Ayinon ta Acul, ta jun chʼin lum te ay ta witstikil yuʼun te oeste yuʼun Guatemala. Te jfamiliae ya xkʼopojik ta ixiles, jaʼ jun grupo indígena te jaʼ stsʼumbalik tal te mayaetike. Manchukme ya xkʼopojon ta español jaʼnix jich la jnop-euk te jkʼoptike. Jaʼ chʼion-a te ta yorail te tulan kʼop jajch ta jlumaltike, te jalaj treinta y seis jaʼbil. Ta yorail-a te kʼop ini bayal-a laj te ixiletike.

Te kʼalal ay chaneb kaʼbilal-ae, te jbankil te ay siete yaʼbilal-a yakal ta tajimal sok jun granada-a te tʼom yuʼune. Te bin wokolil la jtatik yuʼune, jaʼ te tupʼ te jsite, pero te jbankile laj stukel. Jaʼto tal-abi, boon ta jun escuela yuʼun machʼa ma xyilik kʼinal te ay ta mukʼul lum yuʼun Guatemala te banti la jnop skʼoponel jun ta braille. Maʼyuk bin-ora la jnaʼ bin yuʼun, pero te machʼa ya xkanantaywane ma xyakʼbon jkʼopon te alaletike soknix te joʼtake ma skʼan ya sjokinonik. Spisil-ora jtukel ya kaʼiy jba, ya jkʼan te ya xkʼotix te cheb u te ya xboon ta jna sok te jmamae, te spisil-ora kʼuxon ta yoʼtan. Pero laj bael te kʼalal ay 10 kaʼbilal-ae. Kʼax bayal la jmel koʼtan, melel laj bael te jmama te jip kʼux ya yaʼiyon-ae.

Te kʼalal ay 11 kaʼbilal-ae, chaʼsujton bael ta jlumal bajt kuxinon sok te jchaʼbankil sok te sfamiliae. La yakʼbon te bin ya xtuun kuʼune, pero maʼyuk machʼa la skoltayon ta swenta te mel-oʼtan ya kaʼiye. Ay bayal buelta jich ya kalbey te Diose: «¿Bin yuʼun te laj te jmamae? ¿Bin yuʼun te ma xkil kʼinale?». Te ants winiketike ya yalbonik te wokol jtaoje, jaʼ la jich skʼanojel yoʼtan te Diose. Jaʼ yuʼun ya jnop-a te Diose kʼax chopol sok te maba toj te bin ya spase. Te juʼuk kuʼune, la jmil jba te jichuke.

Ta swenta te bitʼil tupʼ te jsite, bayal kʼax jwokol. Te kʼalal alalonto-ae bayal buelta la kichʼ utsʼinel. Maʼyuk machʼa la jcholbey yaʼiy te la kichʼ utsʼinele, melel ya jnop te maʼyuk machʼa ay skʼoplal ta yoʼtan sok maba ya xkʼopojon sok-a te ants winiketike. Kʼax ya jmel koʼtan sok maba ya jmulan ya jokin jba sok-a te yantik ants winiketike, melel maʼyuk machʼa ya smukʼulin koʼtan-a.

Te kʼalal 13 kaʼbilal-a, jtul testigo yuʼun Jehová sok te yiname bajt yulaʼtayonik ta escuela. Jtul maestra te ya snaʼbon yoʼbolil jba la yalbey te testigoetik yuʼun Jehová te yakuk xbajt yulaʼtayonike. La yalbonik te ya yal te Biblia te ya sta yorail te ya xjam sit te tsʼoʼsitetike sok te ya xchaʼkuxajik talel te machʼatik lajemike (Isaías 35:5; Juan 5:28, 29). Ya jmulan schʼamel kaʼiy te skʼopike, pero ta skaj te ma kʼayemon ta aʼiyej ay baeltik te ma xkʼopojone. Manchukme jich jtalel-abi, la yakʼik ta ilel te skʼuxul yoʼtanik ta jtojol sok ma komik ta snojptesbelonik ta swenta te Biblia. Manchukme ya xbeenik 10 kilómetro ta witstikil swenta ya xbajt yulaʼtayonik.

Te jbankil la yalbon te pobreik, pero leknax ya schajpan sbaik. Chikan ta ilel te kʼuxon ta yoʼtanik, melel ay bin ya skʼebanbonik. Jnaʼoj ta lek te jaʼnax te smelelil jchʼuunjeletik bayal bin ya spasik ta stojol te yantike.

