Te testigoonkotik yuʼun Jehová kʼoem ta koʼtankotik te jpisiltik pajalotik ta sit te Diose (Hechos 10:34, 35). Ta swenta te bitʼil ya kakʼkotik ta nopel te Bibliae, ya jkoltaykotik te ants winiketik te yakuk slokʼes ta yoʼtanik ta jkʼaxel te spʼajel te machʼatik yan stsʼumbalike.

Jaʼnix jich maba ya kakʼbeykotik koltayel te machʼatik ya stsob sbaik ta skontrainel te yantik tsʼumbalil. Jich bitʼil kʼalal ta yorail te mantalteswanik te nazietike, te stestigotak Jehová ta Alemania sok ta yantikxan nasionetik maba la yakʼbeyik koltayel ta swenta te pʼajel la sjach ta winik Hitler. Ta swenta-abi, bayal cien ta tul la yichʼik milel yuʼun.

Jaʼnix jich kʼot pasel ta Ruanda ta yaʼbilal 1994, kʼalal jkʼaxel kʼan stupʼik jchajp tsʼumbalil. Te stestigotak Jehová ma la yakʼik koltayel ta swenta te milaw-abi. Ay machʼatik la yakʼik ta wokol skuxlejalik yuʼun sok ay machʼatik te jkʼaxel la yichʼik milel ta skaj te la yakʼbeyik koltayel te machʼatik yakik ta anel yuʼun te milele.

Te bin skʼanojel koʼtankotike jaʼ te skoltayel ta spisil te ants winiketik ta swolol Balumilal, jaʼ yuʼun ya jpaskotik imprimir sok ya jpuk-kotik junetik te lokʼemik skʼoplal ta Biblia te kʼaxemto ta seiscientos ta chajp kʼopil. Ta swenta-abi, ya xkʼot ants winiketik te bujtsʼan kʼinal ya yaʼiyik tey te banti ya jtsob jbakotik te talemik «ta spisil ta chahp nacionetic, tsʼumbaliletic, pueblohetic soc cʼopiletic» (Apocalipsis 7:9).