Julio: Ya jmulan ta lek te bitʼil ya xkʼopojotik ta swenta te Biblia, Ernesto. * ¿Yabal xjul ta awoʼtan te yan buelta ay bin la ajojkʼoybon ta swenta te Wentainel yuʼun te Diose? La awalbon te ya akʼan ya anaʼ bin yuʼun te testigoetik yuʼun Jehová ya xnojpteswanotik te jajch ta wentainwanej ta 1914.

Ernesto: Jichnix-a, jaʼ jich la jkʼopon ta jun revista awuʼunik, te Wentainel yuʼun te Diose jajch ta wentainwanej ta 1914, jaʼ yuʼun ay bin maba kʼot ta koʼtan. Te jaʼexe ya awalik te spisil te bin achʼuunejike lokʼem tal ta Biblia.

Julio: Melelnix-a, spisil.

Ernesto: Pero te joʼone jkʼoponojix spajkal te Bibliae, pero maʼyuk banti la jta te jaʼbil ini. Jaʼ yuʼun boon ta Internet sok la jle te jaʼbil «1914» ta jun Biblia ta Internet, pero maʼyuk bin la jta ta leel.

Julio: Kʼax lek te bin la apase, melel akʼoponoj spajkal te Bibliae, chikan ta ilel te bayal skʼoplal ta awoʼtan.

Ernesto: Jichnix-a, melel maʼyuk yan libro te pajal soke.

Julio: Jich ya jnop-euk. Te yanxan te bin lek apasoje jaʼ te ya atuuntes te Biblia yuʼun ya alebey sujtib te bin ma xkʼot ta awoʼtane. Jaʼ jich ya apas te bin ya yal te Biblia te ya skʼan ya jpastike jaʼ te yakuk jlexan jpʼijiltike. * ¡Kʼax lek te yakat ta spasel tulane!

Ernesto: Wokolawal Julio. Ya jkʼan ya jnopbeyxan skʼoplal. Jaʼ yuʼun ay bin la jtabey skʼoplal ta swenta te 1914 ta libro te yakotik ta skʼoponele . Ay bin la yal ta swenta jtejkʼ mukʼul teʼ te patil la yichʼ tsʼetel sok chaʼchʼixan, jaʼ jich la kaʼiy jtebuk-abi.

Julio: Jichnix-a, jaʼ te albilkʼop te ya jtatik ta capítulo 4 yuʼun te Daniel. Jaʼ ya yalbey skʼoplal te swayich te Nabucodonosor te ajwalil yuʼun Babilonia.

Ernesto: Jaʼ-abi. Bayal buelta la jkʼopon, pero ma xkʼot ta koʼtan bin-utʼil stsakojbey sba skʼoplal sok te Wentainel yuʼun te Dios o te 1914.

Julio: Ma xa amel awoʼtan, jaʼnix jich te j-alwanej Daniel te machʼa la stsʼibaye, ma kʼot ta yoʼtan-euk te bin la skʼan la yale.

Ernesto: ¿Melelbal?

Julio: Jich. Ilawil te bin la stsʼibay liʼ ta Daniel 12:8: «La jcaʼiy, pero maba la jnaʼbe scuentahil».

Ernesto: Aaa, manix jba jtukeluk-abi. Maba ya jmelix koʼtan yuʼun.

Julio: ¿Yabal anaʼ bin yuʼun te ma kʼot ta yoʼtan te Daniel?,elel mato jaʼuk yorail yuʼun Dios-a te ya yichʼ naʼbeyel swentaile. Pero ta ora ini jelonix. Ya xjuʼ ya xkʼotix ta koʼtantik te albilkʼopetik te la stsʼibay te Daniel.

Ernesto: ¿Jichlajbal?

Julio: Jich, te versículo 9 jich ya scholbey skʼoplal. Ilawil te bin ya yale: «Como spisil te cʼopetic ini macalix soc yichʼojic sello ha to cʼalal yorahil slajibal» Jich bitʼil ya yalik ini, te albilkʼopetik jaʼnax ya xjuʼ ta naʼbeyel swentail ta yorail te slajibal kʼajkʼale. Jaʼnix jich te pruebaetike ya yakʼ ta ilel te yakotikix ta kuxinel ta yorail-abi. Yame kilbeytik bael skʼoplal ta libro te yakotik ta skʼoponele. *

Ernesto: ¿Yabal xjuʼ ya acholbon kaʼiy te albilkʼope?

Julio: Lek ay.

Julio: Sbabial ya kilbeytik skʼoplal jtebuk te swayich te ajwalil Nabucodonosor sok ta patil ya kalbeytik skʼoplal te bin ya skʼan ya yale. ¿Lekbal ya awil?

