Julio: Bin xchi Ernesto, tseʼel koʼtan te ya kilat ta yan bueltae. Mero ya jmulan te ya xtal kakʼbat awil te bin ya yal te Biblia ta jujun semana. * ¿Bin awilel?

Ernesto: Lek ayon, wokolawal.

Julio: ¡Mero lek! Ta slajibal buelta te kʼopojotike, la kiltik bin yuʼun te testigoetik yuʼun Jehová ya kaltik te jajch ta aʼtel te Wentainel yuʼun Dios ta 1914. * Sok ta capítulo 4 yuʼun te libro yuʼun Daniel la kiltik bin yuʼun te jich ya kaltike. ¿Yatobal xjul ta awoʼtan te bintik-ae?

Ernesto: Yak, jaʼ te swayich te ajwalil Nabucodonosor.

Julio: Jichnix-a. Te ajwalil ini la swayichin jtejkʼ teʼ te kʼot kʼalal ta chʼulchan sok la yaʼiy jtul chʼul-abat te la yal te yakuk yichʼ tsʼetel te jtejkʼ teʼ sok te jaʼuknax ya xjil te schumanteʼel sok te slojpʼ. Ta patil kʼax «jukeb tiempo» sok chaʼchʼi te teʼe. * Sok la kiltik te ay chaʼchajp bin-utʼil kʼot ta pasel te albilkʼop ini. ¿Bin-utʼil kʼot ta pasel te sbabiale? ¿Yatobal xjul ta awoʼtan?

Ernesto: Jaʼ te sojk sjol jukeb jaʼbil te ajwalil Nabucodonosor, ¿jichbal?

Julio: Jich. Te kʼalal sojk sjol jich lokʼ ta ajwalil. Te schebal bin-utʼil kʼot ta pasel te albilkʼope jaʼ te la yichʼ komel jukeb tiempo te wentainel yuʼun Dios liʼ ta Balumilal. Te jukeb tiempo jajch ta ajtayel kʼalal la yichʼ lajinel te Jerusalén ta jaʼbil 607 te kʼalal mato talem-a te Cristo. Teyto tal-abi maʼyuk machʼa te ya x-akʼbotix yaʼtel yuʼun te Jehová ta ajwalil liʼ ta Balumilal. Te kʼalal laj ta ajtayel te jukeb tiempoe, te Dios la yotses jtul yachʼil ajwalil, pero ta chʼulchan. La kiltikix bin-ora jajch ta ajtayel te jukeb tiempo sok ya skʼan ya jnaʼtik jayeb jaʼbil jalaj yuʼun jich ya jnaʼtik bin-ora jajch ta aʼtel te Wentainel yuʼun te Diose. ¿Yakbal ta kʼoel ta awoʼtan?

Ernesto: Yak, ya xjul ta koʼtan te bin la kalbeytik skʼoplal ta yan bueltae.

Julio: Mero lek. Kiltik jayeb jalaj te jukeb tiempoe, jaʼnix jich te joʼone nail la kilbey tal skʼoplal. Ya jpas tulan yuʼun ya jcholbat awaʼiy ta lek.

Ernesto: Lek.

Julio: Te sbabial albilkʼop te kʼot ta pasel jaʼ ta swenta te Nabucodonosor, te jukeb tiempo jalaj jukeb jaʼbil. Pero te schebal kʼot ta pasele, jaʼ te Wentainel yuʼun te Dios te jalajxan stukele.

Ernesto: ¿Bin-utʼil ya anaʼ?

Julio: Bueno, te jukeb tiempoe jajch ta ajtayel te kʼalal la yichʼ lajinel te Jerusalén ta jaʼbil 607 te kʼalal mato talem-a te Cristo. Teme ta jaʼbil-abi ya xjajch kajtaytik jukeb jaʼbil, ya xkʼootik ta jaʼbil 600 te mato jaʼuk kʼajkʼaleltik-ae sok ta jaʼbil-abi maʼyuk bin kʼot ta pasel te snitojbey sba skʼoplal sok te Wentainel yuʼun te Diose. Jaʼnix jich te kʼalal ayto ta Balumilal-a te Jesuse, la yal te mato lajem-a te jukeb tiempoe.

Ernesto: Aaa, melelnix-a.

Julio: Jich yuʼun, te jukeb tiempo ma jukebuknax jaʼbil.

Ernesto: ¿Jayeb jaʼbil?

Julio: Ta libro yuʼun Apocalipsis, ay jun albilkʼop te snitojbey sba skʼoplal sok te bin ya yal te Daniel sok ya skoltayotik ta snaʼel jayeb jaʼbil jalaj te jukeb tiempoe. Ta albilkʼop-abi ya yal te oxeb tiempo sok olil jaʼ 1,260 kʼajkʼal. * Jich yuʼun teme ya kajtaytik cheb buelta te 1,260 kʼajkʼale, ya xlokʼ 2,520 kʼajkʼal. ¿Yakbal ta kʼoel ta awoʼtan?

