Te Madián sok te Marcela kʼax lek-a te skuxlejalik ta Medellín (Colombia). Te Madián lek ya yichʼ tojel ta yaʼtel-a, jaʼ yuʼun leknax chajpanbil te na te banti kuxinemik-ae. Pero ay bin kʼot ta pasel te akʼotik ta pensar yuʼun te bin yakik ta spasel ta skuxlejalik. Te bitʼil jaʼ testigoetik yuʼun Jehová, ta 2006 kʼotik ta jun mukʼul tsoblej yuʼun día especial te sbiilinoj «Mantengamos el ojo sencillo». Jich ya yalik: «Te discursoetik la yichʼ akʼele, la yalbey skʼoplal te ma skʼan ya xbajt ta koʼtantik sleel jkʼulejaltik te jaʼ lek te jaʼ ya xbajt ta koʼtantik yichʼel ta mukʼ te Dios. Kʼalal laj te mukʼul tsoblej, la jtatik ta ilel te jaʼ baem ta koʼtantik sleel te jkʼulejaltik, melel bayal bintik ya jmantik sok bayal jbetik-a».

 Koltayotik yuʼun te mukʼul tsoblej, teyto-abi, te Madián sok te Marcela jajch sjelontes te skuxlejalik. Jich ya yalik: «Ma bayalix la jlajintik te jtakʼintik, bootik ta kuxinel ta jun na te chʼinxan, la jchontik te jcarrotik sok la jmantik jun moto». Sok maba bajtikix ta mukʼul tiendaetik yuʼun jich ma x-ikʼbotix yoʼtanik ta smanel-xan sbilukik. Jaʼnix jich la slokʼesik-xan stiempoik yuʼun ya scholbeyik skʼop Dios te ants winiketik. La yamigoinik chaʼoxtul precursor especialetik a te spisil yoʼtan ya x-abatinik ta stojol te Jehová.

 Ta patil, te Madián sok te Marcela la staik ta nopel te ya xbajtik ta koltaywanej ta jun chʼin congregación. Yuʼun ya xjuʼ yuʼunik spasel, te Madián la yijkitay te yaʼtel. Albot yuʼun te spatrona te sojkem sjol, pero la scholbey yaʼiy te bin yuʼun ya yijkitay te yaʼtel. Jich la sjojkʼoybey: «Te jaʼat bayal takʼin ya apas ganar, ¿pero tseʼelbal awoʼtan?». Pero te spatrona la yal te maba tseʼel yoʼtan, melel bayal problemaetik yuʼun te ma xjuʼ ya schajpan. Jaʼ yuʼun jich la yalbey: «Ma jaʼuk ya yakʼbat stseʼelil awoʼtan te takʼin, te bin ya yakʼbat stseʼelil awoʼtan jaʼ te yakuk apas te bin ya amulane. Te bin ya yakʼbon stseʼelil koʼtan sok te kiname jaʼ te ya jnojptestik te ants winiketik ta swenta te Dios, jaʼ yuʼun ya jlokʼestik-xan jtiempotik ta spasel abi».

 Te Madián sok te Marcela kʼax tseʼel yoʼtanik melel te bin mukʼ skʼoplal ta yoʼtanike jaʼ te abatinel ta stojol te Dios. Ayix 13 jaʼbil te yakik ta abatinel ta congregacionetik ta noroeste yuʼun Colombia te ya skʼanik koltayel, jaʼnix jich precursor especialetik.