La kichʼ nojptesel yuʼun Biblia ta swenta te junetik te lokʼemik ta braille. Ya xkʼot ta koʼtan te bin yakal jnopel-ae, pero ay cheʼoxeb nojpteseletik te wokol la kaʼiy schʼuunele. Wokol la kaʼiy schʼuunel te kʼuxon ta yoʼtan te Diose sok te ay jkʼoplal ya yilon te yantike, jich bitʼil ya yilon te Diose. Kʼot ta koʼtan bin yuʼun ma slajinoj Dios te wokoliletike, wokol la kaʼiy te jichuk ya kil bitʼil jTat te kʼuxon ta yoʼtane. *

Te kʼalal la jnopxan te bin ya yal te Biblia, kʼunkʼun, jajch ta jelonel te snopojibal kuʼune. Jun te bin la jnopbey skʼoplale, jaʼ te kʼux ya yaʼiy te Dios te kʼalal ya xkʼax jwokoltik. Jich ya yal ta stojol te j-abatetik yuʼun te yichʼojik utsʼinel: «Melel la jquilbeyix swocol te pueblo cuʼ un [...]. Ya jnaʼbe yoʼbolil sbahic yuʼun te swocolique» (Éxodo 3:⁠7). Kʼalal kʼot ta koʼtan te ay skʼuxul yoʼtan te Diose, la jnop te ya kakʼbey jkuxlejal yuʼun ya jpasbey te skʼanojel yoʼtane. La kichʼ jaʼ ta 1998 jich ochon ta testigo yuʼun Jehová.

Te kʼalal kʼaxemix jun jaʼbil kichʼbel-a te jaʼe, boon ta jun curso yuʼun te machʼatik ma xyilik kʼinal ta Escuintla. Jtul hermano te ay ta jun congregación ta Escuintla la snaʼ stojol te wokol la kaʼiy te ya xboon ta tsoblej ta Acul, melel ya xbeenon kʼaxel ta witstikil te bantinix la sbeentayik te hermano sok te yinam te kʼalal ya snojptesonik ta swenta te Bibliae. Swenta ya skoltayon-a, te hermanoe la sle jun familia yuʼun Testigoetik yuʼun Jehová yuʼun ya xkuxinon ta snaik sok jich ya xjuʼ ya skoltayonik yuʼun ya xboon ta tsoblej. Kʼalal ta ora ini, ya skanantayonik jich ya yilonik te bitʼil te sfamiliae.

Bayal bintik ya xjuʼ ya jcholbeyex awaʼiyik ta swenta te bitʼil yakʼojik ta ilel skʼuxul yoʼtanik te hermanoetik ta jtojol. Schʼuunej koʼtan te testigoetik yuʼun Jehová jaʼik te smelelil jchʼuunjeletike (Juan 13:34, 35).

Te ora ini ya kaʼiy te ay jkʼoplal, te ay smukʼul koʼtan sok ay swentail te jkuxlejale. Ma jaʼuk ya jnopilan te bitʼil ma xkil kʼinale, jaʼ ya xbajt ta koʼtan snojptesel te ants winiketik ta swenta te bin kʼax tʼujbilik ya yal te Bibliae. Ay kaʼtel ta congregación sok ya jkʼases discursoetik ta yantik congregacionetik te nopol ayike. Jaʼnix jich ya kal wokol yuʼun te ya kakʼ discursoetik ta mukʼul tsoblej te banti ya xkʼotik bayal ta jmil ants winiketik.

Ta 2010 boon ta Escuela de Entrenamiento Ministerial (te ora ini sbiilinej Escuela yuʼun Evangelizador) ta El Salvador. Te bitʼil boon ta escuela-abi jaʼ skoltayejon yuʼun ya xjuʼ ya jkoltayxan te hermanoetike. Ta swenta te nojptesel la kichʼe, ya kaʼiy te ay jkʼoplal ta yoʼtan te Jehová sok te kʼuxon ta yoʼtane, melel machʼauk ya xjuʼ ya skoltay yuʼun ya spasbey te skʼanojel yoʼtane.

Te Jesús la yal: «Ha bayel xan yutsil te machʼa ay bin ya yacʼ te bin utʼil ay bin ya yichʼ» (Hechos 20:35). Ta ora ini tseʼel koʼtan sok ya xjuʼ ya jkoltay te ants winiketik, manchukme la jkuy te maʼyuk bin-ora ya xjuʼ kuʼun spasele.