Jich bitʼil la kiltik ta yan artículo, te Jesús jaʼ bajt ta yoʼtan «Yalel te lec yachʼil cʼop scuenta te cuentahinel yuʼun Dios» (Lucas 8:1). Bayal la spas tulan, sok been ta spamal skʼinal Israel yuʼun ya yakʼbey snaʼ te ants winiketik ta swenta te Ajwalil ini. Jaʼnix jich tey ta schanebal evangelio tey la yichʼ tsʼibayel-a te bintik la spase, kʼaxem ta 100 buelta la yalbey skʼoplal te Wentainel, jteb ma spisil jaʼ la yalbey skʼoplal te Jesús. Pero jaʼnaxme jun prueba te bintik la yalbey skʼoplal ta swenta ini (Juan 21:25).

¿Bin yuʼun te mukʼ skʼoplal ta yoʼtan te Wentainele? Melel tsabil yuʼun Dios yuʼun jaʼ Ajwalil ya xkʼot ta Wentainel ini (Isaías 9:6; Lucas 22:28-30). Pero ma jaʼuk la skʼan yuʼun te mukʼ skʼoplal ya xkʼot sok te bayal yuʼele (Mateo 11:29; Mar. 10:17, 18). Ayxan yan swentail te bin yuʼun mukʼ skʼoplal ta yoʼtan yalbeyel skʼoplal te Wentainele *. Snaʼoj-a sok ya snaʼ te Wentainel ini ya xbajt spas bintik lek ta stojol te machʼatik kʼux ta yoʼtane, jaʼ te sTat sok te jnopojeletik yuʼun.

Te Jesús kʼux ta yoʼtan te sTat sok spisil yoʼtan (Proverbios 8:30; Juan 14:31). Ya smulanbey te lekil taleliletik yuʼun, jich bitʼil te kʼuxul oʼtanil, te ya snaʼ yoʼbolil jbatik, sok te ya spas te bin toj (Deuteronomio 32:4; Isaías 49:15; 1 Juan 4:8). Jaʼ yuʼun, ya yilay te bayal te lotiletik yalojik ta stojol, jich bitʼil yalojik te ma xyichʼbey ta wenta te swokolik te ants winiketik o te binxan ya yalike, jaʼlaj te machʼa ya yakʼ te wokolile. Jaʼ jun swentail te bin yuʼun te Jesús la spas tulan ta yakʼel ta naʼel «te lec yachʼil cʼop yuʼun te cuentahinel yuʼun Dios», melel te Wentainel ini jaʼ ya xbajt slekubtesbey skʼoplal te sbiil te sTate (Mateo 4:23; 6:9, 10). Pero ¿bin utʼil ya xbajt spas?

Jaʼ te ya slajin te bintik ya yutsʼinbey skuxlejal te ants winiketik, ta swenta te Wentainel te Jehová yame skustiklanbey yaʼlel sit te ants winiketik. Ya slajin te bintik ya yakʼbotik jmel koʼtantik, sok «mayuquix lajel, mel-oʼtan, oqʼuel o te bin cʼux, como cʼaxix spisil te bintic ay ta nahil to» (Apocalipsis 21:3, 4). Wokolayal te Wentainel yuʼun Dios te ants winiketik maba ya xwoklajikix ta sbajtel kʼinal. *

¡Ma chajp ya kaʼiytik te Jesús ya skʼan ya yakʼ ta naʼel te Wentainel! Melel te ajwalil ini ya yakʼ ta ilel te ya snaʼ yoʼbolil jbatik te Dios, te sTat te Jesús te bayal yuʼele (Santiago 5:11). Pero te Wentainel ma jaʼuknax ya spas te bin lek ta stojol te Dios, jaʼnix jich ta stojol te ants winiketik te kʼux ta yoʼtan te Jesús, jaʼ te jnopojeletik yuʼun.

Kʼalal mato talem-a te Jesús ta balumilal, bayal jaʼbil kuxin ta chʼulchan sok te sTate. La skoltay ta spasel spisil te bintik aye, sok te galaxiaetik te ay ta sjamalul te chʼulchan, te tʼujbil balumilal sok te bintik kuxajtik tey-a (Colosenses 1:15, 16). Pero, ta spisil te bintik pastiklanbile, te Jesús jaʼ kʼux-xan ta yoʼtan te ants winiketike (Proverbios 8:31).

Jaʼ te skʼuxul yoʼtan te tijbot yoʼtan yuʼun ya schol te skʼop Dios. Ta nailalto, la yal te xtaluk ta balumilal ta «yalel te lec yachʼil cʼop ta stojol te pobrehetique» (Lucas 4:18). Te Jesús ma jaʼuknax la yal, jaʼnix jich la spas. Jun ejemplo, jaʼ te kʼalal te ants winiketik la stsob sbaik ta schʼambeyel yaʼiy te skʼope sok la yil bayal ants winiketik «stsʼujet ta yoʼtan la yaʼiy, hich la slecubteslan te jayeb jchameletic tey ayic a» (Mateo 14:14). Ta yan buelta jtul winik te tsakbil ta kʼaʼel chamel jich albot te Jesús: «Te yacuc acʼan, ya xhuʼ yac alecubteson», ta swenta skʼuxul yoʼtan sok te la snaʼbey yoʼbolil sba, jich la yalbey: «Ya jcʼan, lecubtesbilatix ya xcʼohat», jich te Jesús la slekubtes (Lucas 5:12, 13). Sok-euk kʼalal la yil te María te jaʼ yamiga te yak ta okʼel ta skaj te cham te yermano Lázaro, «la spichʼ sba yoʼtan, la smel yoʼtan yuʼun» sok «ocʼ te Jesús» (Juan 11:32-36). Jich ay bin mukʼ skʼoplal la spas: manchukme kʼaxemix chaneb kʼajkʼal te chamen-a te Lázaro, la chaʼkuxajtes (Juan 11:38-44).

