʼ te jtul jmulawil ya yal wokol ta stojol te machʼa kʼax namal ay sok te xiʼbantik sbae?».

¿Bin yuʼun te jich ya snopik te ants winiketik ta stojol te Diose? ¿Bin ya yakʼ ta nopel ta smelelil te Bibliae? ¿Jaʼbal kʼux-xan ta koʼtantik-a teme ya jnaʼtik te bin smelelil ta swenta te Diose?