¿Bin yuʼun te ma spasik te skʼin Kuxibale?

TSUMA TA

Te bintik ya yichʼ alel sok te bin smelelil

Te bintik ya yichʼ alel: Te stestigotak te Jehová ma spasik te skʼin Kuxibal melel maba schʼuunejik te Cristoe.

Te bin smelelil: Jchʼuunejkotik te Jesucristo te jaʼ Jkoltaywanej kuʼuntik sok ya jpaskotik tulan ta spasel te bintik ya yakʼ ta nopele (1 Pedro 2:21; Lucas 2:11).

Te bintik ya yichʼ alel: Te jaʼexe ma achʼuunejik te chaʼkuxaj te Jesuse.

Te bin smelelil: Ma jaʼuknax jchʼuunejkotik te chaʼkuxaj Jesuse, melel kʼoem ta koʼtankotik te jaʼ yiptajib te schʼuunel koʼtantik ta stojol te Cristoe. Ta melel, ya jcholbeykotik te ants winiketik te bayal skʼoplal te bitʼil chaʼkuxaj te Jesuse (1 Corintios 15:3, 4, 12-15).

Te bintik ya yichʼ alel: Ya skomik te yal snichʼnabik yuʼun ma spasik te kʼinetik ini.

Te bin smelelil: Kʼux ta koʼtankotik te kal jnichʼnabkotike, jaʼ yuʼun ya jpaskotik tulan ta spʼijubtesel ta lek sok te tseʼeluk yoʼtanik alaletik kuʼunkotike (Tito 2:4).

¿Bin yuʼun te ma spasik te skʼin Kuxibal te stestigotak te Jehovae?

Te costumbreetik ya spasik ta chaʼoxchajp nacionetik te snitojbey sba skʼoplal sok te Kuxibale maba lokʼem ta Biblia.
Te Jesús la yal ta mantal te ya yichʼ naʼel te kʼalal laje, ma jaʼuk te kʼalal chaʼkuxaje. Te joʼonkotike ya jpaskotik ta jujun jaʼbil te snaʼojibal slajel te Jesús jaʼ chikan te bin ajtalil ya xkʼot ta calendario judío (Lucas 22:19, 20).
Kʼoem ta koʼtankotik te costumbreetik te snitojbey sba skʼoplal sok te Kuxibale, lokʼem tal ta antiguo costumbreetik te ya spasik mulwej te kʼalal ya yichʼ ta mukʼ te diosetik yuʼunike, jaʼ ini kʼax ma smulan te Diose. Te Jehová jaʼnax ya skʼan te kichʼtik ta mukʼ stukel sok ma lekuk ya yil teme ya jpastik kʼinetik te ma smulane (Éxodo 20:5; 1 Reyes 18:21).

Kʼoem ta koʼtankotik te maba lokʼem ta Biblia te Kuxibale, jaʼ yuʼun ma maba ya jpaskotik. Te Biblia ya stij koʼtantik ta stuuntesel te «pʼijil-oʼtanil soc te tsahtayel» yuʼun jich maba ya jpastik te costumbreetik te ma smulan te Diose (Proverbios 3:21; Mateo 15:3). Ta melel, sok yutsil koʼtankotik ya kakʼkotik ta naʼel te bintik jchʼuunejkotik teme ay machʼatik ya sjojkʼoyike sok ya kichʼkotik ta mukʼ te tulutul ya snopik te bintik ya spasik te ants winiketike (1 Pedro 3:15).