Te Jesús snaʼoj te maba ya xjalaj te milagroetik la spase. Melel te ants winiketik te la spoxtay, te la schaʼkuxajtes, ya xchaʼtsakotik ta chamel sok ya xchaʼlajik. Pero snaʼoj te bin ya spas te Wentainel ya xjalaj ta sbajtel kʼinal. Jaʼ yuʼun ma jaʼuk bajt ta yoʼtan spasel milagroetik, melel jaʼ la yaʼtelin scholel «te lec yachʼil cʼop yuʼun te cuentahinel» (Mateo 9:35). Te milagroetik la spase, jaʼnax jun prueba te bin ya skʼotes ta pasel te Wentainel yuʼun Dios ta swolol balumilal, ¿bin ya xkʼot ta pasel? Te Biblia ya yakʼbotik sujtib.

• Ya xlaj skʼoplal te chameletik.

  «Jich ya xjahm sit te tsʼoʼsitetik soc ya xjahm schiquinic te cohquetique. Jich ya xwihl te coxoʼ te bin utʼil haʼmal chij, soc te yacʼ umaʼ ya xʼawon yuʼun yutsil qʼuinal ya yaʼiy». Jaʼnix jich, «mayuc machʼa te nahinem ta Sión [o ta nichimal kʼinal] te hich ya yal: Ayon ta chamel» (Isaías 33:24; 35:5, 6).

• Ya xlaj te lajel.

  «Te machʼatic toj yoʼtanic ya me yichʼic hilel te qʼuinale, sbahtel qʼuinal ya xnahinic tey a» (Salmos 37:29).

  «[Te Dios] ya me slajin scuenta sbahtel qʼuinal te lajele, te cajwaltic Jehová ya scusticlambe yaʼlel sitic ta spisilic» (Isaías 25:8).

• Te machʼatik chamenik ya xchaʼkuxajik.

  «Spisil machʼatic ayic ta muquenal ya me yaʼiybeyic scʼop soc ya me xloqʼuic talel» (Juan 5:28, 29).

  «Ay chaʼcuxajel» (Hech. 24:15).

• Spisil ants winiketik ya xbajt ayinuk snaik sok yaʼtelik.

  «Ya spasic nahetic soc ya xnahinic tey a, ya stsʼunic tsʼusubiltic soc ya sloʼbeyic sit. Ma ba ya spasic nahetik te yan machʼatic ya xnahinic tey a, soc ma ba ya yaʼiy tsʼumbajel te yan machʼa ya sweʼ ya me yaʼiybe yutsilal te yaʼtel scʼabique» (Isaías 65:21, 22).

• Ya xlaj skʼoplal te guerra.

  «[Te Dios] jcʼaxel ya yacʼ quehchajuc guerrahetic cʼalal ta stiʼil bahlumilal» (Salmos 46:9).

  «Mayuc nación ya shach espada ta scontrahinel yan nación, soc ma ba ya schahpanix sbahic ta yaqʼuel guerra» (Isaías 2:4).

• Spisilik ya x-ayin sweʼelik.

  «Ya me yacʼ sit te bin ya xcol ta qʼuinal; ya me yaʼbotic bendición te Diose, ha te Dios cuʼuntique» (Salmos 67:6).

  «Ayuc me bayel trigo [o weʼelil] ta lum qʼuinal, ta baba witsetic» (Salmos 72:16).

• Ya xlaj te pobreil.

  «Ma xchʼayot ta oʼtanil te pobrehetique» (Salmos 9:18).

  «Ya me scoltay te pobre te ya xʼawon soc te machʼa ay swocol te mayuc machʼa ya xcoltayot yuʼune. Ya me snaʼbe yoʼbolil sbahic te pobre soc te machʼa mayuc bin ay yuʼun; soc ya me scoltaybe scuxlejalic te pobrehetique» (Salmos 72:12, 13).

Te bitʼil la kiltikix te bendicionetik ini, ¿yabal xkʼot ta awoʼtan te bin yuʼun mukʼ skʼoplal ta yoʼtan Jesús te Wentainel yuʼun te Diose? Te Jesús la yalbey skʼoplal te Wentainel ta stojol te ants winiketik te machʼatik jich ya skʼan ya yaʼiyike, melel snaʼoj te jaʼnax ya xjuʼ yuʼun schajpanel te wokoliletik.

¿Yabal amulan te bin ya sjap te Diose? Teme jiche, ¿bin utʼil ya xjuʼ ya anopxan ta swenta te Wentainele? ¿Bin ya skʼan ya apas yuʼun ya amulambey yutsilal te bendicionetik ini? Te yan artículo ya yakʼbey sujtib.