Yak, Te testigoonkotik yuʼun Jehová spisil-ora ya jkoltaykotik te machʼatik ya staik wokolil te kʼalal ay bin ya xkʼax ta Balumilal te bayal bintik ya sjin jilele. Ya jkoltaykotik te kermanotaktik soknix te yantik ants winiketik jichnix bitʼil ya yal te Biblia ta Gálatas 6:10: «Acʼa jpastic te bin lec ta pasel ta stojol spisil yantic, soc cʼax hich a ta stojol te machʼatic pajal ay schʼuhunel coʼtantic soque». Jaʼnix jich ya kakʼbeykotik smukʼul yoʼtanik sok ya jkoltaykotik ta swenta te bin yaʼiyel ya yaʼiy sbaike, melel kʼaxtoxan ya xtuun yuʼun-a te kʼalal yorail wokolile (2 Corintios 1:3, 4).

 Te kʼalal ay bin ya xkʼax ta Balumilal te bayal bintik ya sjin jilele, te ancianoetik jaʼ ya yil te bitʼil ayik sok te bintik ya xtuun yuʼunik spisil te jayeb machʼatik ay ta scongregacion. Jich ya yalik bael ta Betel te bitʼil ay te wokolile soknix te koltayel yakʼojik ta swenta-abi.

 Teme ma xjuʼ yuʼun te congregacionetik ta yakʼbeyel koltayel te machʼatik la staik wokolile, te Jtsojb Jwolwanejetik yuʼun te stestigotak te Jehová jaʼ ya schajpan te bitʼil yichʼ akʼel te koltayele. Te Betel ya stsa comiteetik yuʼun ya schajpanik te bitʼil ya yichʼ akʼel te koltayele, sok ay testigoetik yuʼun Jehová ta yan lumetik te ya yakʼ stiempoik sok stakʼinik ta yakʼel koltayel (Proverbios 17:17). Jichnix la yichʼ pasel-euk ta sbabial siglo te kʼalal kʼax tulan wiʼnal ta stojolik te jchʼuunjeletik yuʼun te Cristoe (1 Corintios 16:1-4).

 Ay ya yichʼ tikunel bael te majtʼanil takʼin ta Betel yuʼun te stestigotak te Jehová yuʼun ya yichʼ koltayel-a te machʼatik ya staik te wokolil ini (Hechos 11:27-30; 2 Corintios 8:13-15). Te machʼatik ya xkoltaywanike maba ya skʼan stojolik, jaʼ yuʼun te majtʼanil takʼin te ya yichʼ akʼele jaʼnax ya xtuun ta swenta te machʼatik ya staik te wokolile sok yame yichʼ tuuntesel ta lek te takʼine (2 Corintios 8:20).