Ayinon sok chʼion ta jun barrio te kʼax pobre ta stiʼil te Roma. Kʼax wokol te bin kʼax ta jkuxlejale. Maba la jnaʼbey sba te jmama sok maba lek la kil jba sok te jpapae. Jich kuxinon te bitʼil machʼatik ayik ta calle.

Kʼalal la jta 10 kaʼbilal, kajon ta elekʼ, kʼalal la stsak 12 anon lokʼel ta jna. Cheʼoxeb buelta, bajt slokʼeson tal cárcel te jpapae. Spisil-ora ya kut jba sok te ants winiketike sok maba lek te jtalele. Kʼalal la jta 14 la kijkitay te jnae. Boon ta kuxinel ta calle sok ya jtuuntes droga. Kʼalal ya x-och ajkʼabal ya jam junuk carro yuʼun ya x-ochon ta wayel tey-a sok te kʼalal ya sakub talel te kʼinale ya jle jaʼ yuʼun ya x-atinon.

La jnop ta lek te elekʼe sok bayal banti ya x-elkʼajon ay ya jpojbey sbolsaik te ants winiketik ta calle sok ya x-ochon ta elekʼ ta naetik ta ajkʼabal. Bayal machʼatik kaj snaʼbelonik jba jaʼ yuʼun la yikʼonik ta jun grupo yuʼun j-elekʼetik te mero naʼbilik sbae, ta swenta abi toyxan jkʼoplal sok ochon ta elekʼ ta bancoetik. Te joʼtake ya yichʼonik ta mukʼ ta swenta te ma xiwone. Spisil-ora jkuchoj te jpistolae; te kʼalal ya xwayon ya kakʼ ta yanil tsʼamjol. Te bin kʼayon ta spasele jaʼ te majtamba, droga, elekʼ, spasel mulil sok yalel chopol kʼop. Te policiaetike ya sleonik sok bayal buelta la stsakonik, jaʼnix jich bayal jaʼbil kuxinon ta calle sok ta cárcel.

Jun buelta te kʼalal lokʼon ta carcele, bajt kulaʼtay te jtiae. Maba jnaʼoj-a te Testigo yuʼun Jehová sok te chaʼtul primotake. La spasbonik invitar yuʼun ya xboon ta tsoblej sok la jchʼuun bael yuʼun ya kil bin ya spasik tey-a. Kʼalal kʼoon ta sNail Tsoblej, najkajon ta yochibalnax yuʼun ya kil machʼatik-a te ya x-ochike sok ya xlokʼ-ik sok kichʼoj-a te jpistolae.

Te tsoblej ini, la sjelbon te jkuxlejal. Sok la jnop, maʼwan ayon ta balumilal. Melel ya kil te tseʼel yoʼtan te ants winiketik sok lek yoʼtanik. Kʼalal ta ora ini, maba chʼayem ta koʼtan te slekil yoʼtan te Testigoetik yuʼun Jehová. ¡Jich la kaʼiy te kʼax namal te banti ayone!

La kakʼ ta koʼtan te ya xjajch jnop te Biblia sok te Testigoetik yuʼun Jehová. Kʼalal yakal kichʼbey-a te estudioe kʼunkʼun kaj kilbey te mukʼ skʼoplal te yakuk jeltay te jkuxlejale. La jchʼuun spasel te bin ya yal te Proverbios 13:20 jich ya yal: «Te machʼa ya sjoquin te machʼatic pʼij yoʼtanic, ha nix hich pʼij ya xcʼoht, yan te machʼa ya sjoquin te machʼatic ma snaʼic qʼuinal, ya me sta swocol». Kʼot ta koʼtan te maba lek te ya jokinix te joʼtake te chopol stalelike. Maba kʼunuk la kaʼiy spasel, pero ta swenta te la skoltayon te Jehová, juʼ kuʼun.

La jelontes ta jkʼaxel te jkuxinele. La jpas tulan yuʼun maba ya jnukʼix te cigarroe, ma jtuuntesix droga, la setʼ te jole, la jlokʼes te j-aretee sok maba la kalix te chopol kʼopetik. Jaʼ sbabial buelta te la kaʼiy te ya xjuʼ jkom te bin ya jpase.

Maʼyuk bin-ora la jkʼan snopel te june, jaʼ yuʼun kʼax wokol la kaʼiy te ya kakʼ koʼtan te snopel te Bibliae. Pero, kʼunkʼun kaj ta chʼiel te skʼuxul koʼtan ta stojol te Jehová sok ay bin jelon ta jtojol melel jajch ta kʼop te koʼtan ta swenta te bintik jpasoje. Bayal buelta te maba lek ya kaʼiy jbae ta swenta te bintik chopol jpasoje, sok ya jnop te maniwan ayuk bin-ora ya spasbon perdón te Jehová. Te kʼalal jich ya kaʼiy jbae, ya jkʼopon te Biblia te banti ya scholbey skʼoplal bitʼil te Jehová la spasbey perdón te David manchukme la spas tulan mulil, jaʼ ya yakʼbon smukʼul koʼtan-abi.—2 Samuel 11:1–12:13.

Te bin wokolxan la kaʼiy pasele jaʼ te scholel skʼop Dios ta nanatik. (Mateo 28:19, 20) ¡Ya jxiʼ te jaʼ ya jta ta kʼoponel te machʼa kutsʼinej ta nameye! Pero kʼunkʼun kaj ta chʼayel bael te xiwele. Sok kaj jmulanxan te ya xkʼopojon sok te ants winiketik ta swenta te jTatik ay ta chʼulchan, te bayal ya spasbotik perdón.

¡Te bitʼil ya jnaʼbey sba te Jehová jaʼ skoltayejon ta kuxlejal! Jteb ma spisil te machʼatik kamigotak ta nameye lajemikix o ayik ta cárcel, yan te joʼone tseʼel koʼtan sok ay bin lek ya jmaliy. Ya jpas tulan ta yakʼel ta ilel spekʼelil koʼtan sok ta schʼuunel mantal sok ya jnaʼ jkomel jba. Jaʼ yuʼun, lek ya kil jba sok te yantike. Nujpunemon sok tʼujbil ants te Carmen sbiile. Jun-nax ya jkoltaytik te ants winiketik yuʼun ya snopik te Bibliae.

Te ora ini ya x-aʼtejonix, ay baeltik te ya xboon ta aʼtel ta banco ta spasel limpieza, maba ya xboonix ta elekʼ.