Te Bryn te jaʼ jtul hermano te yak ta kuxinel ta Carolina del Norte (Estados Unidos) te ya x-aʼtej sok te Comiteetik yuʼun Enlace ta swenta Hospital ta lugar-abi. Te comiteetik ini jaʼ ya skoltayik te testigoetik yuʼun Jehová te ayik ta hospital.

 Ta skaj te COVID-19, bayal hospitaletik ma la yakʼik permiso yuʼun ya xkʼotik ta ulaʼtayel te jchameletik. Jaʼ yuʼun, te Bryn la skʼopon bael ta teléfono te director yuʼun jun hospital swenta ya sjojkʼoybey bin-utʼil ya xjuʼ ya skoltay te Testigoetik te tey ayik-ae.

 Pero, jaʼ la sjakʼ llamada te winik te ya skoltay te director, te Bryn la yalbey te yakuk yakʼbey te snumero te Testigoetik te tey ayik-a yuʼun jich ya xjuʼ ya skʼopon te hermanoetike. Te winike lek la yaʼiy.

 Te Bryn jaʼnix jich la yalbey te kʼax mukʼ skʼoplal ta yoʼtan te aʼtelil ya spasik te machʼatik ya x-aʼtejik ta hospital sok te ya skʼan te lekuk ayike. Jaʼnix jich la yalbey te snaʼoj te bayal machʼatik yakik ta mel-oʼtan o tsakbilik ta estrés ta skaj te COVID-19, kʼaxtoxan-a te machʼatik ya x-aʼtejik ta hospital.

 Te winik la yal te yuʼun-nix jich-a te kʼax lujben ya yaʼiy sbaikix te machʼatik ya x-aʼtejik ta hospital.

 Jaʼ yuʼun, te Bryn jich la yalbey: «Ta página kuʼuntik ta Internet ya xjuʼ ya atabey skʼoplal te bin-utʼil ta tsalel te estrés. Teme ya x-ochat ta jw.org sok ya atsʼibay ta sleojibal te kʼopil estrés, yame ata chaʼoxchajp te bintik ya yakʼbey smukʼul yoʼtan te machʼatik ya x-aʼtejik ta hospital».

 Te kʼalal yakikto ta aʼiyej-ae, te winik och ta jw.org sok la stsʼibay te kʼopil estrés, lokʼesbot tal bayal información. Jich la yal: «¡Kʼax lek te bin ya schole! Ya kakʼbey yil te director. Bayal ya xjuʼ ya xkoltayot te machʼatik ya x-aʼtejik liʼi sok yantikxan ants winiketik. Ya jlokʼes bayal copia sok ya jpuk».

 Cheʼoxeb semana ta patil, te Bryn la skʼopon bael te director, albot yuʼun te ochik ta página kuʼuntik ta Internet sok te la slokʼesbeyik scopiail te bin la staik ta swenta te estrés soknix yantik temaetik. Te copiaetik-abi la spukbeyik te enfermeroetik sok yantik j-aʼteletik ta hospital.

 Te Bryn jich la yal: «La yalbon bayal wokol te director ta swenta te aʼtelil ya jpastik sok te junetik te xcholetnax te bin ya yale. La yal te yuʼun-nix ya xkoltaywan-a te bin ya schole».