Michelle: Bin xchi, Sofía. Lek te la jtaate.

Sofía: Jaʼnix jichon, tseʼel koʼtan yuʼun te ya kilate.

Michelle: Te slajibal buelta kʼopojotike la kalbeytik skʼoplal bin-utʼil ya yaʼiy sba Dios te kʼalal ya yil te ya xkʼax jwokoltike. * La awalbon te bayal buelta apasojbey aba te jojkʼoyel-abi te kʼalal la sta accidente te amamae. Aaa, ¿bin-utʼil ay te amamae?

Sofía: Ay kʼajkʼaleltik te lek ya yaʼiy sba sok ay yantik te maʼuke, pero ta ora ini lek ay.

Michelle: Tseʼel koʼtan yuʼun te lek aye. Wokolniwan ya kaʼiytik stael tseʼel oʼtanil kʼalal ya xkʼax jwokoltik.

Sofía: Melelnix-a, ay baeltik ya jojkʼoybey jba jayebxan tiempo ya xkʼax jwokoltik.

Michelle: Jichnix-a. Te slajibal buelta kʼopojotike yatoniwan xjul ta awoʼtan te la jojkʼoybat bin yuʼun maba slajinoj Dios te wokolile, melel ay yuʼel ta slajinel te yuʼunuk ya skʼane.

Sofía: Yak, yato xjul ta koʼtan.

Michelle: Ya jkʼan ya jchaʼkalbat cheʼoxebuk puntoetik te la kilbeytik skʼoplal te yan bueltae, ta patil ya jkʼan ya kakʼbat awil te bin ya yal te Bibliae.

Sofía: Lek ay.

Michelle: La jnopbeytik skʼoplal jtul j-abat yuʼun Dios ta namey te la sjojkʼoybey te Dios bin yuʼun maba slajinoj te wokolile, te Dios maba la yut ta swenta te jojkʼoyel la spase sok maba la yal te maʼyuk schʼuunel yoʼtane.

Sofía: Melel, maba jnaʼoj-a.

Michelle: Jaʼnix jich la jnoptik te ya yilay Jehová te ya xkʼaxotik ta wokole. Te Biblia ya yal te kʼalal la yilbey swokol te lum yuʼun ta namey kʼinal, la yal: «Ta spisil te swocolic, ha nix hich la yaʼiy wocol». * ¿Mabal jichuk te ya yakʼ smukʼul koʼtantik snaʼel te ya yaʼiy jwokoltik te Diose?

Sofía: Yak.

Michelle: Sok la jnoptik te bayal yuʼel te Diose, jaʼ yuʼun ya xjuʼ yuʼun slajinel te wokoliletik te bin-ora ya skʼane.

Sofía: Jaʼ te bin ma xkʼot ta koʼtane. ¿Bin yuʼun maba slajinoj Dios te wokolil teme ya xjuʼ yuʼun slajinele?

Michelle: Akʼa kiltik te Génesis, te jaʼ sbabial libro yuʼun te Biblia. ¿Aybal awaʼiyojbey skʼoplal te Adán, te Eva sok te sit teʼ te ma xjuʼ ta loʼele?

Sofía: Ay, la snojptesonik ta catecismo. Albotik yuʼun Dios te ay jtejkʼ teʼ te ma xjuʼ ya sloʼbeyik te site, pero maba la schʼuunbeyik te skʼope.

Michelle: Mero lek. Pero akʼa kiltik te bin kʼot ta pasel ta nailal, melel mero snitojbey sba skʼoplal sok te bitʼil ay jwokoltik ta ora ini. ¿Yabal akʼan ya akʼopon te bin ya yal te Génesis, capítulo 3, versículo 1 kʼalal ta 5?

