Ayinon ta mukʼul lum yuʼun Calgary ta Alberta (Canadá). Te kʼalal chʼinonto-ae, te jmeʼ jtat la yijkitay sbaik. Te jmama sok te joʼone bootik ta nainel ta sna te jmamuch sok te jchuchuʼ. Bayal skʼuxul yoʼtanik ta jtojoltik, spisil-abi bayal la yakʼbon stseʼelil koʼtan, melel bayal lamalkʼinal-a. Spisil-ora ya xjul ta koʼtan-abi.

 Te kʼalal jukeb kaʼbilal-ae, jelon ta jkʼaxel te jkuxlejal. Te jmama chaʼnujpun sok te jpapa, sok bootik ta nainel ta San Luis, Misuri (Estados Unidos). Ta oranax la kil te ma lek ta jkʼaxel stalel te jtate. Ta sbabial buelta te kʼoon ta escuela sok te kʼalal sujtonix ta jna-ae, te jpapa la snaʼ stojol te la smajon chaʼoxtul alaletik ta escuela, pero maba la jkoltay jba. Jaʼ yuʼun ilin ta jkʼaxel te jtate sok tulanxan la smajon. Te bin la spase la snojpteson ta majtamba-euk.

 Te schopol talel te jtate bayal ya yakʼ x-ilin te jmama, ta bayal buelta ya yut sbaik sok ya smaj sbaik. Te kʼalal 11 kaʼbilal-a, jajch jtuuntes drogaetik sok yuchʼel trago. Oranax ya x-ilinon sok ya kaʼiy majtamba ta calleetik. Kʼalal laj kuʼun te secundaria, kʼax jinemix-a te jtalele.

 Kʼalal ayix 18 kaʼbilal-a, ochon ta soldado ta Infantería de Marina ta Estados Unidos, bayal ya x-utsʼinwanon-a sok tey la jnop milaw. Joʼeb jaʼbil ta patil lokʼon ta soldadoil sok och jnop Psicología swenta jich ya xjuʼ ya x-ochon ta aʼtel ta FBI. Ochon ta universidad ta Estados Unidos, ta patil ta Canadá.

 La schebajtesbon koʼtan te universidad, jich yilel te ants winiketik kʼax bayal sbikʼtal yoʼtanik. Maʼyukix bin ay skʼoplal ya kil, jich yilel te ma xchajpajix te wokoliletik ta balumilal. Ma schʼuunix koʼtan-a te jaʼ ya schajpanik wokoliletik te ants winiketik.

 Kʼalal la kil te maʼyuk skʼoplal te kuxlejalil, jajch jtuuntesxan droga sok la kuchʼxan bayal trago. Jaʼnax bajt ta koʼtan sleel takʼin, spasel mulwej, te ya xboon ta kʼinetik sok te bayal machʼatik ya jokin ta wayel. Te bitʼil la jnop ta lek majaw te kʼalal soldadoon-a machʼauknax ya jmaj jba sok. Te kʼalal ya kil te ay machʼa ya yichʼ utsʼinel, oranax ya kakʼbey spakol, jkuyoj-a te jaʼ stojil te bin yakon ta spasele. Jich kʼoem-a te mosoinbilon yuʼun te utsʼinwanej.

 Ta jun buelta, te joʼon sok te kamigo bayal la jtuuntestik droga, ayotik ta jna ta schajpanel jun paquete yuʼun marihuana te muken ya jchontik. Te kamigo la sjojkʼoybon teme ya jchʼuun te ay Diose. Jich la kalbey: «Teme jaʼ smul te Dios te ay wokolil ta Balumilal, ¡ma jkʼan ya jnaʼbey sba!». Ta yan kʼajkʼal, te sbabial buelta boon ta kaʼtel, te joy ta kaʼtel te jaʼ testigo yuʼun Jehová jich la sjojkʼoybon: «¿Yabal akuy te jaʼ smul Dios te ay wokolil ta Balumilal?». Chajpnax la kaʼiy-a, melel wojeytonax te jich yakon ta snopilanel. La jkʼan la jnaʼbey sujtib. Te wakebxan u kʼax baele bayal bintik la jojkʼoybey, sok la stuuntes te Biblia yuʼun ya yakʼbon sujtib.

 Te achʼix te jokinoj ta nainel-a ma smulan te ya jcholbey yaʼiy te bin yakon ta snopel ta Biblia. Ta jun domingo la kalbey te ya xtalik ta jnatik te Testigoetik yuʼun ya snojptesotik ta Biblia. Ta yan kʼajkʼal, kʼalal sujton tal ta kaʼtel, maba tey ayix-a, la yichʼ bael spisil te sbiluk. Lokʼon bael ta calle sok jajchon ta okʼel. La jkʼanbey te Dios te yakuk skoltayone, jaʼ te sbabial buelta la kalbey sbiil te Jehová ta oración (Salmo 83:18).

