Te Watch Tower Bible and Tract Society of Pennsylvania, jaʼ jun organisasion te maba ya spas ganar takʼin te chiknaj ta yaʼbilal 1884 jich bitʼil ya yalbey skʼoplal te mantaliletik yuʼun te estado yuʼun Pensilvania (Estados Unidos). Te stestigotak Jehová ya stuuntesik te sbiilik te yakʼojik ta stojol ajwalil yuʼun jich ya spasik te aʼtelil yuʼunik ta swolol Balumilal, jich bitʼil spasel Bibliaetik sok junetik te lokʼemik ta Biblia.

 Te bin ya spas te Watch Tower jaʼ ta «swenta relijion, pʼijubtesel sok yakʼel koltayel». Te bin tulanxan skʼoplal ya spase jaʼ «te aʼtelil yuʼun scholel skʼop Dios sok te yakʼel ta nopel te lek yachʼil kʼop yuʼun te Ajwalinel yuʼun Dios te jaʼ ay ta swenta te Jesucristo». Te kʼalal ay machʼa ya xkʼot ta swinkilel te organisasion-abi, jaʼnax te machʼatik ya yichʼik ikʼele, ma jaʼuk ta swenta te jayebto takʼin la yakʼike. Te machʼatik swinkilel te organisasione sok te jwolwanejetike, jaʼ ya yakʼbeyik koltayel te Jtsojb Jwolwanejetik yuʼun te stestigotak Jehová.

 Ta bayal ta pam nasionetik te stestigotak Jehová ay bayal te banti yakʼoj sbiilik ta stojol te ajwaliletike, ma jaʼuknax te Watch Tower Bible and Tract Society of Pennsylvania. Ay yotsesojik jich bitʼil “Watch Tower”, “Watchtower” o te bitʼil ya yichʼ kʼasesel ta yantik kʼopil.

 Jaʼto te kʼalal chiknajike bayal bintik lek kʼoem ta pasel yuʼun. Jich bitʼil ini:

•   Tsʼibajel sok pasel junetik. Ayniwan jpukojtik 220 miyon ta pajk Bibliaetik sok jteb ma sta 40 mil miyon junetik te lokʼemik ta Biblia te kʼaxem ta 700 ta chajp kʼopil. Ta swenta te pajina jw.org te ants winiketik ya xjuʼ ya skʼoponik te Biblia ta Internet te maba tojbil te ay ta 120 ta chajp kʼopil. Jaʼnix jich ya stabeyik sujtib jojkʼoyeletik tey-a, jich bitʼil «¿Bin-a te Ajwalinel yuʼun Dios?».

•   Pʼijubtesel. Ya kakʼkotik pʼijubtesel ta swenta Biblia. Jich bitʼil kʼalalto ta yaʼbilal 1943 te Pʼijubtesel yuʼun sKʼop Dios ta Galaad yuʼun Watchtower schajpanoj kʼaxem ta 8,000 ta tul testigoetik yuʼun Jehová te yakik ta aʼtel ta misionero o yakik ta yakʼbeyel koltayel te aʼtelil ya yichʼ pasel ta swolol Balumilal yuʼun jich lek ya xlokʼ te bintik ya yichʼ pasele. Jaʼnix jich bayal miyon ta tul ants winiketik ya yichʼik pʼijubtesel ta tsoblejetik te ya yichʼ pasel ta jujun semana ta kongregasionetik, manchukme mato testigoetik yuʼun Jehová. Soknix ya yichʼ chajpanel pʼijubtesel ta swenta snopel tsʼibajel sok skʼoponel jun sok ay jpasojtik foyeto ta swenta-abi te lokʼem ta 110 ta chajp kʼopil.

•   Yakʼel koltayel. Ya kakʼbeykotik te bintik ya xtuun yuʼunik te ants winiketik te kʼalal ya staik tulan wokolil. Jich bitʼil la kakʼbeykotik koltayel te ants winiketik te la staik wokol ta skaj te machʼatik la smil sbaik ta Ruanda ta yaʼbilal 1994 sok te kʼalal kʼax tulan nijkʼel ta Haití ta 2010.

 Manchukme ay bayal bintik lek lokʼem kuʼunkotik-a te bitʼil kakʼojbeytik sbiil ta stojol ajwalil te organisasion kuʼuntike, jaʼukmeto te aʼtelil ya jpaskotike maba tey ya xtal-a te koltayel kuʼunkotike. Ta jujuntul jchʼuunjeletik jaʼ ay ta swentaik scholel te skʼop Dios sok ta yakʼbeyel snop te ants winiketik te bintik ya yal te Bibliae (Mateo 24:14; 28:19, 20). Kʼoem lek ta koʼtantik te jaʼ Dios te yak ta yakʼbeyel koltayel te aʼtelil kuʼunkotike sok ya yakʼ chʼiukxan bael (1 Corintios 3:6, 7).