Maʼuk, te stestigotak te Jehová ma jaʼukik jun secta. Te joʼonkotike jchʼuunjelotik yuʼun Cristo te ya jpaskotik tulan ta skʼayinbeyel stalel te Jesús sok ya jpaskotik te jkuxlejalkotik te bintik la yakʼ ta nopele.

 Ay chaʼoxchajp te bintik ya snopik ta swenta te jun secta. Akʼa kiltik cheb swentail te bin-yuʼun te maba jaʼik jun secta te stestigotak te Jehovae.

•   Ay chaʼoxtul ya yalik te jaʼlaj jun secta teme jaʼ jun yachʼil relijion sok teme maba ya spasikix te costumbreetik yuʼun te relijionetike. Te testigoonkotik yuʼun Jehová maba la jachtik jun yachʼil relijion. Jaʼ ya jkʼayinbeytik stalelik te sbabial jchʼuunjeletik yuʼun Cristo sok te bintik la yakʼik ta nopel, te jamal ya yalbey skʼoplal ta Bibliae (2 Timoteo 3:16, 17). Kʼoem ta koʼtantik ta lek te jaʼ ya yalbotik te Biblia bitʼil ya skʼan ichʼel ta mukʼ te Diose.

•   Ay chaʼoxtul ya yalik te jaʼlaj jun secta teme jaʼ jun grupo te ya sjachik kʼop sok te ya schʼuunbeyik skʼop jtul jwolwanej yuʼunike. Jaʼukmeto te testigoonkotik yuʼun Jehová maba ya jtʼunkotik jtul ants o winik, melel jaʼ jchʼuunejkotik te bin la yal te Jesús ta stojol te jnopojeletik yuʼune: «Jtuhl nax te Maestro [o Jwolwanej] awuʼunic, ha te Cristo» (Mateo 23:10).

 Maba ya jachkotik kʼop, te bintik ya jpaskotik ta jrelijionkotik ya xtuun kuʼunkotik soknix ta swenta-euk te yantik ants winiketike. Jich bitʼil te ya kakʼkotik nojptesel yuʼun te Bibliae, jkoltayejkotik bayal ants winiketik yuʼun ta yijkʼitayik te trago sok drogaetik. Ma jaʼuknax te ya jcholkotik te skʼop Diose, jaʼnix jich ta swolol Balumilal ya kakʼbeykotik snopik jun te ants winiketike, ta swenta-abi bayal millón ta tul te machʼatik snopojik stsʼibayel sok skʼoponel te june. Soknix ya kakʼkotik koltayel te kʼalal ay ya xkʼax wokolil te bayal bintik ya sjin jilele. Ya jpaskotik tulan ta spasel te bintik lek ta stojol te jpatxujktike, jich bitʼil la yakʼ ta nopel te Jesuse (Mateo 5:13-16).