Maʼuk, maba ya kakʼkotik te diezmo. Te aʼtelil kuʼunkotik ya xpastaj ta swenta stakʼin te machʼatik jich yipal ya xlokʼ ta yoʼtanike. Jaʼukmeto ¿Banti chiknaj tal te costumbre ta swenta te yakʼel te diezmo, sok bin yuʼun te maba jich ya spasik te stestigotak te Jehovae?

 Te mantalil la yichʼik akʼbeyel te lum Israel ta namey kʼinal jaʼ te yakʼel diezmo (jun ta slajunebal te bintik ay yuʼunik) ta stojol te sacerdoteetike. Te Biblia jamal ya yal te bitʼil maba sujbilotikix ta schʼuunel te mantalil ini. Jich yuʼun ta kʼajkʼal ini maba sujbilotikix ta yakʼel te diezmo (Hebreos 7:​5, 18; Colosenses 2:​13, 14).

 Manchukme maba sujbilonkotik ta yakʼel diezmo o yantikxan majtʼanil takʼin, te testigoonkotik yuʼun Jehová jich ya jpastik-euk te bitʼil la spasik te sbabial jchʼuunjeletik yuʼun Cristo. Te jchʼuunjeletik ini chaʼchajp te bitʼil la skoltayik te congregacione: Yakʼel majtʼanil takʼin, spukel sok yakʼel nojptesel yuʼun Biblia te maba tojbile.

 Jaʼ ini ya yakʼ jnaʼtik ta Biblia te jich ya yale: «Jujutuhl acʼa yacʼ ha chican te hich yipal snopoj ta yoʼtan te ya yaqʼue, ma ta scuentahuc mel-oʼtan o ta sujel, como cʼux ta oʼtanil yuʼun Dios te machʼa tseʼel yoʼtan ya yaqʼue» (2 Corintios 9:7).