Ernesto: Yak, pero mato mero xkʼot ta koʼtan bin yuʼun ya awalik te jajch ta aʼtel te Wentainel yuʼun Dios ta 1914.

Julio: Ma xa amel awoʼtan, yato kilbeytik bael skʼoplal. Ta Biblia ay ya yal te jujun jaʼbil ya xkʼot te jujun kʼajkʼale. * Jich yuʼun te jukeb tiempo o te 2,520 kʼajkʼal, smakoj 2,520 jaʼbil. Teme ya xjajch kajtaytik te 2,520 jaʼbil ta 607 te kʼalal mato talem-a te Cristo, te jaʼ te kʼalal jajch ta ajtayel te jukeb tiempoe, ya xlokʼ ta 1914. Jaʼ yuʼun ya xjuʼ ya kaltik ta jaʼbil-abi laj ta ajtayel te jukeb tiempoe sok och ta Ajwalil te Jesús ta chʼulchan. Jaʼnix jich ta 1914 jajch ta kʼoel ta pasel te bin ya yal te Biblia ta swenta te slajibal kʼajkʼale.

Ernesto: ¿Bintik-a te jajch ta kʼoel ta pasele?

Julio: Ta Mateo 24:7, te Jesús la yal te bin ya xkʼot ta pasel kʼalal ya xjajch ta wentainel ta chʼulchan: «Ya xhahch scontrahin sbahic nacionetic, soc ya scontrahin sbahic te jujuchahp banti scuentahinejic; ya xtal wiʼnal soc nihquel ta bayuc». Te Jesús la yal te ya xtal wiʼnal sok tulan nijkel ta bayuk. ¿Mabal jichuk ya awil te yak ta kʼoel ta pasel spisil ini teyto tal ta jaʼbil-abi?

Ernesto: Jich, melelnix-a.

Julio: Te Jesús jaʼnix jich la yal te ya x-ayin guerraetik. Ta libro yuʼun Apocalipsis la yal te ma jaʼuknax ta jun lugar ya x-ayin te guerrae, la yal ta swolol Balumilal. * ¿Yatobal xjul ta awoʼtan bin-ora jajch te Primera Guerra Mundial?

Ernesto: Ta 1914. Aaa, jaʼ te jaʼbil ya awalik te jajch ta wentainwanej te Jesús ta chʼulchan. Maʼyuk banti jich jnopoj-a.

Julio: Melelnix-a, te kʼalal ya kiltik te bin-utʼil snitojbey sba skʼoplal te albilkʼop yuʼun jukeb tiempo sok te albilkʼopetik ta swenta te slajibal kʼajkʼal, jun-nax ya yalbey skʼoplal. Te testigootik yuʼun Jehová kʼoem ta lek ta koʼtantik te och ta wentainwanej te Jesús ta 1914 teyto tal-abi ayotikix ta kuxinel ta slajibal kʼajkʼal. *

Ernesto: Wokolto ya kaʼiy.

Julio: Jichniwan. Jaʼnix jich wokol akʼot ta koʼtan te kʼalal la scholbonik kaʼiy ta sbabial bueltae. Pero ya jkʼan te yakuk anaʼ te manchukme te Biblia ma xyal te 1914, te testigootik yuʼun Jehová kʼoem ta lek ta koʼtantik te jajch ta wentainwanej te Jesús ta jaʼbil-abi. Sok ya jkʼan te yakuk awil te spisil te bin ya kakʼtik ta nopel lokʼem tal ta Biblia.

Ernesto: Melelnix-a, jaʼ te bin chajpnax ya kile. Spisil te bin ya jojkʼoybate ya awakʼbon sujtib sok te Bibliae. Maʼyuk banti kaʼiyoj te jich ya awal: «Joʼon jich ya jnop», «joʼon jich ya kal». Spisil-ora ya atuuntes te Bibliae. Pero ¿bin yuʼun te wokol ya xkʼot ta koʼtantike? ¿Bin yuʼun ma la yal te Dios te ya x-och ta wentainwanej te Jesús ta 1914?

Julio: Mero lek te jojkʼoyel awuʼun Ernesto. Bayal bintik ay ta Biblia te maba kʼax jamal ya yale. Jich bin-utʼil ¿bin yuʼun ma jichuk la spas te Diose? O ¿bin yuʼun tulan skʼoplal te ya jpastik tulan yuʼun ya xkʼot ta koʼtantik te bin ya yale? ¿Bin yilel ya awil teme jaʼ ya kilbeytik skʼoplal ta yan semana?

Ernesto: Lek. Ya jmaliyat.