Te stestigotak te Jehová bayal ta chajp versión yuʼun Biblia stuuntesojik ta swenta snopel te Bibliae. Ta spisil-abi, jaʼ bayalxan ya yichʼik ta mukʼ te Traducción del Nuevo Mundo de la Santas Escrituras te bayal ta chajp kʼopil lokʼemixe, melel ya stuuntesbey te sbiil te Diose, toj kʼasesbil sok jamal chikan ta aʼiyel.

•   Ya stuuntesbey sbiil te Diose. Ma spisiluk te machʼatik la skʼasesik te Biblia la yichʼik ta mukʼ te Machʼa lokʼem tal ta yoʼtan te bin tsʼibaybil tey-ae. Jich bitʼil ay jun versión yuʼun Biblia te kʼaxem ta 70 ta tul ants winiketik te koltaywanik ta spasele tey tsʼibaybil sbiilik-a, jaʼukmeto ni junuk buelta la stuuntesbeyik sbiil te Machʼa lokʼem tal ta yoʼtan te bin tsʼibaybil ta Biblia te jaʼ te Jehovae.

   Jaʼukmeto te machʼatik la spasik te Traducción del Nuevo Mundo maba la slokʼesbeyik sbiil te Dios te bayal ta mil ya xchiknaj te bitʼil tsʼibaybil ta hebreo sok ta griego kʼop, sok maba la yichʼ akʼbeyel sbiilik tey-a te machʼatik koltaywanik ta skʼasesele.

•   Toj kʼasesbil. Ay Bibliaetik te maba toj kʼasesbil jich bitʼil tsʼibaybil ta hebreo sok ta griego kʼop. Jich bitʼil te ay jun Biblia te jich la skʼases ta Mateo 7:13 te jich ya yal: «Ochanik ta tut puerta, melel mukʼ te puerta sok mukʼ te be te ya x-ikʼawan bael ta infierno». Jaʼukmeto ta griego kʼop maba ya yal «infierno» jaʼnax ya yal «lajinel». Te machʼatik la skʼasesike la skuyik te ya yichʼik chikʼel ta sbajtʼel kʼinal te machʼatik chopolik ta jun infierno. Jaʼukmeto te Biblia ma jichuk ya yal. Ta swenta-abi te Traducción del Nuevo Mundo ya yal «lajinel» jichnix te bitʼil ya yal ta griego kʼop.

•   Jamal chikan ta aʼiyel. Ta melel, te bin lek kʼasesbile ma jaʼuknax toj ya yichʼ kʼasesel, jaʼnix jich ya skʼan te jamaluk ya xchiknaj ta aʼiyele. Akʼa kalbeytik junuk skʼoplal. Bayal versión yuʼun Bibliaetik te pʼalapʼal la skʼasesik te Mateo 5.3 ta kʼopiletik jich bitʼil ini: «Bayalme yutsilik te machʼatik meʼba ya yaʼiy sbaik ta yoʼtanike». Jaʼukmeto maba jamal ya xkʼot ta yoʼtanik te jlumaltike. Jaʼ yuʼun-abi ta Traducción del Nuevo Mundo jich la yichʼ kʼasesel te versículo ini: «Tseʼelnaxme yoʼtanik te machʼatik ya snaʼik te ya skʼan ya snopik te skʼop Diose».

 Ma jaʼuknax ya yichʼ ichʼel ta mukʼ sbiil te Diose, te toj ya yichʼ kʼasesel sok te jamal chikan ta aʼiyele, jaʼnix jich ay yanxan te bin maba pajal sok te Traducción del Nuevo Mundo: Jaʼ te maba tojbil te bitʼil ya yichʼ pukele. Ta swenta-abi ya xjuʼ ya skʼoponik te Biblia bayal millón ta tul ants winiketik ta skʼopiknix manchukme maʼyuk stakʼinik ta smanel jpajkuk.