Ta jun buelta ta Jerusalén te Jesús la yalbey skʼoplal te Jehová, jich la yakʼ ta ilel te chaʼlam yoʼtanik te jwolwanejetik yuʼun te religión ta yorail-abi (Juan 8:12-30). Te bin la yale ya yakʼ kiltik te ya skʼan ya kiltik ta lek te bintik ya yakʼik ta nopel ta swenta te Diose, jaʼ yuʼun jich la yal: «Teme jun awoʼtanic ya xʼayinex ta stojol te jcʼope, mero jnopojelex cuʼun ya xcʼohex; soc ya me anaʼbeyic sba te smelelil cʼop, soc ha ya yaqʼuex ta libre te smelelil cʼope» (Juan 8:31, 32).

Kʼalal jich la yal te Jesús: «Teme jun awoʼtanic ya xʼayinex ta stojol te jcʼope» jaʼ yak ta yalel-a te bin ya skʼan ya jnaʼtik stojol swenta yuʼun ya jnaʼtik teme melel o maʼuk te bin ya jchʼuuntike. Kʼalal ay bin ya awichʼ albeyel ta swenta te Diose jojkʼoybeya aba ini, «¿Pajalbal sok te bin la yakʼ ta nopel te Jesús sok te bin ya yal te Bibliae?». Jich xa apas-euk te bin-utʼil la spasik te machʼatik la yaʼiybeyik skʼop te jpuk kʼop Pablo, kʼopona o nopa ta lek te aBiblia yuʼun ya awil-a teme smelelil te bin awichʼoj albeyele (Hechos 17:11).

Jaʼ jich la spasik te Marco, Rosa sok Raymunda te la kalbeytik tal skʼoplale, la snopik ta lek te Biblia sok te testigoetik yuʼun Jehová. ¿Bin la staik ta nopel?

Te Marco jich ya yal: «Te testigo te ya yakʼbotik nojptesel ya stuuntes te Biblia yuʼun ya sujtes-a te jojkʼoyeletik ay kuʼun sok te kiname. Kʼunkʼun chiʼ moel te skʼuxul koʼtantik ta stojol te Jehová sok lekubxan te jnujpuneltike».

Te Rosa jich ya yal: «Jnopoj-a te jaʼnax skʼop pʼijil winiketik te Biblia te ya skʼan ya scholik te bin yilel te Dios. Pero kʼalal kʼax bael te tiempo, la kil te la jtabey sujtib tey-a te jojkʼoyeletik te ay kuʼune. Ta ora ini kuxul ya kil te Jehovae. Jaʼ te machʼa ya xjuʼ ya smukʼulin koʼtan».

Te Raymunda jich ya yal: «La jkʼanbey te Dios te yakuk skoltayon yuʼun ya jnaʼbey sbae. Cheʼoxeb kʼajkʼal ta patil te jmamalal sok te joʼone jajch jnoptik te Bibliae sok la jnaʼtik te bin smelelil ta swenta te Jehovae. Kʼax tseʼel koʼtantik te kʼalal la jnaʼtik bin yilel stalel te Diose».

Te Biblia ma jaʼuknax ya yal te lotil te bin albil ta swenta te Diose, jaʼnix jich ya scholbey skʼoplal te tʼujbil taleliletik yuʼune. Jaʼnix jich ya skoltayotik ta snaʼel te bin yakʼbeyojotik te Diose (1 Corintios 2:12). ¿Bin yuʼun te ma ya akʼopon ta atukel te bin ya yal te Biblia ta swenta te Diose, te skʼanojel yoʼtan sok te bin ya yakʼ jmaliytik ta pajel chaʼbeje? Ya xjuʼ ya akʼopon ini sok yantikxan te bin mukʼik skʼoplal ta www.pr418.com/tzh baan te banti ya yal «Nojptesel ya yakʼ te Biblia> Jojkʼoyeletik ta swenta Biblia». Jaʼnix jich ya xjuʼ ya akʼan jun nojptesel yuʼun Biblia tey-a sok jtul testigo yuʼun Jehová. Teme jich ya apase yame awil te ya xjuʼ kʼux ya awaʼiy ta awoʼtan te Jehová.