 Cheb kʼajkʼal ta patil, jtul hermano sok yinam jajch snojptesonik ta Biblia. Kʼalal bajtik, jil jkʼopon te libro te la jtuuntestik ta snopel te Biblia, jaʼ te libro Usted puede vivir para siempre en el paraíso en la Tierra. a La jkʼopon spisil ta jun-nax ajkʼabal. Bayal la jmulan te bin la jnop ta swenta te Jehová sok te Jesucristo. Kʼot ta koʼtan te ya snaʼbotik yoʼbolil jbatik te Jehová sok te kʼux ya yaʼiy te ya xkʼaxotik ta wokol (Isaías 63:9). Te bin la stijbonxan koʼtan jaʼ te la jnaʼ te kʼuxon ta yoʼtan te Dios sok te laj ta jtojol te sNichʼan (1 Juan 4:10). Kʼot ta koʼtan te yak smaliybelon-a te Jehová, «melel ma skʼan te ni jtuluk ya yichʼ lajinel, jaʼ ya skʼan te yakuk sujtes yoʼtanik ta spisilik» (2 Pedro 3:9). Jich la kaʼiy te jaʼ ya skʼan te Jehová te ya xnoptsajon ta stojol (Juan 6:44).

 Jaʼnix ta semana-abi jajchon ta bael ta tsoblejetik. Najt-a te stsotsel jol sok ay stakʼinal jchikin, yaniwan xiwik yuʼun te kʼalal ya yilonike. Pero, te Testigoetik jich la yilonik bitʼil sfamiliaik te ayix tiempo ma xyilike. La yakʼik ta ilel te jaʼik te smelelil jchʼuunjeletik yuʼun Cristo, kʼax lek la kaʼiy jba tey-a jich te bitʼil la kaʼiy jba te kʼalal ayon ta sna te smeʼ stat te jmama, pero kʼaxtoxan lek la kaʼiy jba sok te hermanoetik.

 Oranax la slekubtesbon jtalel te bin la jnop ta Biblia, la jsetʼ te stsotsel jol, la kijkitay te spasel mulwej, te yuchʼel trago sok te stuuntesel droga (1 Corintios 6:9, 10; 11:14). Jaʼ ya jkʼan te tseʼeluk yoʼtan ta jtojol te Jehová. Jaʼ yuʼun, te kʼalal ya jnop te ay jun talelil kuʼun te ma lek ya yil te Diose, maba ya jmak jba ta kʼop. Bayal ya jmel koʼtan yuʼun-a sok jich ya jnop ta koʼtan: «Maʼyuk bin-ora ya jpasix ini». Oranax ya jpas tulan yuʼun ya jeltay te snopojibal kuʼun sok te jtalel. Ta swenta te jich la jpas, la jta ta ilel te ya jtatik lekilal kʼalal ya jpastik te bin lek ya yil te Jehová. Wakeb u ta patil te kʼalal jajch jnop te Biblia, ta 29 yuʼun julio ta 1989, la kichʼ jaʼ bitʼil testigo yuʼun Jehová.

 Te Biblia skoltayojon ta sjeltayel te jtalel. Ta nailal, kʼalal ay bin chopol ya spasbonik, oranax ya x-ilinon, ma jnaʼ skomel jba. Ta ora ini ya jpasix tulan yuʼun lamaluk koʼtan sok spisil te ants winiketik (Gálatas 5:22, 23; Hebreos 4:12).

 Ma jaʼuk mosoinbilonix yuʼun te droga, te utsʼinwanej sok te mulwej. Ta ora ini ya jpasix tulan yuʼun ya kakʼbey stseʼelil yoʼtan te Jehová sok te lekuk te bin ya kakʼbeye jich bitʼil te ya jkoltay te yantik ta snaʼbeyel sba te Jehová. Cheʼoxeb jaʼbil ta patil te kʼalal kichʼojix jaʼ-ae, boon ta yan nación ta scholel skʼop Dios te banti maʼyuk bayal jcholkʼopetik. Te jayeb jaʼbil kʼaxemix tal, bayal machʼatik kakʼojbey nojptesel ta Biblia sok kiloj bin-utʼil sjeltayoj te skuxlejalike. Yanxan te bin ya yakʼbon stseʼelil koʼtan jaʼ te och ta testigo yuʼun Jehová te jmama. Te bin tijbot yoʼtan yuʼune jaʼ te la yil te lekub te jtalel.

 Ta 1999 la kichʼ pʼijubtesel ta Escuela yuʼun Evangelizador ta El Salvador. Tey la jnop scholel ta lek te skʼop Dios, ta snojptesel sok ta skanantayel te congregación. Ta patil, ta jaʼbilnix-abi nujpunon sok te Eugenia. Ta ora ini, ta jchebaltik ya x-abatinotik ta Guatemala ta tiempo completo.

 Ta ora ini ayix skʼoplal ya kil te kuxlejalil sok bayal stseʼelil koʼtan. Te bitʼil jchʼuunoj spasel te bin ya yal te Biblia libre ya kaʼiy jba, maba ya x-utsʼinwanonix sok maba ya jpasix mulwej. Ta swenta-abi ayix lamalkʼinal sok kʼuxul oʼtanil ta jkuxlejal.