Sofía: Yak, jich ya yal: «Te chan ha bayel xan spʼijil yuʼun loʼloywanej a te bin utʼil spisil yantic chambahlametic ta qʼuinal te pasticlambil yuʼun Dios. Hich la yalbe te antse: ¿Hich bal la yalbat te Diose: Ma me xaloʼbe sit spisil te teʼetic ayic ta tsʼumbil qʼuinal, xchi bal te Diose? xchi. Te ants la yalbe te chane: ya laj xhu, ya jloʼbecotic sit biluc teʼil ay ta tsʼumbil qʼuinal, ha nax te sit te teʼ ay ta yohlil te tsʼumbil qʼuinal la yalbotcotic te Diose: Ma me xaloʼbeyic sit stuquel, ma me xapicbeyic sit, scuenta yuʼun ma ba ya xchamex, xchi. Te chan hich la yalbe te antse: Ma ba ya xchamex yuʼun. Snaʼoj Dios te bin ora yac aloʼbeyic te sit ya me xjahm asitic, pajal soc Dios ya xcʼohex, ha te yac anaʼic te bin lec soc te bin ma lecuque».

Michelle: Wokolawal. Kilbeytik skʼoplal te versiculoetik ini. Ta sbabial ya yal te jkojt chan kʼopoj sok te Evae. Te Biblia ya yal te jaʼ te Pukuj o te Satanás te la stuuntes te chane. * Sok la sjojkʼoybey ta swenta te mantalil akʼbotik yuʼun Dios te manchuk ya sloʼik te sit teʼe. ¿Bin albotik yuʼun Dios te Adán sok te Eva te ya xkʼot ta stojolik teme ya xkʼaxuntayik te mantale?

Sofía: Jaʼ te ya xlajike.

Michelle: Jichnix-a. Te Pukuj ay bin la yal ta stojol te Diose. Ilawil te bin la yale: «Ma ba ya xchamex». ¡La yal te jaʼ jpaslot te Diose!

Sofía: Maʼyuk kaʼiyoj-abi.

Michelle: Te kʼalal la yal te jaʼ jpaslot te Diose, te Satanás ay bin la yal te jal ta naʼbeyel sujtib. ¿Yabal anaʼ bin yuʼun?

Sofía: Uum, ta smelelil, ma jnaʼ.

Michelle: Nopa awaʼiy te ya xtal kalbat te joʼon ayxan kip-a te bitʼil te jaʼate. ¿Binwan-utʼil ya awakʼ ta ilel te ma smeleliluk te bin ya kale?

Sofía: Jaʼniwan te ya jpajtik te kiptike.

Michelle: Melel. Yaniwan xjuʼ ya jletik te bin ale sok ya kiltik machʼa ta jchebaltik ya xjuʼ yuʼun skʼechel. Jich ya jnaʼtik machʼa ay yip.

Sofía: Melelnix-a.

Michelle: Pero, teme ya kal te jaʼ jpaslotate, yanix skʼoplal stukel-abi, ¿mabal jichuk?

Sofía: Melel.

Michelle: Ma pajaluk sok te kʼalal ya jpajtik te kiptike, melel ya xjuʼ ta ilel stukel.

Sofía: Melelnix-a.

Michelle: Jaʼnax ya yichʼ naʼel te maba jpaslotat teme ya awakʼ xkʼax te tiempo yuʼun ya yilik te yantik te bin yilel te atalele.

Sofía: Aaa, jich.

Michelle: Kiltik yan buelta te bin ya yal te Génesis. ¿Labal yal te Pukuj te jaʼ bayalxan yip-a te bitʼil te Diose?

Sofía: Maʼuk.

Michelle: Melel, te jichuke, ora la yakʼ ta ilel te Dios te jaʼ ayxan yip stukele. Pero te bin la yal te Satanás: jaʼ te jpaslot te Diose. Jich kʼoem te la yalbey te Eva: «Yak sloʼloybelat; joʼon yakon ta yalbelat te bin smelelil».

Sofía: Chajpnax ta aʼiyel-a.