Ernesto: Lek ay.

Julio: Te Nabucodonosor la swayichin jtejkʼ teʼ te kʼax mukʼ te ya xkʼot ta kʼalal chʼulchan. Ta xwayich la yaʼiy jtul chʼul-abat yuʼun Dios te ya yal ta mantal te yakuk yichʼ tsʼetel te teʼe. Te bin-nax la yichʼ ijkitayel jaʼ te yisim o slojpʼ sok te schumanteʼele. Ta patil kʼax bael «jukeb tiempo» te teʼe chaʼ chʼi. * Te albilkʼop ini jaʼ nail kʼot ta pasel ta stojol te Nabucodonosor. Jaʼ jun ajwalil-a te mero bayal yip, pajal sok te teʼ te ya xkʼot kʼalal ta chʼulchan. Pero jich kʼoem te la yichʼ tsʼetel sok maʼyuk bin juʼ yuʼun spasel «jukeb tiempo». ¿Yabal xjul ta awoʼtan bin ya skʼan ya yal-abi?

Ernesto: Mmm, ma xjul ta koʼtan.

Julio: Te Biblia ya yal te sojk sjol, jich ilel te jich kʼax jukeb jaʼbil yuʼun o «jukeb tiempo». Ya jnaʼtik stojol te lokʼ ta ajwalile, pero kʼalal kʼax te jukeb tiempoe, te ajwalile lekub sok la schaʼyichʼ te yaʼtel. *

Ernesto: Yak ta kʼoel ta koʼtan. Pero ¿bin-utʼil stsakojbey sba skʼoplal te Wentainel yuʼun te Dios sok te 1914?

Julio: Bueno, te bin ya skʼan ya jnaʼtik stojole jaʼ te cheb buelta kʼot ta pasel te albilkʼop ini. Te sbabiale jaʼ te kʼalal la yichʼ komel te yaʼtel te ajwalil Nabucodonosor. Te schebale jaʼ te kʼalal kom ta aʼtel te ajwalil yuʼun te Diose. Te schebal bin-utʼil kʼot ta pasel jaʼ snitojbey sba skʼoplal sok te Wentainel yuʼun te Diose.

Ernesto: Pero ¿bin-utʼil ya anaʼ teme cheb buelta kʼot ta pasele?

Julio: Melel jaʼnix te albilkʼop ya yalbotik. Te Daniel 4:17 ya yal te albilkʼop ini ya yichʼ akʼel yuʼun te ants winiketik ya snaʼik stojol «te Dios te mero toyol ay scuentahinej te ban cʼalal scuentahinej te winiquetique, ya yaʼbe te machʼa ya scʼan ya yaʼbe». ¿Labal awil te kʼopil «te ban cʼalal scuentahinej te winiquetique»?

Ernesto: Laj, liʼ ya yal ini te machʼa «Mero toyol ay scuentahinej te ban cʼalal scuentahinej te winiquetique».

Julio: ¿Machʼa ya awal-euk «te Mero toyol aye»?

Ernesto: Jaʼ te Diose, ¿mabal jichuk?

Julio: Jaʼ jich, te kʼopil ini ya yakʼ ta ilel te albilkʼope ma jaʼuknax ya yalbey skʼoplal te Nabucodonosor. Jaʼnix jich ya yalbey skʼoplal te machʼa «scuentahinej te ants winiketik» o ya xjuʼ ya kaltik te Wentainel yuʼun Dios ta stojol te ants winiketike. Teme ya kiltikxan te yantik versiculoetik yuʼun te albilkʼop ini, yame xkʼotxan ta lek ta awoʼtan.

Ernesto: Lek ay, chola kaʼiytik

Julio: Te libro yuʼun Daniel ay bintik te bayal buelta ya yalulanbey skʼoplal, jaʼ te bitʼil ya x-och ta aʼtel te Wentainel yuʼun Dios te banti jaʼ mukʼ yaʼtel te Jesuse. ¿Lekbal ya awil teme ya kiltik jun ejemplo ta Daniel 2:44?. Kʼopona awokoluk.

Ernesto: Jichuk jich ya yal: «Te yorahil te ajwaliletic ini te Dios ta chʼulchan ya me shach jchahp ban cʼalal ya scuentahin jtuhl ajwalil te mayuc bin ora ya xlaj, soc ma ba ya xʼacʼot hilel ta scʼab yan nación; ha ya swuyticlan soc ya slajinlan spisil te jchahp ban cʼalal scuentahinejic te ajwaliletic ini, pero sbahtel qʼuinal ya xhil stuquel».

