Chʼion ta jun barrio te pobreik ta mukʼul lum Montreal. Waxakebotik ta tul, joʼon te pekʼelxan kaʼbilal. Kʼalal wakebtonax u kayinel-a, laj te jpapa sok jaʼ la swentainotik te jmama.

Te kʼalal chʼinonto-ae jajch jtuuntes droga, la jpas apostar sok la jmulan majtamba. Jaʼ ya jokinlan te j-elekʼetik. Kʼalal aytonax lajuneb kaʼbilal-a, ya jpas aʼtelil ta stojol te antsetik te ya schon sbaik sok ya x-aʼtejon ta stojol te machʼatik ya yakʼik ta majanel stakʼinik. Ya jmulan yelkʼanel sok sloʼlayel te ants winiketik. Jich kʼoem bitʼil droga ta koʼtan te bin ya jpas.

Te kʼalal 14 kaʼbilal-a ya jnaʼix ta lek elekʼ. Ya jman bayal relojetik, pulseraetik sok chʼokowiletik te jich yilel te pasbilik ta oro, ya jtsʼibay te kʼopil 14 quilate tey-a sok ya jchontiklan ta calle soknix ta estacionamiento yuʼun te mukʼul tiendaetik. ¡Maba wokol ya kaʼiy stael takʼin! Ta jun buelta, jun-nax kʼajkʼal la jpas ganar 10 mil dólar yuʼun Canadá.

Te kʼalal 15 kaʼbilal-a, la kichʼ lokʼesel ta reformatorio, jich yuʼun maʼyuk banti ya xnainonix. Ya xwayon ta calleetik, ta parqueetik sok ta sna te kamigotak.

Te policía bayal buelta la sjojkʼoybon ta swenta te bin ya jchon. Te bitʼil maba kelkʼanoj te bin ya jchon, jaʼ yuʼun maʼyuk bin-ora boon ta chukel. Pero ay la jtoj multa ta swenta te ya jloʼlay te ants winiketik, ya kaʼiy elekʼ, ya jpas lot sok maʼyuk permiso yuʼun ya kaʼiy chonbajel. Maʼyuk bin ya jxiʼ, aʼtejon ta stojol te machʼatik ya yakʼik ta majanel stakʼinik. Te bitʼil xiʼbantik sba te kaʼtel, ay baeltik ya kichʼ bael jpistola. Aʼtejon ta stojol te machʼatik kʼax chopolik o te mafiosoetik.

Kʼalal 17 kaʼbilal-a la kaʼiy stojol ta sbabial buelta te bin ya yal te Biblia. Yakon ta kuxinel sok-a te jlekol, te jajch ta snopel te Biblia sok te testigoetik yuʼun Jehová. Pero la kijkitay ta skaj te ma la jmulan te mantaliletik ya yal te Biblia, boon ta nainel sok yan jlekol.

Jaʼnix jich te jlekol-abi, jajch ta snopel te Biblia sok te testigoetik yuʼun Jehová. Chajpnax la kil-a te jelon te stalel: leknax yoʼtan sok ay slamalil yoʼtan. Ta jun buelta la yikʼonik bael ta tsoblej. La jta ta ilel te yan stalelik soknax yutsil yoʼtanik la skʼopononik. Leknax la kaʼiy jba yuʼun. Te kʼalal chʼinonto-ae maʼyuk machʼa kʼuxon ta yoʼtan sok maʼyuk jkʼoplal ta yoʼtan te jfamilia. Te bin yilel la yilonik te testigoetik yuʼun Jehová jaʼ te bin-nix ya jkʼan-ae. Kʼalal la sjapbonik te ya kichʼ nojptesel ta Biblia, oranax la jkʼan.

