Maʼuk. Te testigoonkotik yuʼun Jehová jaʼ jchʼuuntik te bin ya yal te Bibliae. Manchukme ay relijionetik ya yalik te jich albil jilel skʼoplal ta Biblia te junax ya stsob sbaik yan buelta te judioetik ta Palestinae, te testigoonkotik yuʼun Jehová maba jich jnopojkotik-abi. Jich bitʼil te maʼyuk albil skʼoplal ta Biblia te jich ya xkʼot ta pasele, jaʼ yuʼun maba ya jchʼuuntik. Te Biblia maba ya skoltaybey skʼoplal jtul ajwalil ni ta swenta jtsob ants winiketik. Te revista La Atalaya te jaʼ spasojik te testigoetik yuʼun Jehová tey ya yalbey skʼoplal-a te «maʼyuk ya yal te Biblia te ya xbajtʼik ta nainel ta Palestina te judiotike».

 Te Encyclopædia Britannica ya yal te «yuʼunlaj ya skʼan ya sjachik yachʼil jpam nación ta Palestina te judioetike». Te snopjibal yuʼunik-abi talem ta swenta relijionetik sok ta política. Te testigoonkotik yuʼun Jehová maba ya jchʼuuntik te bin schʼuunej yoʼtanik ta swenta te ya xbajtʼik ta nainel ta Palestina sok kʼaxel maba ya jchʼik jbatik ta swenta te política yuʼunike.

 Te organización yuʼun te stestigotak te Jehová jaʼnax ya yalbey skʼoplal ta swenta skʼop Dios, maba ya schʼik sbaik ta política, teynixme ochem skʼoplal-a te bitʼil ya xbajtʼik ta nainel ta Palestina te judiotike. Naʼbil jbakotik ta lek ta swenta te kʼaxel maba ya jchʼik jbatik ta política sok jaʼ ta skaj te jtaojtik tulan nutsel ta chaʼoxpam nacionetik. Kʼoem lek ta koʼtankotik te maʼyuk jtuluk ajwalil o jtsojb ants winiketik yuʼun ya yakʼik lamal kʼinal ta spisil-ora liʼ ta Balumilal. Te machʼanax ya xjuʼ ya yakʼ-abi, jaʼ te Ajwalil tsabil yuʼun te Dios te ay ta chʼulchane.

 Ay jun mantalil te ya jpaskotik ta jkuxlejalkotik jich bitʼil te testigoonkotik yuʼun Jehová, jaʼ te ya jchʼuunbeykotik te leyetik yuʼun te ajwaliletike, manchukme yanyantik-a te banti ayonkotik ta nainele. Maʼyuk jtuluk testigo yuʼun Jehová te ya skʼaxuntaybey smantal te machʼatik yichʼoj mukʼ yaʼtelik sok maba ta stsak yaʼtejibik yuʼun milaw.