Julio: Lek ay. Te versículo ini ¿jaʼbal yak ta yalbeyel skʼoplal te Wentainel yuʼun te Diose?

Ernesto: Ma jnaʼ.

Julio: Te versículo ya yal te wentainel «sbahtel qʼuinal ya xhil stuquel». ¿Aybal machʼa ya xjuʼ ya xjalaj ta sbajtel kʼinal te Wentainel yuʼun jich bitʼil te Diose?

Ernesto: Maʼyuk.

Julio: Melelnix-a. Kiltikxan yan albilkʼop te ya yalbey skʼoplal te Wentainel yuʼun Dios ta Daniel 7:​13, 14 te ya yalbey skʼoplal jtul ajwalil, ilawil te bin ya yale: «Aʼbot yaʼtel ta cuentahinwanej, aʼbot yutsilal soc te banti ya xcuentahinwan, scuenta yuʼun spisil pueblohetic, nacionetic soc cʼopiletic ya yacʼ sbahic ta aʼbatinel yuʼun; sbahtel qʼuinal te yaʼtel ta cuentahinwanej, mayuc bin ora ya xcʼax bahel; soc te banti ya xcuentahinwan mayuc bin ora ya yichʼ jinel» Ta versiculoetik ini ay bin ya jtatik te la kalbeytikix skʼoplal ta nail tal.

Ernesto: Jich, jaʼ ya yalbey skʼoplal te wentainel.

Julio: Melelnix-a sok ma biluknax ajwalil. Ya yal te aylaj yaʼtel ta stojol «spisil puebloetic, nacionetic soc cʼopiletik». O ya xjuʼ ya kaltik te ya swentain swolol te Balumilale.

Ernesto: Maʼyuk kiloj-a, pero melel te bin ya awale. Tey ya yalbey skʼoplal-a.

Julio: Ilawil yan buelta te bin ya yal liʼ ini: «Sbahtel qʼuinal te yaʼtel ta cuentahinwanej, mayuc bin ora ya xcʼax bahel; sok te banti ya xcuentahinwan mayuc bin ora ya yichʼ jinel». ¿Mabal jichuk te versículo ini jaʼ pajal sok te Daniel 2:44 te lajeltonax jkʼoponbeltike?

Ernesto: Jichnix-a, pajal sok.

Julio: Lek ay, ta ora ini kilbeytik skʼoplal te bin swentail te albilkʼop te ay ta capítulo 4 yuʼun te Daniel, jaʼ te ya yakʼbey snaʼ te ants winiketik «te Dios te Mero toyol ay scuentahinel te ban cʼalal scuentanhinej te winiquetique». Te albilkʼop ini ya yakʼ ta ilel te kʼot ta pasel ta stojol te machʼa jaʼ mukʼxan yaʼtel te bitʼil te Nabucodonosor. Jaʼnix jich ta spisil te libro yuʼun Daniel ya jtatik albilkʼopetik te pajal bin ya yalbey skʼoplal ta swenta te Wentainel yuʼun Dios te jaʼ ya xwentainwan s te Jesús. Spisil ini ya yakʼ ta ilel te albilkʼopetik ta capítulo 4 yuʼun te Daniel jaʼ ya yalbey skʼoplal te Wentainel yuʼun te Diose, ¿mabal jichuk ya awil?

Ernesto: Jich, chikan ta aʼiyel. Pero ma xkʼot ta koʼtan bin-utʼil stsakojbey skʼoplal sok te 1914.

Julio: Bueno, la kaltik te sbabial bin-utʼil kʼot ta pasel te albilkʼop te ajwalil Nabucodonosor jaʼ te teʼe. Te wentainel yuʼun la yichʼ kombeyel skʼoplal kʼalal la yichʼ tsʼetel te teʼ sok kʼax jukeb jaʼbil. Sojk sjol te Nabucodonosor pero kʼalal kʼax te tiempo la schaʼnaʼ kʼinal sok och ta ajwalil yan buelta. Te schebal te bin-utʼil kʼot ta pasele, te wentainel yuʼun te Diose la yichʼ komel, pero ma yuʼunuk ay bin ma lek la spas te Diose.

Ernesto: ¿Bin-utʼil ay? ma xkʼot ta koʼtan.

