Te kʼalal yakik ta scholel skʼop Dios ta nanatik, chaʼtul Testigoetik yuʼun Jehová kʼotik ta jun na te banti lokʼ tal jtul winik te ay ta tulan mel-oʼtane. Ta yutil sna te banti ay eskalerae, chikan ta ilel te jokʼol jlijkʼ chʼajan yuʼun kʼan sjojkʼan sba-a.

Te winike otseswan ta sna sok la sjojkʼoybeyik bin swentail te chʼajane. La yal te la snop te ya smil sbae, jaʼukmeto te kʼalal la yaʼiy te la yichʼ tijel te timbre, la sjam te snae. Te Testigoetike jajchik ta aʼiyej sok, patil la yikʼik bael ta doktor te jaʼ la yichʼ akʼbeyel koltayel yuʼune.

Jaʼ ini la yichʼ lokʼesel ta jun periodiko belga, ma jaʼuknax-a te bitʼil te Testigoetik yuʼun Jehová te skoltayojik te machʼatik ya skʼan smil sbaike. Akʼa kiltik yantik te bintik kʼoem ta pasel ta yantik nasionetik.

Jtul ants te ay slumal ta Grecia jich la stsʼibay: «Te kʼalal la sloʼlayon te jmamlale la stsakon tulan mel-oʼtan. Te bitʼil ma jnaʼix-a te bin ya jpase la jnop te ya jmil jbae. La yakʼbon smukʼul koʼtan te yakuk xlajone: la jkʼan te yakuk xlajix te jwokole.»

Jaʼukmeto te ants ini bajtʼ ta doktor. Maʼyuk bayal kʼajkʼal ta patil la sle te stestigotak Jehová sok jajch ta snopel te Biblia sok bajtʼ ta tsoblejetik. Jich ya schol: «Jtaoj smelelil kʼuxul oʼtanil ta stojol te hermanoetike, jaʼ te kʼuxul oʼtanil te ayix tal jaʼbil yakon sleele». Jich ya yalxan: «Jtaoj smelelil kamigotak te ya smukʼulin koʼtane. Jaʼnix jich jtaoj lamal-kʼinal sok tseʼel-oʼtanil, maba ya jmelix koʼtan yuʼun te bin xtal ta pajel chaʼbeje».

Jtul Testigo yuʼun Jehová ta Inglaterra jich ya yal: «Ta jun buelta la skʼoponon tal jtul machʼa ya jnaʼbey sba te ay ta tulan mel-oʼtane, la yal te yalaj smil sba te ajkʼabal-abi. Jaʼukmeto la jle koltayel ta swenta jun articulo te lokʼem ta revista ¡Despertad! ta mayo yuʼun 2008 te ya yalbey skʼoplal ta swenta te ay machʼa ya skʼan ya smil sbae, kʼopojon sok te yakuk xkʼot ta yoʼtan sok la jkʼoponbey yaʼiy cheʼoxeb versiculoetik te lokʼem ta Biblia te ya yakʼ smukʼul koʼtantike. Ta ora ini, manchukme ayto kʼopetik ta stojol, maba ya snopix te jaʼ schajpajibal te ya smil sbae».

Ta Ghana, jtul Testigo yuʼun Jehová te sbiil Michael, jajch ta aʼiyej sok jtul jchʼiel achʼix te ya xkʼot ta schonel biluketik te banti yak ta aʼtele. Te Michael la yil te ay ta mel-oʼtane, la sjojkʼoybey te bin yuʼune.

La yal te ya skʼan smil sba ta swenta te bajtʼ sok yan ants te smamlale. Te Michael la yakʼbey yip yoʼtan sok la yakʼbey chaʼpajk libroetik te lokʼem ta Biblia. Te bin la skʼopone koltayot yuʼun te maba ya smil sbae, jajch ta snopel te Biblia sok och ta Testigo yuʼun Jehová.

Ta Estados Unidos, jun periodiko la yalbey skʼoplal te bin kʼot ta stojol jtul jchʼiel Testigo te yak ta scholel skʼop Diose. Te kʼalal yak ta bael ta kaye, la yil te kotol kojtʼ karro te maba tupʼen te smotore. Te jchʼiel kerem jich ya schol:

«La kil te escape yuʼun te karro te ay jun tubo yuʼun stakijtesel kʼuʼul pakʼal te ya xkʼot ta kʼalal ta sbentanaul te karroe te slapʼoj ta lek sok cinta adhesiva.

»Boon ta oranax te banti ay te karroe, sok la kil ochel ta bentana, la kil jtul ants te yak ta okʼel ta yutil te karro te nojel ta chʼaile. Jich yuʼun awunon: “¡Bin yakat ta pasel!”.

»Te kʼalal kʼan jam te puertae, la kil oxtul alaletik ta juktajibal te ay ta spate. Te kʼalal la jame te antse jich awun: “¡Ijkʼitayawon! ¡Akʼa lajukon! ¡Akʼa lajukon sok te kalatake!”.

»La kalbey te manchuk jich spase, sok te ma jaʼuk schajpajibal te kʼopetik yuʼune. Jaʼukmeto la yal te skʼan ya xbajtʼ ta chʼulchane sok te ya yikʼ bael-euk te yalatake.

»Te kʼalal yak ta okʼel-a te antse, la jkejan jba, sok yaʼlel jsit la kalbey: “¡Awokoluk ma xa apas jich!”. Jich yuʼun la jmak lokʼel ta jkʼab sok kʼunkʼun la jlokʼes tal ta yutil te karroe.

»Ta patil awun: “¡Te kalatake! ¡Lokʼesa tal te kalatake!”.

»Te alaletike la yakʼ te skʼabike yuʼun jich ya yichʼik lokʼesel tal. Chaʼtul tut achʼixetik, te jtule chaneb yaʼbilal te yane joʼeb yaʼbilal sok jtul tut kerem te chebtonax yaʼbilale. Tey ayik ta yutil te karroe sok ma xkʼopojik, ma la snaik te jtebxanix kʼan lajukike.

»Te kʼalal la jlokʼeslan ta schanebalike, la jtub te karroe, najkʼajon sok ta tut muro sok jich la kalbey te antse: “Albon kaʼiy”.»

Te testigoonkotik yuʼun Jehová, ya kilkotik te kuxlejalil jich bitʼil jun majtʼanil yuʼun te Jpaswanej kuʼuntike. Jaʼnix jich ya jkoltaykotik sok ya kakʼbeykotik yip yoʼtanik te machʼatik yoʼtan ya skʼan ya smil sbaike soknix te ants winiketik te ay machʼatik lajem yuʼunike.