Ta junio yuʼun 2013 kʼax tulan jaʼal ta Europa central jich noj ta jaʼ te lume sok bayal bintik la sjin jilele. Te mukʼul jaʼ Danubio te ya xkʼax ta Hungría noj ta jkʼaxel ta skaj te tulan jaʼal te maʼyuk jich kʼoem ta pasel.

Ta swenta te koltayel te ya skʼan akʼel oranaxe, te Ministerio de Recursos Humanos yuʼun te lume la skʼanbey te sucursal yuʼun te stestigotak te Jehová ta Hungría te yakuk skoltay te ants winiketik yuʼun jich ya snaʼik te bitʼil ya skanantay sbaike. Ta swenta-abi, te sucursal la skʼanbey te congregacionetik te nopol ayik ta mukʼul jaʼ Danubio te yakuk schʼuunik spasel te bintik chajpanbil yuʼun te machʼatik ay yaʼtelik ta swenta skanantayel te lume.

Kʼax bayal te koltayel la yakʼik te congregacionetike. Ta bayal kʼajkʼal, kʼaxemto ta 900 ta tul stestigotak te Jehová te ayik ta 72 congregacionetik koltaywanik ta smakel te nojel jaʼe. La yichʼik kʼanbeyel te yakuk yichʼik bael jun tarjeta te tsʼibaybil te sbiilik, te slumalik sok te kʼopiletik sTestigotak te Jehová.

Ta jun lum, ay jtul te machʼa swentainej te Cruz Roja ta Hungría la stikun bael kʼop ta jun congregación te jich la yale: «Ya kalbeyexkotik bayal wokol sok ya kichʼexkotik ta mukʼ. Ma spisiluk-ora ya kilkotik ants winiketik te junax ayik sok te jun yoʼtan ya xkoltaywanik jich bitʼil te jaʼexe. Ya jnaʼkotik te ay namal talemexe. Ya jmulan yalbeyel te jlumaltik te la awakʼik ta ilel te lek atalelike».

Jaʼnix jich te sucursal ta Hungría la yichʼ akʼbeyel jun karta yuʼun jtul jwolwanej yuʼun jun organización swenta skoltayel machʼatik ya staik wokol, te jaʼnix ya x-aʼtej sok te jtsojb ants winiketik te mukʼ yaʼtelik ta Hungría, te banti la yalbey wokol te Testigoetik ta swenta te koltayel la yakʼike.