Julio: Te Biblia ya yal te ajwaliletik ta Israel ya xnajkajik «ta huctajibal yuʼun Jehová». * Jaʼ ini ya skʼan ya yal te jaʼ akʼbil yaʼtelik yuʼun te Diose. Te wentainel yuʼunike jaʼ ya skʼan ya yal te wentainel yuʼun te Jehová. Pero ta patil bael jteb ma spisiluk te ajwaliletik la yijkitayik te Jehová jaʼnix jich te lum la skʼaxuntay kʼop-euk. Ta swenta-abi, te Dios la yakʼbey permiso te Babilonia te yakuk yochintay te Jerusalén ta jaʼbil 607 te kʼalal mato talem-a te Cristo. Ta jaʼbil-abi maʼyukix ajwaliletik-a te akʼbilik yaʼtelik yuʼun te Jehová ta Jerusalén. Jaʼ yuʼun ya xjuʼ ya kaltik te wentainel yuʼun te Dios, kejchaj ta aʼtel. ¿Yakbal ta kʼoel ta awoʼtan?

Ernesto: Yak, yak ta kʼoel ta koʼtan.

Julio: Te jukeb tiempo jajch ta ajtayel ta jaʼbil 607 te kʼalal mato talem-a te Cristo. Jaʼ te tiempo te kʼalal kejchaj ta aʼtel te wentainel yuʼun te Diose. Te kʼalal laj te tiempo-abi, te Dios la yotses jtul ajwalil, pero ta chʼulchan. Te yantik albilkʼopetik te la jkʼopontik ta sjun Daniel kʼotik ta pasel ta slajibal te jukeb tiempo. Pero ¿bin-ora laj ta ajtayel te jukeb tiempoe? Teme ya jtabeytik te sujtibe, jichme ya jnaʼtik bin-ora jajch ta aʼtel yan buelta te Wentainel yuʼun te Diose.

Ernesto: ¿Jaʼbal ta 1914?

Julio: Jich Ernesto.

Ernesto: Pero ¿bin-utʼil ya jnaʼtik teme jaʼ ta 1914?

Julio: Bueno, kʼalal te Jesús xtaluk liʼ ta Balumilal, la yal te matoba lajem-a te jukeb tiempoe. * Jaʼ yuʼun ya skʼan ya yal te jaʼlaj te tiempo-abi. Te jukeb tiempoe jajch ta ajtayel bayal jaʼbil ta nail te kʼalal mato xtal-a te Jesuse sok kʼalal mo bael ta chʼulchan jalajtoxan bayal jaʼbil. Jaʼnix jich julukme ta awoʼtan te la kaltik albilkʼopetik ta sjun Daniel maba ya xkʼot ta oʼtanil «ha to cʼalal yorahil slajibal». * Pero ta siglo 19 ay jtsob ants winiketik te ya snopik te Biblia la skʼan la snaʼbeyik swentail te albilkʼop ini sok yantikxan albilkʼopetik. Kʼunkʼun kʼot ta yoʼtanik te jukeb tiempo ya xlaj ta ajtayel ta 1914. Te bin yak ta kʼaxel ta balumilal jaʼto tal ta jaʼbil-abi ya yakʼ ta ilel te jajch ta aʼtel te Wentainel yuʼun Dios ta chʼulchan sok te jajch te slajibal kʼajkʼal. Ya jnaʼ te maniwan orauk ya xkʼot ta awoʼtan spisil ini, Ernesto.

Ernesto: Maniwan, pero ya Jchaʼkʼopon yan buelta yuʼun ya xkʼot ta koʼtan.

Julio: Melelnix-a. Jaʼnix jich te joʼone wokol akʼot ta koʼtan. Pero lajniwan awil te spisil te bin ya yal te testigoetik yuʼun Jehová ta swenta te Wentainel yuʼun Dios lokʼem tal ta Biblia.

Ernesto: Melelnix-a. Ya kil te spisil te bin ya awalike lokʼem tal ta Biblia.

Julio: Jaʼnix jich ya kil te ya smukʼulin awoʼtan te Bibliae. Jich bitʼil la kalbate, wokolniwan ya xkʼot ta awoʼtan sok ayniwan jojkʼoyeletik awuʼun. Jich bitʼil la kaltike te jukeb tiempoe jajch ta jaʼbil 607 te kʼalal mato talem–a te Cristoe, jaʼnix jich la kaltik te snitojbey sba skʼoplal sok te Wentainel yuʼun te Diose. Pero, ¿bin yuʼun te ya kaltik te laj ta ajtayel ta 1914? *

Ernesto: Aaa, jaʼ te bin mato xkʼot ta koʼtane.

Julio: Te Biblia ya skoltayotik ta snaʼel te jayeb jaʼbil jaʼlaj te jukeb tiempoe. ¿Yabal amulan te ya kalbeytik skʼoplal ta yan buelta-abi? *

Ernesto: Lek ay. Ya jmaliyat.