Ay jun triángulo púrpura ta skʼuʼik

TSUMA TA

Ay jun triángulo púrpura ta skʼuʼik

Te Maud jaʼ jtul testigo yuʼun Jehová te kuxinem ta Francia sok ya x-aʼtej ta jun escuela ta skoltayel te chʼin alaletik te ayik ta chamel. Mato jaluk, te maestro la scholbey skʼoplal ta swenta te Holocausto sok te campoetik yuʼun concentración nazi. La yal te spisil te machʼatik chukulik ay bin tsʼisbil ta skʼuʼik. Ta swenta te sbonil sok te smukʼul te bin tsʼisbil ta skʼuʼik jaʼ ya yakʼ ta ilel te bin yuʼun te chukulike.

Kʼalal la yalbeyik skʼoplal ta swenta te triángulo púrpura te tsʼisbil ta skʼuʼike, te maestro jich la yal: «Jaʼwan ya x-akʼbotik-a te machʼatik sjoynix ta winikil o ta antsil te ya smulan sbaike». Kʼalal laj te clase, te Maud bajt ta kʼop sok te maestro sok la scholbey ta alel te triángulo púrpura jaʼ ya x-akʼbot stuuntesik-a te testigoetik yuʼun Jehová. a Jaʼnix jich la yal te ya skʼan ya scholbeyxan skʼoplal ta swenta-abi. Te maestro lek la yaʼiy, sok te yakuk scholbey yaʼiy te jnop junetike.

Jaʼnix jich, jtul maestra la stuuntes te bin la yal sok la yakʼ ta ilel te yanyantik señail te tsʼistiklanbil ta skʼuʼik te jchukeletike. Chikan ta ilel te Testigoetik jaʼ ya stuuntesik-a te triángulo púrpura. Jaʼ yuʼun, te Maud la sjapbey te maestra te ya skʼan ya scholbeyxan skʼoplal ta swenta-abi. Te maestra leknax la yaʼiy sok la yalbey te yakuk schol ta alel ta stojol te jnop junetike.

Te Maud ya yakʼbel ta ilel te publicacionetik te la stuuntes.

Ta sbabial buelta te la schol ta alel te Maud, te s-exposición jaʼnax la schajpan yuʼun 15 minuto, pero, kʼalal kʼot yorail, albot: «Ay jun ora awuʼun yuʼun ya achol kaʼiytik». Te Maud jach yakʼ ta ilel jun video ta swenta te utsʼinel te la sitintayik te testigoetik yuʼun Jehová ta skʼab te nazietik. Tey ta video la yal bitʼil te nazietik la spitik te 800 ta tul chʼin alaletik ta stojol te smeʼ statik, te Maud la skejchan te video sok la schol ta alel te bin kʼax ta stojol oxtul chʼin alaletik Testigoetik. Ta patil, te Maud la skʼopon jun carta te la stsʼibay ta 1940 te Gerhard Steinacher te jaʼ jtul yuʼun testigo yuʼun Jehová te 19 yaʼbilal te talem ta Australia, la stsʼibay tecarta ini ta stojol te smeʼ stat te kʼalal nopol ya yichʼix milel-a yuʼun te nazietik. b

Ta schebal clase, te Maud jaʼnix jich la scholbey skʼoplal. Ta swenta te bitʼil ma xiw yoʼtan, te chaʼtul maestroetik ta ora ini ya yalbeyik skʼoplal te testigoetik yuʼun Jehová kʼalal ya scholbeyik skʼoplal ta swenta te machʼatik la yichʼik utsʼinel ta campoetik yuʼun concentración nazi.

a Te testigoetik yuʼun Jehová ta Alemania te naʼbil sbaik bitʼil Bibelforscher (Estudianteetik yuʼun Biblia) ta swenta te maba ya skoltayik te nazietik. Ta Schebal Guerra Mundial, la yichʼik tikunel bael ta campoetik yuʼun concentración nazi.

b Te Gerhard Steinacher la yichʼ milel ta swenta te maba la skʼan och ta ejército yuʼun alemán. Jich la stsʼibay jilel: «Kʼax jchʼielonto. Jaʼnax teme ya yakʼbon kip te Dios ya xkujch kuʼun, jaʼ yuʼun jkʼanbeyoj te koltayele». Ta yan kʼajkʼal, la yichʼ milel. Ta smukenal jich ya yal: «Cham ta swenta yutsilal Dios».