Lek. Te testigoetik yuʼun Jehová maba ya skontrainik te yichʼel vacunae. Tulutul te j-abatetik yuʼun Dios ya staik ta nopel teme ya yichʼik o maʼuke. Bayal testigoetik yuʼun Jehová ya staik ta nopel te ya yichʼik te vacunae.

 Jaʼ ya jletik te lekil poxtayel sok mukʼ skʼoplal ya kiltik te bin ya spas te ciencia ta staelxan poxiletik ta swenta te tulan chameletik. Ya kaltik bayal wokol yuʼun te tulan aʼtel ya spasik te doctoretik, kʼaxtoxan-a te ta yorail tulan wokolile.

 Te testigoetik yuʼun Jehová ya schʼuunbeyik smantal te j-aʼtel patanetik ta swenta te ya skʼan ya jkanantay jbatike. Jich bitʼil, jaʼto te kʼalal jajch te tulan chamel yuʼun te COVID-19, te testigoetik yuʼun Jehová yakʼojik ta naʼel ta bayal ta chajp kʼopiletik ta página ini, te mukʼ skʼoplal te ya jkanantay jbatik ta swenta te chamele. Ya yichʼ alel te ya skʼan jchʼuuntik te mantaliletik ta swenta te maba ya jtsob jbatike sok te ya kichʼtik ta mukʼ te cuarentena, jaʼnix jich ya yichʼ alel te ma skʼan ya jlakʼ jbatik sok te yantik, te ya skʼan ya jpok jkʼabtik sok te ya jtuuntestik te cubreboca sok yantikxan te yaloj te j-aʼtel patanetike (Romanos 13:1, 2).

 Ta bayal jaʼbil, te junetik te spasojik te testigoetik yuʼun Jehová yalojbeyik skʼoplal te tojobteseletik ini te lokʼemik ta Biblia:

•   Te skanantayel jbatik, tulutul ya jtatik ta nopel (Gálatas 6:5).

   «[Te revista ini] maba ya yal bintik poxiletik ya skʼan ya kichʼtik te jaʼ lekxan te bitʼil yantike. Te bin swentaile, jaʼ te ya scholbey skʼoplal te bin ya yalik te doctoretik, jaʼ yuʼun te machʼa ya skʼopon te revista jaʼ ya sta ta nopel te bin ya spase» (¡Despertad!, 8 yuʼun febrero 1987).

   «Snaʼel teme ya awichʼ vacuna sok te awal anichʼnabe, jaʼme ay ta awenta stael ta nopel» (¡Despertad!, 8 yuʼun diciembre 1965).

•   Ya jletik poxtayel melel bayal skʼoplal ya kiltik te jkuxlejaltike (Hechos 17:28).

   «Te testigoetik yuʼun Jehová ya stuuntesik te poxiletik ya yakʼik te doctoretik yuʼun ya stabeyik spoxil te chamel yuʼunike. Mukʼ skʼoplal ya yil te skuxlejalik sok ya spasik tulan ta skanantayel chikan bantito kʼalal ya xjuʼ ta pasel» (La Atalaya, 1 yuʼun mayo 1976).

   «Lek ya kiltik teme ya xbootik ta stojol te doctoretik yuʼun maba ya stsakotik chamel sok te jich ya jkanantaytik te jkuxlejaltike. Te testigoetik yuʼun Jehová maba ya skontrainik te poxiletik ya yakʼik te doctoretike. Jich bitʼil te Lucas te jaʼ jtul jchʼuunjel yuʼun Cristo ta sbabial siglo aʼtej ta jpoxtaywanej, jaʼnix jich ay Testigoetik te ya x-aʼtejik ta doctor [...]. Te testigoetik yuʼun Jehová mukʼ skʼoplal ya yilik te poxtayel ya yichʼik yuʼun te doctoretik sok ya yalik wokol yuʼun te tulan ya x-aʼtejike» (La Atalaya, 1 yuʼun Febrero 2011).