Ya kiltik te bayal ta tul ants winiketik ya smulanik te ya xkʼopojotik sok ta swenta te bintik ya yal te Biblia. Jaʼukmeto ya kichʼtik ta mukʼ te bintik schʼuunejike, jaʼ yuʼun maʼyuk machʼa ya sujtik te yakuk schʼuunik te bin ya jcholbeytik yaʼiyike.

 Te kʼalal ya jcholbeytik skʼoplal ta swenta relijion ya jpastik tulan ta yakʼel ta ilel te tsitsel ya yal te Biblia ta swenta te lamaluk koʼtantik sok te sbelaluk ya xkʼopojotik sok te ants winiketike (1 Pedro 3:15). Kʼoem ta koʼtantik te ay machʼatik ma skʼan ya yaʼiyik stojol te bin ya jcholbeytik yaʼiyike (Mateo 10:14). Jaʼukmeto jaʼnax ya xjuʼ ya jnaʼtik te bin-utʼil ya sutbotik jkʼoptik te ants winiketik teme ya kulaʼtaytike. Jaʼnix jich ya xjuʼ xjelon te bin-utʼil ay te skuxlejalike.

 Jich bitʼil te ayniwan machʼa ma jocholuk-a te kʼalal ya jcholbeytik yaʼiy te skʼop Diose, jaʼukmeto ayniwan jocholix-a ta yan buelta ya kulaʼtaytike. Jaʼnix jich ayniwan ya staik wokolil te maʼyuk jich kʼaxem ta skuxlejalik te jaʼ ya xtijbot yoʼtanik yuʼun ta sleel te tojobtesel yuʼun te Bibliae. Jaʼ swentail te ya kulaʼtaytik ta spisil-orae.