Michelle: Te Dios kʼax pʼij sok ya snaʼ ta lek bin-utʼil ya xbajt sutbey skʼop te Pukuje, jich yuʼun la yakʼ kʼaxuk tiempo. Jich ya xchiknaj ta ilel machʼanix yak ta lot-a.

Sofía: Pero te kʼalal laj te Evae, jich chiknaj ta ilel te jaʼ smelelil te bin la yal te Diose, ¿mabal jichuk?

Michelle: Melelnix-a. Jaʼukmeto, te bin la yal te Satanase bayal bin smakojxan. Ilawil yan buelta te versículo 5. ¿Binxan albot yuʼun Pukuj te Evae?

Sofía: Teme yalaj sloʼbeyik sit te teʼe yalaj xjam sitik yuʼun.

Michelle: Melel, jaʼnix jich la yal te pajal-laj sok Dios ya xkʼotik te ya snaʼik te bin lek sok te bin ma lekuke. Jich la yal kʼoem te ma la yakʼbey te bintik lek te ants winiketik te Diose.

Sofía: Jich yaʼiyel.

Michelle: Jaʼ ini jaʼ yan mukʼul lotil te la yal ta stojol te Diose.

Sofía: ¿Binlaj-utʼil? Ma xkʼot ta koʼtan.

Michelle: Ilawil, te Pukuj la yalbey kʼoem te Eva sok te stsʼumbale te jaʼlaj lek ya xkuxinik-a teme maba ya yichʼik tojobtesel yuʼun te Diose. Te Jehovae snaʼoj-a te jaʼ lek te ya yakʼbey tiempo te Pukuj yuʼun jich ya yakʼ ta ilel te lotil te bin la yale. Jich yuʼun la yakʼbey swentain te balumilal junuk tiempo. Jaʼ yuʼun bayal wokolil ta ora ini, melel te machʼa swentainoj te balumilal ta ora ini jaʼ te Pukuje, ma jaʼuk te Diose. * Pero ay bin lek ya jkʼan ya kalbat.

Sofía: ¿Bin-a?

Michelle: Te Biblia ay bin tʼujbil ya yalbotik ta swenta te Diose. Ya yal te Jehová nopol ay ta jtojoltik te kʼalal ya xkʼax jwokoltike. Kiltik te bin la stsʼibay te ajwalil David ta Salmo 31:7. Bayal swokol kʼax ta stojol, pero ilawil te bin la yalbey te Diose. ¿Yabal akʼan ya akʼopon te versiculoe?

Sofía: Yak, jich ya yal: «Tseʼel coʼtan soc ay yutsil coʼtan yuʼun te scʼuxul awoʼtane, como la awilbon jwocol soc la anaʼbon swocol te jchʼuhlele».

Michelle: Manchukme bayal kʼax swokol te David, la sta smukʼul kʼinal yaʼiy kʼalal la snop te bin-utʼil te Jehová ya yil spisil te wokoliletik yak ta kʼaxel ta stojole. Jaxan te jaʼate, ¿yabal yakʼbat smukʼul awoʼtan snaʼel te ya yil spisil te Jehová te bintik kʼux ya kaʼiytik manchukme maba ya yilik stukel te yantike?

Sofía: Yak, ya yakʼbon smukʼul koʼtan.

Michelle: Jaʼnix jich te Biblia ya yal te maba ya yakʼix te ya xkʼax jwokoltik ta spisil-orae. Jaʼnix jich ya yalbotik te nopol ya xbajt slajinbey yaʼtel te Satanase sok te ya xbajt slajinbey skʼoplal te wokoliletik yakʼoje. Jich bitʼil te wokoliletik asitintayoj sok te amamae. ¿Yabal xjuʼ ya xchaʼtal kilat ta yan semana? Melel ya jkʼan ya kakʼbat awil bin yuʼun seguro ayotik te nopol ya xbajt slajinix Dios te wokolile. *

Sofía: Lek, lek ay.