Te bin la jnop jaʼ la skoltayon. Ta jun buelta jchapoj sok chaʼtul joʼtak te ya xbootik ta elekʼ, melel ya xtuun kuʼun 50 mil dólar yuʼun ya jtoj-a te jbet yuʼun tajimal. ¡Lek te maba la jkʼan boone! Te chaʼtul joʼtake bajtik stukelik, te jtule la yichʼ milel, te yane la yichʼ chukel.

Te bin yakon ta snopel ta Biblia la yakʼbon kil te bayal bin ya skʼan ya jel ta jkuxlejal. Jich bitʼil ya yal ta 1 Corintios 6:10 te «jʼeleqʼuetic, machʼatic ay stʼutʼilic, jyacubeletic, jʼixtaʼcʼopetic, jloʼloyej-biluquetic, haʼic ini ma ba ya xʼaʼbot yichʼic te cuentahinel yuʼun Dios». Jajchon ta okʼel te kʼalal la jkʼopon te versículo ini. Jaʼ ya skʼan te ya jel ta jkʼaxel te jtalel (Romanos 12:2). Melel ya jmulan majtamba, ya jpas lot sok kʼaxel ma lek te jkuxlejal.

Jaʼnix jich la jnop te lek yoʼtan te Jehová sok te ya spas perdón (Isaías 1:18). Jich yuʼun la jkʼopon sok spisil koʼtan te Jehová, la jkʼanbey wokol te yakuk skoltayon ta yijkitayel te bin ma lek ya jpas sok ta sjeltayel te jkuxlejal. Te bitʼil la skoltayon, kʼunkʼun la kijkitay spasel te bin ma lek. Te bin lek la jpas jaʼ te nujpunon sok te jlekol.

Te kʼalal 24 nax kaʼbilal-a, ayix oxtul jnichʼnab. Ya jkʼan te ayuk kaʼtel yuʼun ya jmakʼlin-a te jfamilia. Pero maba la jnop jun ta lek, jaʼ yuʼun maʼyuk bin jnopoj ta swenta te aʼtelil. La jkʼanbey koltayel yan buelta te Jehová sok boon ta sleel kaʼtel. Kʼalal ya sjojkʼoybonik te bin ya jnaʼ spasel, ya kaltiklanbey te ya jkʼan ya jeltay jtalel sok lek ya jkʼan ya x-aʼtejon. Ay baeltik ya kal te yakon ta snopel te Biblia yuʼun jaʼ ya jkʼan te lekil winikon. Pero maʼyuk machʼa la yakʼbon kaʼtel. Ta patil, ay machʼaxan la jcholbey te bin kʼaxem ta jtojol, te winik jich la yalbon: «Ma jnaʼ bin yuʼun, pero ya yalbon koʼtan te ya kakʼbat awaʼtel». Ya jnaʼ te jaʼ sujtib te oración la jpas. Ta patil, te joʼon sok te kinam ochotik ta testigo yuʼun Jehová.

Jaʼ kuxulon yuʼun te jpasoj ta jkuxlejal te tojobtesel ya yakʼ te Biblia sok jaʼ jtʼunojbey te ejemplo yuʼun te Cristo. Ay stseʼelil yoʼtan te jfamilia sok maʼyuk bin ya yalbonix te koʼtan, melel la spasbonix perdón te Jehová.

Ayix 14 jaʼbil te yakon ta abatinel ta stojol te Dios, ta ora ini jaʼ ya kakʼxan jtiempo ta snojptesel te ants winiketik ta Biblia. Mato jaluk, te kinam jichnix jajch spasbel-euk. Te 30 jaʼbil kʼaxeme jkoltayej 22 ta tul joʼtak ta aʼtel yuʼun ya x-ochik ta testigo yuʼun Jehová. Yato xboon ta mukʼul tiendaetik, pero ma yuʼunuk ya xboon ta elekʼ. Bayal buelta ya kalbey te ants winiketik te bin majtanil ya kichʼtik ta pajel chaʼbej: jaʼ te ya xkuxinotik ta Balumilal te banti maʼyukix j-elekʼetik (Salmo 37:10, 11).