Jtul tatil jich ya scholbey te snichʼan te aytonax ta siete yaʼbilal: «Ayix tal bayal jaʼbil te Dios la spas te chʼulchan sok te Balumilale sok te bintik chikanik ta ilele. Jaʼnix jich la spas te kʼajkʼale, te ue sok te ekʼetike». Te alale kaj ta snopel sok jich la sjojkʼoy: «Papá, ¿machʼa pasot-euk te Diose?».

Te tatile la yal: «Maʼyuk machʼa pasot yuʼun, stalelnanix kuxul stukel te Diose». Kʼalal jich ya x-albot, maʼyuk bin ya sjojkʼoyix-a. Pero, te kʼalal mukʼix-a, yato skʼanxan snaʼ. Ma xkʼot ta yoʼtan te stalelnanix ay-a te Diose. Sok jich ya yal «¿Bitʼil ay-abi? Melel spisil pastiklanbil te bintik aye». Jich yaʼiyel te ma stabey sujtib te bin ya skʼan ya snaʼe: ¿Bitʼil chiknaj te Diose?

¿Bin ya yal te Biblia ta swenta-abi? Jaʼ pajal sok te bin la yal te tatil te la kalbeytik skʼoplale. Te Moisés jich la yalbey te Jehová: «Te cʼalal ma to ayuc a te witsiltic, te cʼalal ma to ba pasbilic awuʼun a te lumqʼuinal soc te bahlumilal, stalel sbahtel qʼuinal haʼat Diosat atuquel» (Salmo 90:1, 2). Te j-alwanej Isaías jaʼnix jich la yal: «¿Ma bal anaʼojicuc, ma bal ayuc awaʼiyejic te Jehová, ha Dios te sbahtel qʼuinal ay, te la schicnajtes swohlol te bahlumilal?» (Isaías 40:28). Jaʼnix jich te Judas la stsʼibay te bitʼil te Dios stalel ay «ta sbahtel qʼuinal» (Judas 25).

Te versiculoetik la kiltikixe, ya yakʼ ta naʼel te jaʼ «Ajwalil te sbahtel qʼuinal ay», jich bitʼil la yalbey skʼoplal te jpuk-kʼop Pabloe (1 Timoteo 1:17). Ya skʼan ya yal-abi, te stalelnanix ay ta namey kʼinal sok sbajtelkʼinal ya x-ayin (Apocalipsis 1:8). Te Dios maʼyuk sjajchibal sok maʼyuk slajibal; jaʼ yuʼun maʼyuk machʼa pajal sok.

¿Bin yuʼun ma xkʼot ta koʼtantik ta lek te bin la kalbeytikix skʼoplale? Melel ma bayaluk tiempo ya xkuxinotik sok ma pajal ya kiltik te tiempo te bitʼil ya yil te Jehová. Jun ejemplo, te jmil jaʼbile te Jehová jich ya yil te bitʼil jun-nax kʼajkʼal, melel stalelnanix kuxul stukel-a (2 Pedro 3:8). Ya jpajaltaybeytik skʼoplal sok te kʼulube. Melel jaʼnax ya xkuxin 50 kʼajkʼal. ¿Yabal snaʼ bin yaʼiyel te ya xkuxinotik 70 u 80 jaʼbile? ¡Maniwan! Jaʼ jich pajal kʼoemotik sok te kʼulube, kʼalal ya jpajaltay jbatik sok te Jpaswanej kuʼuntike. Te bin ya jnaʼtik jtebnax teme ya jpajaltaytik sok te bin ya snaʼ te Jehová (Isaías 40:22; 55:8, 9). Jaʼ yuʼun stalelnanix-a te ay bin ma xkʼot ta koʼtantik ta swenta te Diose.

Manchukme ma xkʼot ta koʼtantik ta lek te bitʼil stalelnanix ay-a te Diose, chikan ta aʼiyel te yuʼun-nix jich-ae. Te ayuk machʼa pasot yuʼun te Diose, ya skʼan ya yal-abi te jaʼ te Jpaswaneje. Te skʼop te Dios ya yakʼ ta naʼel te jaʼ Jehová te machʼa la spas spisil te bintik aye (Apocalipsis 4:11). Ya jnaʼtik te ta sjajchibale maʼyuk bin ay ta chʼulchan sok ta balumilal (Génesis 1:1, 2). ¿Bin-utʼil chiknaj? Ya xkʼot ta koʼtantik-abi, te aynanix te machʼa la spas sok te kuxulnanix-a ta sjajchibalto, te kʼalal mato ayuk-a te sNichʼan sok te chʼul abatetike (Job 38:4, 7; Colosenses 1:15). Te kʼalal mato ayuk bin spasoj-a, stukel ay te Jehová. Maʼyuk machʼa pasot yuʼun, melel maʼyuk bin ay ta sjajchibal.

Te bitʼil kuxulotike sok te leknax chajpanbil te chʼulchan sok te balumilal ya yakʼ ta ilel te sbajtelkʼinal aynanix-a te Diose. Jaʼnax juʼ yakʼbeyel skuxlejal spisil te bintik kuxajtike (Job 33:4).