Te Zarina kuxinem ta Rusia-a te kʼalal la yichʼ jaʼ sok och ta testigo yuʼun Jehová. Ta patil sujt bael ta slumal ta Asia Central. Snopoj ta yoʼtan te ya snojptes te chaʼtul achʼixetik yuʼun te bin snopoj ta Biblia. Ta skaj te maʼyuk bayal stakʼin te Zarinae, bajt ta kuxinel ta chʼin na sok te smeʼ stat, te sbankil sok te sjawane. Albot yuʼun te smeʼ stat te manchuk ya snojptes ta Biblia te chaʼtul achʼixetik yuʼune, jaʼnix jich la yalbeyik te chaʼtul achʼixetik te manchuk ya yalbeyik skʼoplal te religión.

 Te Zarina ma snaʼ-a te bitʼil ya skoltay te yalatak yuʼun ya snaʼbeyik sba te Jehová (Proverbios 1:8). Jaʼ yuʼun bayal la skʼanbey te Dios te yakuk x-akʼbot spʼijil yuʼune. Te Zarina jajch ta lokʼel ta paxial sok te yalatak yuʼun ya yalbey skʼoplal te bintik tʼujbil spasoj te Jehová. Ta swenta te jich la spase jajch snaʼbeyikxan sba te Jpaswaneje.

 Ta patil te Zarina tal ta yoʼtan bitʼil ya xjuʼ ya snojpteslan sok te libro ¿Bin ya yakʼ ta nopel ta smelelil te Bibliae? a La stsʼibay ta chʼin jun te parrafoetik sok te jojkʼoyeletik sok chaʼoxpʼalnax kʼopetik yuʼun ya xkʼot ta yoʼtanik-a. La snakʼ te chʼin jun-abi sok jun lápiz ta yeʼtal lavadora te ay ta baño. Kʼalal ya x-ochik ta baño te achʼixetike ya skʼoponik te chʼin junetik sok ya stsʼibayik jilel te sujtib yuʼunike.

 Te jayeb kʼajkʼal jich kuxin te Zarina, la snopik cheb capítulo yuʼun te libro ¿Bin ya yakʼ ta nopel ta smelelil te Bibliae? Te kʼalal stukelikix-ae maʼyuk machʼa makotix yuʼun ta yakʼel te nojptesele. Ta octubre ta 2016, te chaʼtul achʼixetik yuʼun te Zarina la yichʼik jaʼ, bayal la yalik wokol yuʼun te la spas tulan te smamaik yuʼun ya snopik te Bibliae.