Ay chaʼoxchajp swentail te bin yuʼun te maba ya xboonkotik ta guerrae.

1.   Jaʼ jun mantalil yuʼun te Diose. Te Biblia la yalbey jilel skʼoplal ta swenta te j-abatetik yuʼun Dios te ya skʼan «scʼatpʼunic ta arado te espada yuʼunic» sok te maba ya xchajpan sbaik ta yakʼel guerra (Isaías 2:4).

2.   Jaʼ jun mantalil yuʼun te Jesús. Te jpuk-kʼop Pedro la yichʼ albeyel ta mantal yuʼun te Jesús: «Otsesa ta yawil te espada awuʼun, como spisil te machʼatic ya stsaquic espada, ta espada ya xlajic» (Mateo 26:52). Ta swenta te kʼopiletik-abi, jamal la yal te Jesús te maba ya skʼan ya stsakik aʼtejibaletik yuʼun guerra te jnopojeletik yuʼune.

    Jaʼnix jich te Jesús la yalbey te jnopojeletik yuʼun te maba «ayic ta scuenta te bahlumilal». Ta swenta-abi maba ya xchʼik sbaik ta swenta política (Juan 17:16). Soknix maba ya sjachik kʼop ta swenta te ya xbajtʼik ta guerra ta yan nación te soldadoetike, sok maba smakbey sbe te ants winiketik teme ay machʼa ya skʼan ya x-och ta soldadoe.

3.   Te jchʼuunjeletik yuʼun Cristo ya skʼan te kʼux ya yaʼiyik te spatxujkike. Te Jesús la yalbey te jnopojeletik yuʼune: «Ay jun yachʼil mandaril ya calbeyex: Talel cʼaxel cʼux xawaʼiy aba ta awoʼtanic» (Juan 13:34, 35). Te smelelil jchʼuunjeletik yuʼun Cristo junax ay te schʼuunel yoʼtanik ta swolol Balumilal sok maʼyuk bin-ora ya stsakik aʼtejibaletik yuʼun guerra yuʼun ya smil sbaik (1 Juan 3:10-12).

4.   Te sbabial jchʼuunjeletik yuʼun Cristo maba bajtʼik ta guerra. Ay jun libro te jich ya yal: «Te sbabial jnopojeletik yuʼun Cristo maba la schʼik sbaik ta guerra ni jaʼuk ta spasel servicio militar», melel snaʼojik-a te «maba ya stsak sba sok te bin la yakʼ ta nopel te Jesús ta swenta te kʼuxul-oʼtanil soknix te mantalil te kʼux ya yaʼiyik te skʼontratakike» (Encyclopedia of Religion and War). Tey ta libro yuʼun Historia de la decadencia y caída del Imperio romano, te historiador británico Edward Gibbon jich la yal: «malaj la skʼan ochik ta soldadoil [...] maba la yijkʼitayik te aʼtelil te kʼax chʼultesbil skʼoplale».

 Te stestigoonkotik yuʼun Jehová leknax te bintik ya jpaskotik ta stojol te yantike sok maba ya jachkotik kʼop ta jlumalkotik. Ta melel, ya kichʼbeykotik ta mukʼ te yaʼtel te ajwaliletike, yuʼun jich ta kakʼkotik ta ilel-a te ya jchʼuuntik spasel te mantaliletik te ay ta Bibliae.

•   «Spisil ants-winiquetic junuc me yoʼtan acʼa xchʼuunbeyic smandal te ajwaliletic te yichʼoj yaʼtelique» (Romanos 13:1, XCD.)

•   «Aʼbeya César te bin yuʼun César, soc aʼbeya Dios te bin yuʼun Dios» (Mateo 22:21.)

 Jaʼ yuʼun, ya jchʼuunkotik spasel te mantaliletike, ya jtojkotik te jpatankotik sok ya jchʼuunkotik spasel te bintik ya yal te ajwalil ta swenta slekilal te jlumaltike.