Te bintik ya yichʼ alel: Te stestigotak te Jehová ma schʼuunik te Jesuse, jaʼ yuʼun ma spasbeyik skʼinul te bin ora ayine.

 Te bin smelelil: Jchʼuunejkotik te Cristoe sok kʼoem ta koʼtankotik te jaʼnax ta swenta te ya jtatik te jkoleltike (Hechos 4:12).

 Te bintik ya yichʼ alel: Ya xat te familiaetik te kʼalal ya yakʼik ta nopel te ma xjuʼ ta pasbeyel skʼinul te kʼalal ayin te Jesuse.

 Te bin smelelil: Bayal skʼoplal ta koʼtankotik te bitʼil jaʼ la schiknajtes Dios te familiae jaʼ yuʼun ya kakʼkotik ta nopel te mantaliletik ay ta Biblia te ya yakʼbey yip yoʼtan te familiaetike.

 Te bintik ya yichʼ alel: Ma yaʼiybeyik yutsil te bin lek ya xlokʼ-a te spasbeyel skʼinul te bin ora ayin te Jesuse, jich bitʼil te slekil-oʼtanil, lamal kʼinal sok te jun-oʼtanil te ya jtatik ta yorail-abi.

 Te bin smelelil: Ta spisil ora ya jpaskotik tulan ta yakʼel ta ilel te lamal kʼinal sok te slekil-oʼtanil (Proverbios 11:25; Romanos 12:18). Jich bitʼil te maba ya jkʼankotik takʼin te banti ya jtsob jbakotike sok maba ya jkʼan jtojolkotik te kʼalal ya jcholkotik te skʼop Diose, melel jaʼ jchʼuunejkotik te mantalil la yal te Jesús: «Ta mahtanil la awichʼic, hich ni me ta mahtanil yac awaqʼuic» (Mateo 10:8). Jaʼnix jich ya jcholkotik te jaʼnax ya yakʼ talel lamal kʼinal ta pajel chaʼbej te Ajwalinel yuʼun te Diose (Mateo 10:7).

•   Te Jesuse la yal ta mantal te jaʼnax ya yichʼ naʼel te bitʼil laje, ma jaʼuk te kʼalal ayine (Lucas 22:19, 20).

•   Te jpuk-kʼopetik sok te sbabial jchʼuunjeletike ma la spasbeyik skʼinul-euk te bin ora ayin te Jesuse. Te Diccionario del cristianismo ya yal ta swenta te kʼin ini te «chiknaj ta Roma ya jaʼbil 330» ta kʼajkʼaleltik, te kʼalal kʼaxemix cheb siglo slajel-a te slajibal jpuk-kʼope.

•   Maʼyuk banti ya xchiknaj te yuʼunix ayin ta 25 yuʼun diciembre te Jesuse, ta melel, te Biblia ma xyal te bin ajtalil ayine.

•   Kʼoem ta koʼtankotik te ma lekuk ya yil Dios te kʼin ini, melel lokʼem tal ta costumbreetik sok ta lotil relijionetik (2 Corintios 6:17).

 Manchukme ya jnaʼtik te maba lokʼem ta Biblia te pasbeyel skʼinul te bin ora ayin te Jesuse, sok te bitʼil lokʼem tal ta lotil relijione, bayal machʼatik ya snopik te maʼyuk lek skʼoplale sok jaʼ ya stʼunik te bin ya spasik te bayal ants winiketike.

 Te Biblia ya skoltayotik ta stuuntesel ta lek te snopjibal kuʼuntik yuʼun jich lek-a te bintik ya jtatik ta nopele (Romanos 12:1, 2). Soknix ya skoltayotik yuʼun jich ay skʼoplal ta koʼtantik-a te bin smelelile (Juan 4:23, 24). Ma yuʼunuk maʼyuk skʼoplal ta koʼtankotik te bin ya yalik te yantike, jaʼukmeto maba ya jkʼaxuntaytik te mantalil yuʼun te Biblia ta skajnax te ya jtʼuntik te bin ya spasik te bayal ants winiketike.

 Melelnix-a te maba ya jpasbeykotik skʼinul te bin ora ayin te Jesuse, jaʼukmeto tulutul ya snopik te ants winiketik te bin ya spasike. Ta swenta-abi maʼyuk machʼa ya kalbeykotik te ma xjuʼ ya spasik te kʼin ini.