Te Irma jteb ma sta 90 yaʼbilal sok yak ta kuxinel ta Alemania. Ma xjuʼ ya scholix skʼop Dios ta nanatik, melel staoj cheb accidente sok yichʼoj bayal operación. Pero ya stsʼibaybey carta te sfamilia sok te machʼatik ya snaʼbey sbae. Bayal machʼatik ya sta smukʼul yoʼtanik ta swenta te cartaetike, jaʼ yuʼun ya yalbeyik te bin-ora ya schaʼtikun tal yane. Jaʼnix jich, bayal machʼatik ya stsʼibaybeyik tal chʼin junetik banti ya yalik wokol sok ya skʼanikxan yan carta. Jich ya yal te Irma: «Jaʼ-abi yakʼojbon stseʼelil koʼtan, jich ma jkomoj jba ta scholel skʼop Dios».

 Jaʼnix jich, te Irma ya stikunbey carta te machʼatik yakik ta nainel te banti ya yichʼik kanantayel te meʼel mamaletike. Jich ya yal: «Jtul ants te ayix yaʼbilale la skʼoponon tal sok la yalbon te la sta smukʼul yoʼtan ta swenta te carta te la jtikunbeye, melel laj te smamalale. Skʼejoj ta sBiblia te cartae sok ya skʼopon ta jujun mal kʼajkʼal. Yan ants te mato jaluk slajel-euk te smamalale la yalbon te jaʼ bayalxan koltayot yuʼun te carta te la jtikunbeye, ma jaʼuk te bin albot yuʼun te sacerdotee. Bayal bintik ya skʼan ya snaʼ te antse sok la yalbon teme ya xjuʼ ya xtal yulaʼtayone».

 Jtul ants te ya snaʼbey sba te Irmae bajt ta kuxinel ta yan lugar sok la yalbey te yakuk xtikunbot bael cartaetik yuʼune. Te Irma jich ya yal: «Te antse la skʼej spisil te cartaetik la jtikunbeye. Te kʼalal laje, te yantsil-al la skʼoponon tal. La yalbon te la skʼopon spisil te cartaetik te la jtikunbey te smamae sok la yalbon te yakuk jtikunbey bael cartaetik-euk».

 Kʼax bayal ya smulan scholel skʼop Dios ta swenta cartaetik te Irmae. Jich ya yal: «Ya jkʼanbey te Jehová te yakuk yakʼbonxan kip ta abatinel ta stojol. Manchukme ma xjuʼ ya jcholix skʼop Dios ta nanatik, ya jpas te bantito kʼalal ya xjuʼ kuʼune».