Jich bitʼil te testigoonkotik yuʼun Jehová ya jpaskotik tulan yuʼun junax ya x-ayin te jfamiliakotik sok te sfamilia te jpatxujtike. Bayal skʼoplal ta koʼtankotik te bitʼil yichʼoj chajpanel te familiae, melel ya jnaʼkotik te jaʼ la yakʼ chiknajuk te Diose (Génesis 2:​21-​24; Efesios 3:​14, 15). Te Diose yakʼoj mantaliletik ta Biblia te skoltayoj bayal ta tul ants winiketik ta swolol Balumilal yuʼun jich ya smulanik te tseʼel-oʼtanil te machʼatik nujpunemike sok te junax ya x-ayinike.

 Ya jpaskotik tulan ta spasel ta jkuxlejalkotik te mantaliletik te ay ta Biblia, jaʼ ya skoltayotik yuʼun jich lekil mamlalilonkotik sok inamilonkotik soknix lekil meʼil tatilonkotik (Proverbios 31:10-​31; Efesios 5:22–​6:4; 1 Timoteo 5:8). Te Biblia ya yakʼ te yakuk stulantesikxan te bitʼil lek ya yil sbaik te machʼatik nujpunemik, manchukme maba pajal te schʼuunel yoʼtanike (1 Pedro 3:​1, 2). Akʼa kiltik te bintik yalojik chaʼoxtul te machʼatik nujpunemik te kʼalal och ta testigo yuʼun Jehová te sjoyike:

•   «Te sbabial wakeb jaʼbil jnujpuneltik-ae, spisil ora ya kut jbatik sok jich la kaʼiytik te bitʼil ma jnaʼtik schajpanel te kʼop kuʼuntike. Jaʼukmeto te kʼalal och ta testigo yuʼun Jehová te Ivete, jajch yakʼxan ta ilel kʼuxul-oʼtanil sok lamal-oʼtanil. Ta swenta te bitʼil la sjel te stalele, jaʼ la skoltayotik yuʼun maba la jchʼoj jbatik jilel.» (Clauir, ta Brasil)

•   «Te kʼalal jajch snop te Biblia te jmamlal Chansa sok te testigoetik yuʼun Jehovae, la jkontrain yuʼun, melel jkuyoj-a te jaʼnax ya xatik familiaetik te testigoetike. Jaʼukmeto la kilix te bayal skoltayejotik te Biblia jich bitʼil te jnupunemotike.» (Agness, ta Zambia)

 Jaʼnix jich te kʼalal ya jcholkotik te skʼop Diose ya kakʼbeykotik snopik te jpatxujktik te bin-utʼil ya skoltayotik te Biblia ta swenta te bintik chaʼoxchajp ya skʼan pasel ta familiae:

•   Snaʼel stsael te machʼa ya xnujpunotik soke

•   Snaʼel schajpanel te kʼopetik te ya xchiknaj ta sbabial jaʼbil yuʼun nujpunele

•   Lekuk ya awil aba sok te smeʼ stat te machʼa nujpunemat soke

•   Snaʼel stuuntesel te takʼine

•   Yijkʼitayel te utawe

•   Snaʼel spasel perdón

•   Stojobtesel te alnichʼanetike

 Aynix jich ya xkʼot ta pasel-a. Ay jich la spukbey skʼoplal ta jaʼbil 1998 te empresa Sofres la yakʼ ta naʼel te aylaj 20 te nupulike jtul ta spisilik ini, te kʼalal och ta testigo yuʼun Jehová te sjoye jajch bayal kʼop ta stojol ta skaj te la sjel te srelijione.

 Te Jesús la yal jilel ta jamal ta stojol te jnopojeletik yuʼun te yananix staik kontrainel yuʼun-a te jayeb machʼatik ay yuʼunike (Mateo 10:32-​36). Te winik Will Durant la stsʼibay ta swenta te kʼalal yak ta mantalteswanej-a te mukʼul lum Roma, «ta stiempo te jchʼuunjeletik yuʼun Cristo la yichʼik kujchinel ta sjinel te familiaetike». a Ta ora ini jaʼnix jich ya kichʼtik kujchinel-euk te stestigoonkotik yuʼun Jehová. Jaʼukmeto, ¿joʼonkotiknixbal-a te ya jachtik te kʼope?

 Te kʼalal la yichʼ kujchinel te testigoetik yuʼun Jehová ta xatel te familiaetike, te Tribunal Europeo de Derechos Humanos la yal te jaʼnix bayal buelta ya sjachik kʼop te sfamilia te testigoetik yuʼun Jehová te maba pajal schʼuunel yoʼtan soke, melel «yuʼun ma smulanik sok ma xyichʼik ta mukʼ te ya sjel te bintik ya schʼuun sok te bintik ya spas ta srelijion te machʼa testigo yuʼun Jehová». Jich la yalxan te Tribunal: «Spisil te machʼatik maba pajal te srelijionike jaʼnix jich ya xkʼot ta stojolik-euk, ma jaʼuknax te testigoetik yuʼun Jehová». b Manchukme ma skʼan ya stʼun te bintik ya schʼuun te sjoye, te testigoetik yuʼun Jehová jaʼ ya schʼuunik spasel te mantalil ta Biblia ini: «Ma me xasutbeyic ta bin chopol te machʼa chopol bin ya spasbeyex; [...]. Ta ban cʼalal ya xhuʼ awuʼunic, lamaluc me awoʼtanic soc spisil ants-winiquetic» (Romano 12:17, 18).

 Te testigoonkotik yuʼun Jehová jaʼ ya jchʼuuntik spasel te mantalil ay ta Biblia te jaʼnax ya skʼan ya xnujpunotik «ta scuenta te Cajwaltique», jaʼ ya skʼan ya yal te jaʼnax ya skʼan ya xnujpunotik sok te machʼa pajal schʼuunel koʼtantik soke (1 Corintios 7:​39). Te mantalil yuʼun Dios ini, bayal bitʼil ya skoltayotik. Jich bitʼil la yalbey skʼoplal jun revista ta 2010 te ya yakʼ tsitsel ta swenta te familia sok te machʼatik nujpunemike jich la yal: «Teme pajal srelijionik, pajal te bintik ya spasik sok te bintik schʼuunejik te machʼatik nujpunemike» jteb ma spisiluk ora lek ya yil sbaik. c

 Jaʼukmeto te stestigotak te Jehová maba ya yalbeyik te jchʼuunjeletik yuʼun ta srelijion te yakuk schʼoj sbaik jilel sok te machʼa nujpunemik sok ta skaj te maba testigo yuʼun Jehovae. Te Biblia jich ya yal: «Teme ay quermanotic te ma ba schʼuhunej Dios te yihnam, pero teme jun yoʼtan cuxul soc, ma me schʼay hilel. Ha nix hich teme ay jtuhl ants te ma ba schʼuhunej Dios te smamalal, pero teme jun yoʼtan cuxul soc, ma me schʼay hilel» (1 Corintios 7:12, 13). Jaʼnix jich ya jchʼuunkotik spasel-euk te mantalil ini.